مغامرات حامل ج الاخير 2024.

صباح الخير
اجاكم الجزء الثالث والاخير من مغامراتي
بعد ما طلعت من المستشفى …رجعت عالبيت طبعا
قلنا للناس صار معي استسقاء سوائل لان ما حدا كان يعرف اني زرعت اطفال انابيب ..
طبعا الوحام كان كتييير صعب اول مرة يمر علي هيك وحام …مع اني سبق وحملت بس كنت أسقط
قال الحامل بتوام كلشي عندها مضاعف الوحام والتعب وكلشي..
بنهاية الشهر الثاني عملت عملية انقاص اجنة شالوا اثنين وخلوا اثنين و بنهاية الثالث عملت عملية تطويق عنق رحم …طبعا كلو تخدير عام …بعد عملية التطويق ارتفعت حرارتي و عأدوية وأبر وخافضات حرارة … قال طلع بسبب العملية نفسها
مر الشهر الثاني والثالث وحام موووت ما اقدر اتهنى بأكلة ودائما معدتي توجعني لانها فاضية وكلما اكلت استفرغ مع اني كنت اوخد ادوية بس عبث

مر الشهر الرابع وانا دائما خايفة ومتوترة و متضايقة لان الحمول السابقة اللي كان يصير فيني اكون تمام وغير شكل اروح عالدكتور اراقب الجنين و اذ بقولي ميت

دائما كنت اعرف ان الجنين ميت من الايكو وما كان ينزل علي شي ابدا …مرة رحت ع دكتورة كنت حامل طلع الجنين ميت من اكثر من اسبوعين وما معي خبر

و بعد الف يا ويلاه حتى نزلتو بعملية و حتى العملية كانت بدون تخدير لان المستشفى كانت بمنطقة محاصرة وممنوع يدخل لها اي شي لا اكل ولا دوا ولا حتى كان في اطباءوممنوع التجول .. بس انا دكتورتي تقربلي غامرت بحالها وراحت معي واضطرينا نعملها بدون تخدير مشان نخلص وما يتعفن الجنين بالبطن كان صرلو شهر ميت ..(كانت بنت)

المهم نرجع للحمل الاخير هاد … بالشهر الرابع صابني حساسية حمل كل جسمي طلع فيه حب صغير يحكني ومزعج ضل حتى اخذت دوا و الحمد لله راح

بالشهر الخامس نهايته حسيت نزل شي مثل مي ما عرفت شو هاد … ضل يتكرر كل اسبوع شوي ..
بالشهر السادس صار كل كم يوم .. وكمية اكبر من قبل (طبعا ما عدت قدرت اتواصل مع دكتورتي بسبب الاحداث ) …. اروح عالاطباء يقولوا لا هي مي برانية مالها علاقة بالجنين .. و اخر السادس صارت كثيييير يعني كل يوم احط فوطتين وثلاثة (أجلكم الله) وما يكفي …و كل دكتور يفحص ع ايكو يقول عادي مش سائل الجنين هاد … اقول بحالي لكان شووو هاد يا ربي منين طيب

و باول الشهر السابع زادت المي حتى صار كلما تحركت باي جهة يكب كب علي بكثير … و صار ينزل دم يعني نزيف …
وطلع معي فقر دم و اعطوني سيرومات وابر حديد و قالو لي لا تنامي وانتي متسطحة نامي وانتي قاعدة مشان الجنين يضغط عالرحم تحت وما يضل ينزل ,,,
صرت نام ع القاعد يعني متل اللي بنام ع كرسي هلكت وتعبت احس ظهري رح ينكسر و وما اشبع نوم ابدا
ضل النزف و المي تنزل كثير كثير مدة اسبوع وصار يصيبني طلق مثل الولادة رحت ع دكتور جديد فحصني قالي بصراحة يا اختي وضعك صعب كتير مي حول الاجنة ما في كثير ولازم تولدي فورا …و ما الك غير تروحي عالشام … لانك تحتاجي حواضن مجهزة و متطورة و بدرعا ما في مجال ابدا …

قلتلو انا زارعة زراعة ونطف قلبي حتى وصلت لهي المرحلة …طيب بعيشوا الاولاد اذا ولدت هلأ ما صرلي اسبوع بالسابع … سكت و قال الله يكون بعونك …

نزلت فورا من عند الدكتور عالشام حتى ما لحقت اخذ اغراضي و اي شي بخصني … و بهي الاثناء جوزي ما عاد يقدر يتحرك برا القرية تبعنا .. ابدا بسبب الحواجز و رحت انا ومرة ابوي الله يجزيها الخير … لان انا امي متوفية

رحت ع نفس الدكتور اللي زرعلي وكل اللي شافني تفاجأ وقال لك شو هاد اللي عم يصير معك انتي
بعد فحوصات تبين ان ما في ولا نقطة مي حول الاجنة وكثير مضغوط عليهم المساكين وما فيهم يتحركوا ابدا و حجمهم صغير كتير … وطبعا الطلق ما وقف كل خمس دقائق طلقة يعني ولادة نظامي وانا ما فيي اولد طبيعي لازم قيصرية …

ضليت بالمستشقى اسبوع وهم عم يدفشوا فيني لان كلما ضل الجنين بالرحم اكثر كلما كان احتمال يعيش .. واعطوووني ادوية لايقاف المخاض شي مش بالعقل كثير كثير لدرجة احيانا في ايام كنت اخذ كل عشر دقائق حبة
وبس وصلت عشر ايام بالسابع صار عندي طلق قوي وما عاد وقف … بالليل قرر الاطباء خلص الصبح بدهم يعملوا لي العملية واللي بدو يصير يصير …
طبعا ما كان في احتمال يعيشوا ابدا … سألنا اكبر اطباء الاطفال والنسائية الجراحين والكل يقول احتمال ضئيل جدا جدا …غالبا ما يعيشوا …
وثاني يوم الصبح والله ما انسى هاد الموقف وهي اللحظة المؤلمة ..
اجا الدكتور اللي بدو يعمل لي العملية وطبيب الاطفال المختص عن الاجنة … بعد ما لبسوني للعملية وجهزوني .. اجو ع غرفتي وقالوا لي .. بكل لؤم ولا ومبالاة :

ترى اولادك ما رح يعيشوا .. وانتي لازم تعملي العملية فورا مشان ما يتفجر الرحم …بسبب الطلق … قلتلهم اي ؟؟
قالوا نحن رح نعمل العملية بس من هلأ عم نقلك ما رح يعيشو ..و اول شي بدنا منك هلا تدفعي 50 الف للعملية و تجيبي ابرتين ممكن يحتاجها الاطفال سعرها 50 الف واذا الاولاد اجو عايشين بدهم حاضنة والحاضنة عنا تاخذ عاليوم 12 الف يعني بدك تدفعي ياليوم 24 الف و هلأ سلفا بدنا 100 الف يعني اذا بدك نعمل العملية بدنا هلا 200 الف
و طبعا انا غرفتي اللي قعدوني فيها عم ياخذو عاليوم 6000 ليرة
يعني بدي ابيع حالي فوق كل اللي حطيتو بالزراعة والحمل وكمان بدي حط قده واكثر

انا الزراعة العادية تكلف 350 تقريبا بس انا كلفتني 750 بسبب المضاعفات اللي صارت معي والادوية اللي اخذها اجنبية وغالية …

وقفت بموقف صعب قدام الاطباء وقالولي يلا هلأ قرري معك عشر دقائق مشان نعرف حالنا …قلتلهم ما معي هاد المبلغ … طيب شو اعمل ؟
قالوا دبري حالك روحي عاي مستشفى حكومية ….اي اذا الخاص يا دوب تنفع مع اجنة لسا ما كملوا الشهر السابع كامل لان الرئتين تكون مش مكتملة لسا …احترت وصرت ابكي

وحسيت المستشفى بدهم يتخلصوا مني بس عرفوا ما معي مصاري يكفي … يعني لو عملية لحالها و اجرة المستشفى مش مشكلة بس قال اذا احتاج الاطفال الحواضن حتى يكملوا شهر فيها …. بدي مليون ليرة اجرة بالشهر
حسبنا الله ونعم الوكيل …. اتصلت عاهلي وانا ابكي و ع جوزي و دموعي ما وقفت … وبهي اللحظة تمنيت اني ما زرعت ابدا …

بس اتصلت ع دكتورتي اللي بدرعا قالت لي تعالي لعندي انا بتولى امرك وهم مش اكرم من الله … مش هم اللي يحددوا بعيشوا او لأ … تعالي هلأ
رحت عندها و ضلت تراقيبني و تعطيني ابر تفتح الرئتين كل يوم وخلتني اوكل واتغذا كثير وكل يوم تفحصني … وكل هاد وطبعا ماضل نقطة مي عند الاجنة … بس كانت تفحص اذا النبض شغال …
و تقولي لي انا عم اعمل اللي علي والباقي ع الله وبصراحة ما دام ما في طلق هلأ عم ندفشك بالحمل بس مجرد ما صار طلق لازم اولدك فورا … ادعي لعل الله يمد بعمر ايام حملك ..
كنت اتمنى اشترى الايام مشترى … وكل هي الفترة و النزف شغال والمي ما توقف ..

باستني ع جبيني … وقالت وكلي الله … وبدات عملها ….وبعد ربع ساعة سمعت صوت ضعيف كتير … تفاجأت طلع هاد صوت اولادي … ع فكرة انا ما كنت اعرف شو فيني بالضبط لان كل دكتور قالي شكل و اخر فترة بسبب ان ما في مي ما كان يبين معالج جنس المولود…. حتى وانا تحت العملية قالت لي الممرضة جبتي ولد وبنت … بس طلعت مخربطة

طلعت و شفت صورهم فيديو لانهم كانوا بالحاضنة .. طبعا هي المستشفى خاصة بس ارخص بكتير من هديك اللي بشام
يا الله شو دعيت وشو انبسطت ان الله يوفقهم و يحفظهم ويطول بعمرهم … وجوزي صار يبكي ع التلفون من فرحتو … لانو ما قدر يجي ع المستشفى … من الحواجز الله ينتقم منهم حرمو جوزي يحضر عمليتي ويشوف اولادو اول ما يجو
مرت الايام صعبة كمان رغم فرحتها ..صابني زلال وتجمعت السوائل ببطني و الاطراف … منعوني من اللحمة والحليب فترة .. وانقطع خيط العملية اثناء فكو لان ما قدرت اروح عالطبيبة هي تفكو … حاولت ممرضه تفك القطب بس انقطع ببطني ما عاد طلع

كتير تعبت وتغلبت من القيصرية. طبعا الاولاد ممنوع حدا يبوسهم او يبردوا لان ولدت بالشتوية انا .. وممنوع يشموا عطر ممنوع حدا يقرب منهم مريض …وممنوع ياكلوا ويشبعو مشان ما يزيد الحليب و يدخل عالرئتين .. كنا نطعميهم ب مقدار محدد …بالسنتمتر
مر شهر و خفت اوجاعي وهلأ صار فيي افرح باولادي ,,,كان وواحد حنطي اسمو (وسيم )وواحد ابيض وعيونه زرق كان اسمو (محمد) ..ما شالله عليهم كل من شافهم طار عقلو فيهم قد مو حلوين رغم انهم صغار كثير ..

وبيوم ابني محمد تعب فجاة … بسبب ان دخل الحليب ع الرئتين هاد اللي كان يحذرنا منه الطبيب ..
وعملت عندو التهاب قصبات … ولأنو ابن سبعة اشهر مش ابن تسعة اجا … تعب كثير دخات فيه المستشفى اسبوع … والمستشفى ما فيها اطباء اطفال متخصصينوما فيها شي ابدا .. باردة وما فيها خدمات …مات محمد مات نبض قلبي

كان يشبهني كثير ووسيم يشبه ابوه …

هلا عندي ولد ( وسيم) لكني اصريت ضل يقولولي ام محمد … ع قد ما تعلقت فيه ..

هو الوحيد اللي رضع من صدري و كان يحب ينام ع تختي ,,,ما يغفى غير ع تختي …
اما وسيم ما رضي يرضع مني و لحد هلا بشرب حليب صناعي …

ع فكرة والله صورته ما تروح من بالي وحسيت بجرح كبير بعد ما مات … كل الناس تقول هي عندك واحد تاني… ليش في ام اذا راح ولد بعوضها اخوته ؟؟؟ كل ولد الو معزة بقلب الام …
وكون عندي ثاني ما بعني ان ما زعلت … ولسا ما نسييييييييت
وكلت امري لك يا الله …. انا بطلب من الله بس يعطيني ولد ثاني يكون بشبه محمد تماما …الله يرحمه

المشاركة الأصلية كتبت بواسطة الدرةالعصماء يا حبيبتي والله بكيت من قصتج جدا مؤلمة الله يعينك ويجعل كل ما مر فيج كفارة لذنوبك واجر وعافية يارب والله انقهرت انقهرت جدا ياربي شو هالعذاب كل هذا حتى يصير عندك طفل ؟؟ سبحان الله هاي شوفي احنا اهلنا كبرونا وتعبوا علينا وتالي كل واحد فينا تزوج وصار بعيد عن اهله وهو همه بيته واولاده وعائلته والام والاب الله يصبرهم والله انك صبورة وشجاعة ربي يعوضج بتوم يارب وتفرحي فيهم ..

صباح الخير حبيبتي درة …
الله يسعدك يا رب .. ويرزقك ما راسع ابوابه ما تتمنيين …
الحمد لله على كل حال …
ان شالله عيونك ما تسوف الدمع يا رب .. والحزن
سبحان كل ظروف كانت ضدي وكلشي كنت احصلو بصعوبة شديدة..
بطلب من الله يعوضني …
والله صورته ما تروح منبالي ابدا … خاصة وهو بالمستشفى والرايح والجاي يتعلم فيه واشوفه يتعذب وكنت لحالي حتى ما قدر حدا من اهلي او جوزي يكون جنبي بهي اللحظات … و جرح القيصرية ع البرد يؤلمني و اركض بالمستشفى ركض شي ع مختبر شي ادور ع دكتور … وما الاقي واذا لقيت يكون اختصاص ثاني

الله مجنني ان الممرضات بس يشوفوني ابكي يقولي انتي ليش زعلانة شو ما حدا عندو اولاد غيرك ..تخيلوا.
وكأنو الناس ماتت من قلبها الرحمة …. وكأنو اذا نحن بحري وشباب عم تموت لازم ما ازعل عابني يعني هو مش انسان وقطعة مني …
كنت اقعد قدامو كل اللليل والنهار اراقبو مشان ما يصير نقص اكسجين او يتغير لونه يصير شاحب …مجرد ما يتغير لونه لازم فورا كماما اكسجين …
تورمت رجلي التنتين من قعدة الكرسي و جرح القيصرية يوجعني قلت للمرضة مشان الله اني تعبت ماعاد اقدر طيب مو انتي ممرضة قسم الحواضن قالت ما دخلني هاد مو شغلي تصطفلي

وراحت تقلي بيض وتتعشى هي ورفقاتها ههههههههه
بعين الله …