الجزء الأول
يما .. يما .. يمااااااااا
الأم : هلا يما كاني هنيه بالصالة
(وقفة) الأم فاطمه (أم حمد) طيبة وحنونة وكريمة ، أرملة عندها :
(مريم * أم يوسف * عمرها 38 سنة عندها 3 أولاد وبنتين )
(حمد * أبو عبد العزيز* عمره 36 سنة عنده ولدين وبنت)
( نوره * أم فواز * عمرها 32 سنة عندها بنتين وولد)
( ساره * أم مشاري * عمرها 28 سنة عندها 3 أولاد)
(ناصر 22سنه عسكري حبوب ويموت على بطلة قصتنا الغلا لأنهم
توائم .
الغلا وهي تغني : صباح الحب والأحساس والطيبه
(وقفه) الغلا 22 سنة آخر سنه لها بالجامعه إدارة أعمال مملوحة
بيضه طولها لايق على جسمها الرشيق شعرها اسود ناعم وبخدودها
غمازتين تبارك الرحمن محلين وييها ، دمها خفيف عسل حبوبه تحب
الضحك والفرفشه ، انيقه بلبسها ، ما تحب الحشرات والزواحف
وخصوصا الزهيوي (الصرصور)
الأم : صباح النور عالحلوين
الغلا : يما بمر ميمي صديقتي وبروح معاها المجمع ناخذ غرض
وبعدين بنمر الجامعه عندنا شغله ضرورية حق الإمتحان
الأم : الله وياج يما حافظج الله بس قبل لا تطلعين تريقي
الغلا : باخذ نسكافيه معاي السيارة … يلا باي ماماتي
الأم :بلا هالباي قولي مع السلامه
الغلا : مع السلامه فطومه هههههههههه
الأم بقلبها ( الله لا يحرمني من هالضحكة الله يوفقج يا بنيتي ويرزقج
بولد الحلال اللي يسعدج اللهم آمين )
الساعه 10 صباحا في احد المجمعات المشهورة بالكويت
مريم : شرايج أي لون آخذ
الغلا : ميمي شنو لون بدلتج ؟
مريم : أسود
الغلا : إخذي هاللون راح يطلع وايد حلو عنابي وفيه أسود
مريم تكلم البياع : لو سمحت هذا الطقم كامل ؟
البائع : أيوه مدام وكمان معو ساعه كتير حلوه
مريم : اوكي أشوفها … واو شرايج غلا
الغلا : كتييييير حلوه ومهضومه
البائع في نفسه ( والله إنتي اللي كتير حلوه ومهضومه ياالله على
هالغمازتين)
مريم : هههههه اشفيج قلبتي
يلا خلصي ورانا مشوار الجامعه
دفعت مريم للطقم وطلعوا من المحل
مريم : غلا خلينا نقعد بالكوفي نشرب موكا تو الناس
الغلا : موكا وأنا مومتريقه
مريم : محد قالج لا اتريقين يايتني الساعه 9 مو متريقه !
الغلا : ما أحب آكل أول ما أقعد من النوم على طول
مريم : مشكلتج ، تعالي طلبيلج كرواسون مع الموكا
قعدوا بالكوفي وخذتهم السوالف ، الساعه 11 رن موبايل مريم
صالح زوج مريم : هلا حبيبتي وينج
صالح : انا خلصت شغلي شرايج أمرج إذا خالصه
مريم : إيه حبيبي خالصه تعال
صالح : يلا إذا وصلت أدق لج وطلعي
مريم : أوكي حبيبي باي
الغلا وفاتحه عيونها : اوويعاي ، شنو خالصه تعال ومنو هذا ؟
مريم : بعلي حبيبي صلوحي بيمرني الحين
الغلا : وبغلج ليش ما قلتيله ان ورانا جامعه ؟!
مريم : اوووه نسيت .. عفيه غلاتي عمري حبيبتي حياتي
الغلا : إكلي تبن بدينا باسلوب الطراره من سمعتي صوت
(وتقلد صوتها: صلوحي حبيبي) نسيتي عمرج مالت عليج إنتي
وياه روحي طسي
مريم : غلوي عفيه
الغلا : ………………..
مريم : غلغل
الغلا مبتسمه : غلغل شنو بعد ؟!
مريم : ادلعج
الغلا : مانبي دلعج روحي الله وياج وسلمي على سطوحي
مريم : سطوحي بعينج هذا بو محمد الغالي
الغلا تضحك : الله يخليه لج وتولدين بالسلامه
مريم وهي تبوس الغلا على خدها : آمين وأشوفج عروس يا
الغلا يا أعز صديقه في حياتي …. يلا كاهو صالح دق باااي
الغلا : على قولة أمي بلا باي قولي مع السلامه
مريم : مع السلامه وأنطر منج ألو
طلعت الغلا من المجمع وشافت سياره مسكره على سيارتها
الغلا : أووووف منو هذا قليل الأدب اللي مسكر على سيارتي
يعني قلت الأماكن
الغلا تمت واقفه وتتلفت يمين وشمال وتطالع صوب باب المجمع
ونطرت لحد الساعه 12 ألا ربع وصاحب السيارة ما وصل
الغلا : خمس دقايق إن ما وصل لأفشش توايره
وفعلا فتحت الغلا برغي السيارة ونسمت على التاير لما فضته
من الهواء اللي فيه : الحين اشوف شلون بيروح فيها
دقت الغلا على سايقهم مؤمن اييها
الساعه 12.15 شافت اثنين يايين صوب السيارة وواحد يتكلم بالموبايل
خالد : شاهر انت وينك ؟
شاهر : بابا أنا ألهين يجي أنا روه همام (جذاب قاعد يسولف)
خالد : يلا بسرعه حر بره
الغلا وهي معصبه : زين والله انك تدري ان حر بره
خالد :؟!!
وتسكر عليَ
خالد : ما هو أنا اللي مسكر على سيارتك هذا السواق
الغلا : يوم انك شفت السايق وقف عند سيارتي ليش ما قلت له
روح دور لك على مصفط
خالد : حصل خير ما صار شي ليه هالأعصاب خلاص آسفين
الغلا : وانا وين أصرفها آسفين هاذي إن شاالله ، وكل هذا ما صار
شي ساعه واقفه بالشمس انطر وبعدين عطلتني عن شغلي
في هاللحظه يا شاهر يركض صوب السيارة : سوري مدام
الغلا بعصبية : سوري بعينك عمه بعينك انت مال كف على ويهك
انت ومعزبك
خالد : إختي احترمي نفسك وعن الغلط
الغلا : أولا انا ماني أختك وثانيا انا محترمه غصبن عليك
خالد عصب وتوه بيكلمها وقفه فهد ولد عمه
فهد : بس خالد .. إختي إحنا آسفين وحقك علينا
خالد يطالعها بنظرة ومعصب أول مره بنت تكلمه بهالأسلوب
وصل مؤمن ونزل فتح للغلا الباب ..
الغلا تفتح الدريشه وتكلم السايق شاهر : أقول نص ساعه وصلح
التاير خل معزبك يذوق الحر على اصوله وأحمد ربك تاير واحد
اللي مفشوش مو اربعه… يلا مؤمن حرك تأخرت
فهد شاف السيارة ولقى واحد من التواير مفشوش
خالد وعينه على سيارة سايق الغلا وبنفسه (وش هالحلا بس يالله
من لسانها )
فهد : خالد شوف الكفر ؟
خالد سرحان…………..
فهد : معقوله هي اللي فرغته ! ماشالله ما أقواها
خالد :………….
فهد : أنا من أكلم ؟ هييييي أنت
خالد : ها ايش تبغى
فهد : وين سرحت ؟ وشلون راح نرجع هالحين ؟
خالد : ماهي مشكله ندق على ليموزين (تاكسي)
(وقفه) * خالد وفهد عيال عم من السعوديه اعمارهم 25 سنه
خالد مخلص جامعه إدارة أعمال ويشتغل بشركة ابوه وفهد دكتور
ومالج على نوف اخت خالد , يايين الكويت زيارة لقرايبهم *
الساعة 4.30 العصر
الغلا : السلام عليكم شلونج ميمي
الغلا : أي دكتور الله يهداج لو رايحه معاج ابرك لي
مريم : ليش شصاير ؟!
الغلا قالت لمريم اللي صار لها مع خالد وفهد
مريم : هههههه والله قويه شلون فشيتي التاير
الغلا : هههههه توأم روحي حبيبي معلمني
مريم : خوش تعلوم !
الغلا : إييه حق هالمواقف اللي مثل هاذي
مريم : يعني ما رحتي الجامعه ؟
الغلا: امبلا رحت دقيت على السايق ووداني رحت واشوه لقيت
الدكتور معتذر، واااي حمدت ربي اعتذاره يا بوقته لأني داشه
الجامعه متنرفزه والسبه بو شماغ حمر
مريم تضحك : سميتيه بو شماغ حمر
الغلا تضحك : إيه بو شماغ حمر ماركة مسجله هههههههههه
الساعه 6 قبل المغرب بشوي
الغلا : مؤمن ورا صلاة المغرب نروح نييب سيارتي
مؤمن : انا مع منو روه ؟
الغلا : مع منو يعني انا وماما بنروح معاك بس انت ودنا عند
المجمع وروح
الساعه 7 وصلوا المجمع نزلت الغلا مع امها علشان يركبون السيارة
وبفتحتها للباب طاحت بإيدها ورقه صغيره فتحتها
(( احمدي ربك كفرين مفرغين ما هم بأربعه ))
استغربت الغلا من اللي مكتوب ما فهمت شنو القصد من الكلام
وتوها بتدخل السيارة ياها مؤمن : كلا شوف هازا تاير اتنين خراب
شهقت الغلا وفتحت عينها وبنفسها (ايا الحيوان يا التبن)
خذت الورقه وقرتها مرة ثانية ( مالت عليك كفر يعني تاير، اشوه
إني ما فششت توايرهم الأربعه جان الحين يمكن كسر سيارتي
يا عل راسه الكسر)
رجعت الغلا مع امها بسيارة السايق وقعد مؤمن يعابل بسيارتها .
وصلت الغلا وامها بيت خالتها أم وليد وبعد السلام وأخذ الأخبار
الغلا : شرايكم نطلع ضيقة خلق
سعاد : إيه والله جان زين . وين نروح ؟
طيبه حفيدة ام وليد : نروح الألعاب
الغلا : وانتي وين أمج ؟
طيبه : راحت مع بابا
الغلا : وأمج هاذي كله مع بابا ومخليتج عند يدتج
طيبه بكل براءه :إيه
عشا
الغلا : منو أهل السعوديه خالتي ؟
ام وليد : من عيال عموم بو وليد وعياله يايين لشغل
سعاد : يما دقي على أبوي سمعته اليوم يقول بيطلعون بالليل
دقت ام وليد على زوجها وقال لها انه راح يطلع مع ابو عيسى
السعودي والشباب راح يطلعون مع ولده علي
ام وليد : ابو وليد والعيال بيطلعون
الغلا : هييييا .. يلا تزهبوا
ام حمد : نروح يوم البحار
طيبه : ايه علشان العب بالدوارف
ام وليد : عسى بس تيينا نسمة هوا باردة .. يما سعاد دقي على اختج
وقوليلها طيبه بتنام عندنا
قبل لا يطلعون من البيت كانوا الشباب راكبين سيارة علي الهمر
وعلي واقف عند باب سيارته ويتكلم بالموبايل : وينك عطلتنا
الشباب بالسياره
ناصر : كاني قاعد اصفط ما تشوفني ؟
الغلا : هاي علاوي
علي : هلا والله اهلين شلونج
الغلا : بخير الحمد لله انت شلونك
علي : بخير الله يسلمج ..شاف خالته راح سلم عليها وحبها على راسها
ام حمد : شلونك يما وشلون الجامعه معاك ؟
علي : الحمد لله ماشي الحال
الغلا : الله يقطع بليسك خللت بالجامعه استح على ويهك اللي كبرك
الحين تخرجوا
علي : إحم ..إحم.. وبصوت واطي :بس فضحتيني الشباب بالسياره
يسمعونج
الغلا : أي شباب ما شوف الا شمغ
التفتت الغلا وشافت ناصر يسلم على خالتها
الغلا: هلا بالطش والرش وماي الورد بالقرش
ناصر مبتسم : هلا بروحي
طبعا الشباب اللي بالسياره سمعوا الغلا وهي تكلم علي وخاصة
اللي قاعد جدام (خالد!!!!!)
خالد يكلم ولد عمه فهد : فهد الحق مو هاذي اللي شفناها اليوم بالمول
فهد : إيه .. صدق صدفه عجيبه
الغلا : ناصر بتروح مع علي
ناصر : إيه
الغلا : يييييس .. يلا عطني السويج خلني أكشخ بالهمر
(ناصر وعلي ماخذين همر ناصر اسود وعلي ابيض)
الغلا تكلم اللي معاها : يلا يا صبايا عالهمر الأسود
ركبوا السياره وحرك علي قبل الغلا ومشوا ورا بعض
الغلا تدق على علي (معلومه* علي اخو الغلا وناصر بالرضاعه
بس على اكبر منهم بتسع شهور)
الغلا : يا بو الهمر الأبيض افتح الطريج للهمر الأسود
علي : هههههه قلبي ويهج
الغلا : إنت قد هالكلمه ؟
علي : يا بنت عن الخبال
الغلا : خبال بعينك .. ، داست الغلا بانزين وطلعت على الحارة الثانيه
بعدين لفت وصارت جدام علي ولزمت بريك بالخفيف واضطر علي
يلزم بريك بعد ، الغلا تكلم علي : قدها وإلا مو قدها
علي : قدها بس فكينا من شرج
ام حمد : يما الغلا شوي شوي شلاحقج
خالد وفهد مستغربين من تصرف الغلا ومستغربين شلون ناصر
عطاها مفتاح السياره ، رن موبايل ناصر : هلا والله بروحي
الغلا : هلا بتوأم روحي
ناصر : لا هاذي مالتي .. ليش غيرتي النشيد
الغلا : ههههههههه هلا بقلبي وروحي وعقلي وكلي
ناصر : إيه شاطرة آمري تدللي
علي : بس لا تدلعها اكثر من جذيه بروحها صايره مليغه
الغلا سمعته : مليغه مرتك يا الجيكر
ناصر يضحك ويقول لعلي : شعليك صرت جيكر
علي : ما جيكر إلا انت واختك
الغلا : حبيبي قول حق عليوي يوقف علشان تاخذ سويج سياره
السايق ترد فيها وانا أرد بسيارتك
ناصر يكلم علي : علي دق فلشر وأوقف
علي : ليش
علي عاند شوي علشان يحرها يمشي ويوقف كذا مرة
الغلا تكلم خالتها : خالتي ولدج ينني مال الحين انتف حواجبه
ام وليد تضحك : لو مو متراضعين جان انتي الحين مرته
****************************************
بعد يومين الساعه 9 الصبح الغلا ومريم يتريقون في مطعم …..
بعد نص ساعه الغلا رايحه تاخذ حلو شافت علي
الغلا : اهلين شهالصدفه الموحلوة هههههههه
علي يضحك : مثل صدفتج
الغلا : ياي بروحك ؟
علي : لا معاي الشباب
الغلا : الشباب السعودي ؟
علي : ايه … ، وانتي مع منو يايه ؟
الغلا : مع صديقتي مريم
علي فز قلبه يوم سمع بأسم مريم : شخبارها
الغلا : لا تسأل عنها خلاص الحين هي متزوجه وبعد جم شهر
بتصير أم ، الله يرزقك بأحسن منها
(علي كان يحب مريم بس هي ما تدري عنه ويوم قال لغلا انه
يحبها ويبي يتقدم لها ، وقال لغلا تكلمها وتشوف رايها ، وباليوم
اللي الغلا كانت بتكلم مريم عن علي دقت عليها مريم فرحانه
بخطوبتها على ولد عمها صالح ، علي تأثر وحزن كان وايد
يحبها وعاجبته بس عزاءه الوحيد ان هالحب كان من طرف
واحد ومريم ما تدري عنه )
الغلا : يلا باي عطلتك عن ربعك
بعد نص ساعه طلعوا البنات من المطعم شغلت الغلا سيارتها
وما اشتغلت
الغلا : واااااي شهالحظ .. الحين يوم فيني النوم سيارتي وقفت
مريم : بدق على صالح ايي ياخذنا
الغلا: لا انا ماني رايحه معاج استحي روحي بروحج اقول لعلي
اخوي يوصلني
راحت مريم مع زوجها والغلا دقت على السايق وكان طالع مودي
ام حمد السوق تشتري اغراض ، دقت الغلا على علي
الغلا : هلا علي خلصت أكل
علي : ليش ؟ لا يكون ما عندج فلوس وتبيني ادفع لج
الغلا : عليوي مو وقتك تعال سيارتي ما تشتغل
علي : وصديقتج وينها ؟
الغلا : راحت مع ريلها
علي : انزين شوي وننزل
الغلا استحت لأنه معاه الشباب : علي عادي متى ما خلصت
دق على موبايلي
راحت غلا تتمشى بالسوق اللي تحت المطعم شافت دلاقات
واخذتهم لأخوها ناصر، دق عليها علي : وينج ؟!
الغلا : تحت اشتري لناصر دلاقات
علي : صج متفرغه يلا تعالي
الغلا : لحظه علي خل الشباب يركبون اول استحي
علي : اوكي يلا طلعي
مشت الغلا وركبت السياره جدام وبصوت واطي : السلام عليكم
علي والشباب : وعليكم السلام
علي شاف سياره الغلا : يبيلها بطارية ، شوي وادق على ونش
يسحبها
رن موبايل علي : لو طارين مليون .. هلا والله باللي اخته غاثتنا
درت الغلا انه يكلم ناصر وضربته بكوعها
ناصر : هلا فيك ليش اختي غاثتك
علي : ياأ خي ناشبه ابلاعيمي كل ما اروح القاها جدامي ومعطلتني
علشان تشتريلك دلاقات
سحبت الغلا الموبايل من علي وكلمت اخوها : هلا ناصر وينك ؟
ناصر : بالدوام ، اشفيج مع علي
الغلا : ما فيني شي اختربت سيارتي وقاعد يتمنن ما يدري انه
سيارته تباركت يوم ركبتها
ناصر : إيه الشباب معاك ؟
علي : إيه معاي الحين بالسياره
ناصر مستغرب : شلون معاك ! والغلا راكبه معاكم
علي : إيه اشفيك ؟
ناصر : شنو اشفيني عيب علي هذيله عيب عندهم هالشي الله يهداك
علي : يعني اخليها بالشارع بروحها
درى خالد ان ناصر متضايق لأن اخته معاهم بالسياره
طول الطريج والهدوء يعم السياره إلا برنة موبايل الغلا : هلا يما
أم حمد : ها يما وينج
الغلا ونست نفسها وان فيه شباب بالسياره : شفت واحد وركبت معاه
ام حمد وتعرف قشمرة بنتها : ومنو هالواحد
الغلا وتلتفت لعلي : تقول أمي شسمك ؟
علي ويساير خبال الغلا : قوليلها عماد
الغلا : يما انا مع عماد حمدي هههه
خالد فرحان ان قاعد يسمع صوتها ( صوتها حلو ودمها خفيف)
ام حمد : هههههه وي يعني مو مع رشدي اباظه ، قوليله دير بالك
على فاتن حمامه
الغلا :هههههههههه علي تقول لك أمي دير بالك على فاتن حمامه
علي يكلم خالته : هلا والله بماري منيب
ام حمد تضحك : حرام عليك على الأقل قلت ميمي شكيب أرز
علي يضحك : تخسى عندج بنت شكيب
خالد وفهد مبتسمين على خبالهم
الغلا : يما بروح عند إديده ولحد يدق علي من امس مو نايمه مواصله
ام حمد : خواتج ورياييلهم بيتغدون اليوم عندنا
الغلا : أدري يما مالي خلق أزعاج مصدعه واللي يمي بعد زاد
صداع راسي بنام عند إديده وأييكم باجر
علي وصل عند بيت يده وشاف يده توه نازل مع السايق ، الغلا
شافته ونزلت تركض ومسكت ادينه ولمته وباسته على خده حيييل
الغلا : هلا والله بالمزيون شلونك ممكن نتعرف
ضحك اليد ومسك ايدها : هلا بالغلا كله
نزل علي يسلم على يده ونزلوا خالد وفهد والغلا دخلت داخل البيت
