مشكلتي ،ما بتقبل الجنس الاخر -لصحتك 2024.

السلام عليكم ورحمة الله و بركاته

رح ادخل بالمشكلة ع طوول ،

يا بناات انا بنت في اول العشرينات مو متزوجة ،، بس مشكلتي اني ما بعرف اتعامل مع الرجال
يعني بشووف تعليقاتكم على اي بنت بتتهاوش مع زوجها انه اتحملي وما تزعليه و غيري اسلوبك معه وكبري عقلك ووو ،، الخ
بس انا بحكي ، ليش مو هو اللي يتحملها وما يزعلها ؟؟ ليش مو هو يغير اسلوبه ويكبر عقله ،، خاصة ﻷنه كتير نقاشات بين الزوج والزوجة بتكون عادية بس عصبية الزووج بتكبر الموضوع وبتصير مشكلة كبيرة ،، اذن هي مشكلته بإنه عصبي وبتنرفز بسرعة والمفروض هو اللي يغير اسلوبه ويسيطر على حاله واعصابه
مش مشكلتها هي ،، ومع هيك كل الأطراف بتوقف معه
متل ما هو بشر وطبيعته عصبي ولما يعصب بده يعبر عن مشاعره ،، هي بشر كمان وبتعصب وبدها تعبر وتفرغ كل اللي جواتها

انه مثلا ، ليش هي اللي تروح ع صالونات وتزبط شعرها وتغير شكلها وتلبس وتعمل وتساوي عشان تضمن ما تطلع عينه برا ،، بينما هو بنفس شكله بنفس منظره لا بلبس ولا بكشخ ولا اشي ومع هيك ضامنها ما تتطلع برا
ليش ما يوخد بعين الاعتبار انها ممكن تخونه او تتعرف على حد احسن منه ، ف بصير يشتغل و يكرس حياته انه يرضيها ،، بينما هي بتنام وبتصحى وهي خايفة يتعرف ع بنت تانية او يخونها او يتزوج عليها مع انها مش مقصرة معه

انا من اشد المؤيدين للمساواة بين الرجل والمرأة ، متل ما انت بدك هي بدها ، متل ما انت بتشووف هي كمان بتشووف ،، وانا ما بآمن انه الرجل ممكن يحب وحدة و يخلصلها متل ما هي ممكن تحب وتخلص
لو بتحبها ليش خنتها ؟ ليش تعرفت على غيرها ؟ ما تحكيلي الشيطان وما شيطان ، ليش تعطي مجال للشيطان اصلا
وليش هي لازم تسامح لييش ؟؟ ليش لازم تفكر عشرين مرة قبل ما تقرر شو تعمل مع انه هو لو هي عملت نفس عملته اقل اشي ممكن يعمله هو يطلقها اذا ما قتلها كمان
يمكن ما حد بفكر بالطريقة اللي بفكر فيها ،،يمكن نمر الرجال اللي مرت علي واللي سمعت عنهم كلهم متل هيك ويمكن في استثناءات بس بحكو انه كل الرجال متل بعض
يعني حتى ماما بتحكيلي انتي يا بتعنسي يا رح تطلقي من اول يوم

مش قادرة أوثق بأي رجال ولا اتقبل اختلاف طبيعة الرجال عن المرأة .. اللي بعرفه انه كلنا بشر