كيفكم يا بنات حبيت انقللكم قصتي بالحمل الاول والرحلة الصعبة.تزوجت وعمري 17 وكنت بدرس ثانوية عامة يعني ما كنت افكر بالحمل .كان نفسي بس الافضل انه بعد اخلص الدراسة.خلصت الثانوية العامة وما صار حمل وبعدها بدأت افكر بالموضوع.زوجي كان وحيد لاهله يعني نفسهم يفرحوا فيه وباولاده مرت اول سنة والتانية والتالتة.وبعدين فكرنا نروح على دكتور نصحونا بمستشفى خاص بالاردن بقوله انه شاطر كتير.سافرنا عالاردن عند اقارب زوجي وبدأنا المشوار كان كل شي تمام الفحوصات وما في مشاكل صعبة الحمد لله.لكن لهفتنا للذرية واستعجالنا قررنا نختصر الطريق ونعمل اطفال انابيب بدأت اخد الابر كل يوم حسيت جسمي تخرم ولكن كله يهون .وقررنا عملية سحب البويضات وكنت خايفة كتير لانه اول مرة اعمل عمليه وكلت امري لله كان زوجي وزوجة عمه معي.بس منعوهم يدخلوا عندي وزاد توتري.المهم عملوا العملية خلال 15 دقيقة سحبوا مني 18 بويضة. ولما صحيت من البنج كنت تعبانة كتير ضليت نص نهار بالمشفى وزوجي بنطر بالاستراحة تكسروا رجليه مسكين.وبعد 4 ايام اتصلوا وحكو انه بكرة نيجي نرجع الاجنة وانه الاجنة وضعها ممتاز.رحنا تاني يوم ورجعولي 4 اجنة وكنت مطمنة كتير بقيت بالفراش اسبوعين ما اتحرك الا قليل كتير وكان عندي الامل كبير وتفائل.بعد 12 يوم نزل افرازات لونها بني خفت اتصلت على الدكتور قاللي بإذن الله علامة حمل.وحماتي كمان حكتلي انه وحدة لما حملت نزل عليها دم يعني علامة حمل,هيك صار عندي الاحتمال 90%اني حامل ورحت افحص وانا مبسوطة كتير ومتفائلة كتير.وبكل فخر قلت للمختبر اعمل فحص حمل اول مرة اعيش هاد الشعور.عملت الفحص بمختبر المستشفى وطلعت عند الاستراحة استنى كل 5 دقايق احسب وانظر للساعة مرت ساعة ونص وانا استنى وبعدين نادوا اسمي ورحت على غرفة الدكتور وتاخرت وانا بستنى اعصابي انهارت بدي اسمع كلمة مبروك انتي حامل.بعد فترة انتظار عصيبة اجت الدكتورة. مو الدكتور اللي عالجني , شافت الفحص وانا قلبي صار بالارض بدي اسمع كلمة مبروك وفجأة صعقتني بتقول ما في حمل.وقتها الدنيا اسودت بوجهي وكأنه حدا ضربني كفين او حتى قتلني.بتقول الدكتورة انا مستغربة انه ما زبطت ملفك كتير ممتاز والاجنة كتير ممتازة انا كتير مستغربة.رجعت عالبيت وعيوني بالارض وانا حابسة الدمعة زوجي بيتطلع علي ما بدي يشوف دموعي .تمنيت لو الارض تنشق وتبلعني.وصلنا البيت وعيوني بالارض وما بدي اشوف حدا يسالني شي او يحكي معي شي.مشيت على غرفتي بدون ما ارفع راسي او ارد السلام على الموجودين
.سكرت الباب وحبست نفسي بالغرفة وانا ببكي واي حدا بفوت بعمل نفسي نايمة المهم اخدني زوجي نتعشى بره حتى ينسيني وهو بكابر وحابس حزنه.مرت الايام وحكى الدكتور في اجنة مجمدة بدنا نرجعها رجعنا الاجنة بس هالمرة ما نمت بالسرير متل اول مرة ….كنت اروح و اجي واطلع وعادي ولا كأنه في شي نفس الشي عدوا الاسبوعين وكان عندي الامل ضعيف لانه الاجنة مجمدة .ونفس الشي عملت الفحص وانطر كل 5 دقايق انظر للساعة بالرغم انه كان الامل ضعيف بالنسبة لي بس كان في شوية امل . دخلنا عند الدكتور والنتيجة متل ما توقعت ما في حمل.ونفس الحالة اللي عشتها المرة الاولى عشتها بالمرة التانية.حكى الدكتور نصيحتي ارجعوا لبلدكم واستنوا الحمل يصير طبيعي.فكروا بالموضوع واحكوا معي.انا طلبت من زوجي ارجع لبلدنا وما بدي اكمل.بس هو رفض يرجع لاهله بدون ما يحقق امنيتهم.وكان قراري انه اخر مرة وبعدها شو ما كانت النتيجة ارجع.عملت العملية المرة التانية.ورجعت الاجنة المرة التالتة عمللي ثقب بالرحم وقاللي الدكتور بإذن الله انتي من الحوامل وقبل هالمرة لما كنت اراجع عنده قاللي نفس الجملة.هالمرة الدكتور متفائل كتير.بس انا ما بدي ازرع نفس الامل ووكلت امري لله وعشت اسبوعين كأنهم سنتين.متل المرة الاولى نزل افرازات بنية ولما شفتها انهرت وفقدت الامل وحكيت مع الدكتور وغير وصفة المثبت وراحت الافرازات .ورحت اعمل الفحص كان معي بنت عم زوجي ووالدتها.زوجي رفض ييجي .قال بلكي وجهه نحس؟؟هههههههههههه.وعملت الفحص وبدأت كالعادة انتظر هالمرة انتظرت 15 دقيقة وبعدين اجى الدكتور .انا فكرت انه بكلم حد من المراجعين ما اعطيت اي اهتمام وصرت اقرا المجلة.وبنت عمه بتقولي فلانة انتي حامل.بقولها لا .بتقولي ولك انتي حامل شوفي الدكتور.انا ما صدقت اتطلعت على الدكتور بيعمل هيك
.انا كل جسمي صار يرجف ومو مصدقة رحنا لعند الدكتور وباركلنا وانا لسا مو مصدقة قشعريرة في كل جسمي.
ولما رجعت البيت كان الكل يستنى فينا حتى عم زوجي رجع من شغله من الفرحة.ورجعت بلدنا بعد 4 اشهر من الحمل وكان الوضع ممتاز .وحكالنا الدكتور اني حامل ببنوتة.هي قصتي ومشواري بالحمل طبعا عدا عن الضغوط النفسية اول شي اني بعيدة عن بيتي يعني مو اخدة راحتي وبعيدة عن اهلي اللي كان ممكن يخففوا عني كتير واكيييييييد ومعروف القيل والقال والاشاعات اللي اصدروها عننا والمشاكل اللي تألفت ونظرة الشفقة بعيون الناس حسسوني اني ما رح احمل ابدا وكلام الناس وعيون الناس ونظرات الناس اااه على كل حال الحمد لله الله جبر خاطرنا وما شممت فينا حدا.وبإذن الله يرزق كل منتظرة يا رب وبدون عناء . وانشالله رح اكتب قصة ولادتي لانها كمان كانت صعبة…..انا تعبت كتير وانا بكتب .عشان هيك بدي ردود حلوة متلكم.استودعكم الله.
ربي يخليكم لبعض وعقبال ماتجيبيلها اخو ☺
والله يرزق كل من تتمنى الذريه الصالحه عاجلاً غير آجل يااااااارب العالمين
ربي يرزقك كل منتظررررررررررررة يارب
الله يحميها وتشوفيها عروسة
مافي شي بيجي بالسهل
بس الصعب له حلاوة خاصة.. تقبلي مروري