اي امرأة لما تتزوج بتحلم تسمع كلمة حامل
و لما تفوتها الدورة الشهرية كم يوم بتبدا تشك انو في حمل و بتستنى كم يوم لتتأكد و لتعرف انها حامل بتكون صارت بالشهر التاني
حلو كتير راح من طريقها شهر من تسع شهور العذاب
اما انا ف قصتي غير انا بقيت استنى اسمع كلمة حامل اربع سنين و ما خليت طريقة تعتب عليي بس بعد عذاب طويل كنت عم عد لحملي من اول يوم يعني من يوم الالقاح؟؟؟؟ حلو الواحد يعرف بأي جماع رح يصير الحمل …..بس انا حملت بدون جماع ….خخخخخخخخخخخ نكتة حلوة ما
حلو ….!!!!! لا ما حلو لانو رح يزيدو ايام الانتظار ….و العيش عالاعصاب لوقت النتيجة …..
هل انا حامل بعد كل هالعذاب ام لا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عملت شوية سسبنس و تشويق …………..انشالله ما تكونوا مليتو
عم احكي باللغة العامية لاني بحس الفصحى كتير جدية و هيك بتسمعو قصتي كأني انا عم احكيها قدامكون
كيف حملت بدون جماع؟؟؟؟ سؤال وجيه : الاجابة اني حملت بعملية الحقن المجهري
و ما رح ادخل بتفاصيل لاني سبق و ذكرت قصتي بس للي ما بيعرفها باختصار شديد
انا متزوجة طبعا اكيد …..هاد احد شروط المسابقة خخخخخخ و بعد 4 سنين و 3 اشهر قررت اعمل حقن مجهري لاسمع كلمة ماما السبب بعدم الحمل الطبيعي هو ضعف بحركة النطاف
الحمدلله زبطت من اول مرة و بديت مرحلة الخوف و العذاب بعد اخد تقريبا فوق ال50 ابرة و منهون ابر هرمون هاد غير الادوية
طبعا مارح احكي عن ابر التجهيز للعملية رح احكي عن الابر و الادوية من يوم الالقاح و بعد
يوم الالقاح او ترجيع الاجنة رجع لجسمي اربع اجنة و كان لازم ابقى متسطحة 5 ايام ع ضهري بس لا يمين و لا يسار و ممنوعة الحركة تماما لانو اول 5 ايام هي ايام التعشيش
و بقيت نام ع ضهري كل اليوم ما قوم الا للحمام و الصلاة و صلي انا و قاعدة
وما تحممت الا بعد اسبوع و بماء فاتر مو سخن كتير لانو المرأة الحامل ما لازم تتعرض لماء ساخن لانو بيزيد من ضخ الدم بالجسم و يمكن يأثر عالجنين… بعد اليوم الخامس يعني صباح اليوم السادس اجتني نوبات برد و سخونة و صرت ابكي لانو انا كل ما بتجيني هي النوبات بتجيني الدورة بعد اسبوع و كنت بعرف انو كل اعراض الدورة متل الحمل الا نوبات البرد و السخونة يعني دورة
بعد خامس يوم صار ممكن المشي الخفيف بالبيت و النوم على الطرف الايمن او الايسر و صارت تجيني هبات حرارة خلال اليوم ما مزعجة بس حس جسمي حمي لفترة و بعدها تروح باليوم السابع حسيت بألم بالبطن نفس الم الدورة و الم بالضهر لا يحتمل و كنت كل يوم اقرا الرقية الشرعية للاسقاط و بعد خامس يوم اتوكلت على الله و صرت صلي عادي
باليوم التامن استمرت المعاناة من الام الضهر مع قلة شهية و احساس بالوهن الشديد بس كنت كل الوقت عم قول انو هاد مو وحام مجرد تعب و ما بدي اتوهم حتى ما انصدم بعدين
اما عن موضوع الاكل بهي الفترة كنت حاول اكل اكل مفيد و بس بدون فاست فود و اكلت كتير خيار و خس لانون بيثبتو الاجنة مع اني حسيت حالي شبه الخاروف بس معلش
و اهم شي حليب حليب حليب و كتير ماء – جبنة عربي مو مثلثات و دهن لا –لبن –بيض –فواكه-لحم بكل انواعه و خاصة السمك و بعدت عن الشوكولا و التمر و القرفة و الكمون و اي شي بيسبب مغص او اسهال شديد و كان لازم ضل بعيدة عن الامساك بس شرب الحليب كان كفيل بهاد الشي
و البعد عن اي شي نيء و خاصة البيض لانو بيعمل ليستيريا او اي لحم مو مطبوخ منيح
لاحظت بهي الفترة انو معدتي صارت كتير حساسة و توجعني ع اهون سبب وصرت ابرد كتير كل الوقت بردانة مع اني البس كتير و قبل ب 4 ايام من التحليل صرت اتدايق من طعمة معجون الاسنان مع اني كل عمري بستعملو و حس شو ما اكلت ما تروح طعمتو من تمي بس يعني بهي الفترة كان بس الاكل الصحي يعني نقرشات و عصاير صناعية و شيبس و كولا و اندومي و فاست فود كلو ممنوع عندي
اجا يوم التحليل يوم 20242016 و رحت عالمركز و اخدوا عينة دم لاجراء فحص الحمل و قالولي اني حامل و الحمدلله و قالوا انو نسبة الهرمون عالية كانت 512 و عالغالب حامل بتوأم و بعدها ما عدت افهم شي و صرت ابكي و طلب الدكتور مني المتابعة بنفس الادوية اللي هي ابرتحت الجلد مميعة للدم لتوصل الغذاء للاجنة اسمها كليكسين و كان الي 15 يوم عم اخد منها من يوم الالقاح و ابر تثبيت كل 3 ايام hyprogen وحبة كل يوم من ادافول – حمض الفوليك و كمان حب مميع للدم اسمه ميني سبيرين و كنت عم اخد مقوي اسمه ادافيت ام … و مراجعتهم بعد 10 ايام يعني بيكون تاريخ 30112016لاعرف كم جنين معي
طبعا هي الاعراض كلها قبل التحليل يعني تفاصيل زيادة عن الحمل الطبيعي
و بقيت تابع بالادوية كلها و صرت اشعر بفقدان شهية واحيانا الم بالبطن متل الدورة و قلي الدكتور هاد تعشيش و بعدها صار يجيني صداع قوي كتير و يزيد وجع الضهر
قبل 5 ايام من موعد معرفة عدد الاجنة صار معي نزف و استمر ل 3 ايام وبقيت متسطحة ع ضهري بس لوقت موعد الدكتور رحت بتاريخ 30 11 و طمني الدكتور و طلع معي كيسين حمل وضعون ممتاز يعني معي توأم وقفت الابر المميعة و بقيت اخد ابر التثبيت كل 3 ايام و الادافول و الميني سبيرين و الادافيت ام و طلب مني الدكتور راجعه بعد 15 يوم و قلي انو كل 30 الشهر بدخل شهر جديد يعني كنت مخلصة الشهر الاول
دخلنا بالشهر التاني و اجا وحامي عالنوم نومممممممممممممم بس مو ايا نوم يعني اتخيلوا نام الساعة 12 بالليل و اقعد 1 الضهر و ارجع نام ساعتين العصر بس المشكلة ابقى نعسانة و بدي نام 
معجون الاسنان مشكلتي كل ما فرشي اسناني استفرغ بعدها و غيرت انواع و طعمات للمعجون و ما مشي الحال
و صرت اكل ليمون و حامض شوفون بعيوني و اتخيلون قدامي و حس طعمتون بتمي و اكل منون كتير
و بعدها بديت مشاكل الامساك …. انا من قبل ما احمل عندي دائما مشكلة الامساك كيف بعد الحمل
كان قبل ينفعني الحليب الطبيعي و السلطة و عصير البرتقال بس بعد الحمل ع كتر ما صرت اشرب حليب ما عاد ينفعني شي و ما يعملي الا نفخة و غازات
و المشكلة انو المثانة وقت الحمل بتصير اصغر و بتضغط عالرحم و بيصير عدد مرات التبوال اكتر بكتير من قبل ف كيف اذا في امساك كمان…………!!!!!!!!!!!
بعدها لقيت الحل …..الشوندر المسلوق غني بالالياف و تأثيره يجنن و القهوة المبيضة المحلاة نسكافه 3 ب 1 عالريق …..وووووااااااااااووووووووو
حلتلي ازمتي
اجا وقت زيارة الدكتور و كنت بنصف الشهر التاني بتاريخ 14122016 لما انصدمت اني فقدت جنين و بقي واحد بس وقلي الدكتور انو ضمر واحد ع حساب واحد وهيك احسن للجنين كنت رح اننفجر من البكي قدام الدكتور بعدين مسكت حالي و قلت الحمدلله و سمعت نبض الجنين و عطاني صورة لالو مع انو مو مبين فيها شي الا نقطة و خط صغير تحتها بس طار عقلي فيها
كنت كل يوم اتفرج عليها لساعات و حط ايدي ع بطني و احكي مع ابني متل المجانين… بس شعور كتير حلو لما بحس شي عايش فيني و كنت كل يوم ادعي ربي يحفظلي ياه و كان قلبي مقطوع ما روح المرة الجاية عالدكتور و يقلي ماعاد في ولا حدا
استمريت بنفس الادوية بس ابر التثبيت صارو ابرة كل 5 ايام و كان وزني زايد كيلو يعني صرت 63 مع انو طولي 174 و ضغطي كان طبيعي
طبعا كل هي الفترة كنت مرتاحة تماما يعني ما اجلي كاسة بالبيت و انا ببلد و زوجي ببلد و تاركة شغلي و قاعدة عند اهلي حتى ما اعمل ولا شي و كل الوقت مرتاحة و متسطحة و كنت مستمرة بالاكل الصحي و بس و ما اطلع برا البيت ابدا الا لعند الدكتور يعني درج و روحات و جيات مافي حبس نظامي
اكلة اكلتها و خلتني استفرغ ؟؟؟؟؟؟؟؟؟؟ السبانخ مع اني بمووووت فيها بس يمكن لانو الحديد فيها مركز دبحتني و صار معي منها لعية نفس قوية و استفرغت كل اليوم منها
اعراض جديدة بديت معي دوخة و انخفاض ضغط مفاجئ و احيانا كنت اوقع عالارض و صرت انتبه اكتر انا و عم قوم و كترت كمية اكلي و كان عندي وجبة فواكه اساسية
كل يوم طبعا شرب المي كان اساسي عندي اقل شي كنت اشرب ليتر ونص باليوم
اما عن حبوب الفيتامين اللي كنت عم اخدوا ما كان يسببلي فتح للشهية لا عادي بس كان يزيد شعر جسمي بشكل مو طبيعي ف قررت وقفوا و يا ريتني ما قررت صار جسمي يرجف و زادت الدوخة و صار عندي سواد حول عيوني ف رجعت اخد منون
اما عن شعري اثناء الحمل……….اخخخخخخخخ
بعمري و حياتي ما شفت شعري هيك انا شعري من النوع السبل و دائما حيوي و بهتم فيه كتير و لمعته تجنن و طويل و الحمدلله كتير
بس هلأ ….!!! صاير كلو متقصف و باهت وعم يتساقط و ناشف و قصيتو ورجع قصف من جديد و الله حاسستو مو شعري
حتى بشرتي كتير متغيرة و نشفانة و صاير عندي شعر عالبطن بس كلو يهون فدى سلامة الجنين يعني اجمالا حاسة حالي كتير متبشعة
اما عن اوجاع الضهر و الصداع كانت تجيني نوبات صداع موت منها تستمر احيانا يومين متواصلين و حس كأنو مطرقة عم تضرب راسي بس ما اخد و لا دوا و ارتحت ع الليمون اعمل عصير ليمون يرتاح وجع راسي
و لما كنت اقعد من النوم كون دايخة كتير و جسمي عم يرجف بدي اكل لحتى اكل اصحى شوي و ما عود ارجف بس كل ما جوع هيك يصير فيني
صرت اشتهي عالزيتون كتير و بيقولوا اللي بتشتهي ع الزيتون بيكون عندها نقص ملح و صرت كل يوم جيب صحن زيتون و اقعد اكل فيه
و عالبردات اللي عنا كنت اتجنب كتير اني امرض بس الله كتبلي اني امرض و صار معي زكام قوي و طبعا ادوية مافي ف استعنت بعصير الليمون و وجبة حمضيات كل يوم و مشروبات سخنة شاي او زهورات …و الحمدلله اتحسنت
اما عن الخوف من تشقق البطن كنت كل ما اتحمم ادهن كل الاماكن المتوقع انها تتشقق بزيت زيتون يعني الارداف و البطن حتى صدري و فخادي و اتركها شي 10 دقايق ع جسمي و بعدها اتحمم و بعد ما اطلع من الحمام ادهنها بلوشن للجسم و انشالله تنفع هالطريقة و ما يشقق جسمي كتير
و دخلت بالشهر التالت و كنت لسا محبوسة بالبيت و رحت عالدكتور بعد ما مر اسبوع على دخول الشهر التالت بتاريخ 612016 و هون اتفاجأت…….!!!!!!!!!!!!!!!!
ما صدقت صورة الولد عالايكو كان كبير كتير عن ال3 اسابيع اللي مضيو و كل جسمو واضح راس و جسم و رجلين و ايدين و كان ما عم يهدا كل الوقت عم يتحرك و كأنو راكب ع بسكليت
سالت الدكتور اننو كيف كبر كل هالشي قلي انو بهاد الوقت كل يوم بيكبر فيه عن اليوم اللي قبلو و كان زوجي معي لاول مرة و جاية لنسافر سوا بعد 15 يوم سالت الدكتور اذا فيي سافر سمحلي سافر بس قلي اجي لعندو قبل بيوم ليجهزني للسفر و سألتو عن ابر التثبيت اذا لازم ابقى عليها قلي خدي 4 كل 5 ايام وحدة 2 قبل السفر و 2 بعد السفر و باقي الادوية ابقى عليها وزني زاد 2 كيلو عن المرة الماضية و صار 65 كيلو و ضغط دمي كان 106 نازل شوي
طبعا فرحت كتيراني رح اقدر سافر و جيت من بيت اهلي ع بيتي و بيتي كان تاني طابق و مافي مصعد اما عند اهلي ف ما كان في مشكلة لانو في مصعد
و استقويت بحالي و قلت مادام سمحلي الدكتور سافر صار فيني عيش حياتي طبيعي و صرت كل يوم روح واجي و اطلع و انزل ع مهلي عالدرج و بعد 3 ايام من زيارة الدكتور كان عندي ابرة تثبيت اخدتها قريب الساعة 12 بالليل
ورجعت عالبيت و نمت …..بالليل قعدت من النوم عصلاة الصبح و كان بتاريخ 101 2024 و كنت بدي روح عالحمام و العفو منكون انا و عم نشف من تحت اتطلعت عالمحرمة و اذ كلها لون بني غامق ……….للحظة ما عاد اعرف شو صاير قمت من عالتواليت و اتطلعت لقيت نقطة كبيرة سميكة غامقة بالسفل………..و عقلي ما عاد يتحمل و ما بين عليي لونها اذا بني او احمر قاتم و قلت اكيد اجهضت
و رجعت عالتخت متل المجنونة و انا حاطة ايدي ع بطني و عم ابكي و قلت خلص راح كل تعبي و راح الجنين و صرت لوم حالي ليش بآخر 3 ايام ما ارتحت و ضليت اشتغل بالبيت و اطلع مشاوير
حس عليي زوجي و صار يهديني و يقلي صلي عالنبي و انو مو هيك الاجهاض و سألني اذا عم توجعني بطني او ضهري قلتلو و لا شي بعدين رجع قلي زوجي مستحيل يكون هاد اجهاض لانو الجنين اصلا تخلق و هو اكبر من هيك و صار يقلي اقري قرآن و نامي و الصبح بكير بنروح عالدكتور و صرت كل الليل عم ادعي و ما عاد استرجي روح عالحمام و خاف ينزل الولد و ما قدرت نام كل الليل و بقيت كل الليل متسطحة ع ضهري
الصبح بكير رحت عالمركز و شفت الدكتور و كنت منهارة و قلي ما تخافي مادام ما عدت شفت دم و لون الدم بني انشالله مافي خوف و عرضية و قلي لما يصير اجهاض بيكون الدم احمر قاني و بيضل ينزل كتير و بيصير عندك وجع بطن قوي كتير و فحصني و قلي الحمدلله كلو تمام و سمعني صوت نبض قلب الجنين بس كان الجنين ما عم يتحرك و خفت كتير بعد ثواني اتحرك و اتطمن قلبي
طبعا مصادفة ابرة التثبيت قبل بيوم ساعدت كتير و قلي الدكتور انو هي من التعب و قلي راحة تامة و منعني من السفر حتى اشعار اخر
اما عن الادوية ادافول و ادافيت بقيت عليهون اما الميني سبيرين اللي هو مميع للدم وقفلي ياه و عطاني فورا ابرة عندو بالمركز بس ما بعرف شو اسمها هي عالغالب مضادة للتشنجات و مثبتة و عطاني دوا جديد اسمه utrosterone عيار 100 وكان كل يوم لازم اخد حبتين منو وحدة الصبح و وحدة المسا حبات فموية بس هنن في الواحد ياخدون فمويات او مهبليات وهو دوا لمعالجة اضطرابات البروجستيرون و عطاني غيرو تحاميل شرجية عند الضرورة و قلي بس بنفس اليوم اخد وحدة الصبح و وحدة المسا اسمها باراسين و هنن مضاد للتشنج و مسكن لالام المغص و مسكن للالم و قلي لما بحس بمغص او وجع ضهر قوي اخد وحدة عند اللزوم
و قلي راجعو باول الشهر لانو ع اول الشهر الرابع بدو يغيرلي الادوية و يوقفلي الادافول وبيصير لازم اخد حبة كالسيوم كل يوم واسم الدوا osteocare ونوع مقوي تاني فيه حديد و فوليك اسيد و زنك و فيتامين ب و اسمه ميغا-فيت-اي اف زد
رجعت عالبيت و ارتحت و ما عاد اتحركت كل الوقت متسطحة و تاني يوم شفت الصبح نقطتين دم بني بس فاتح كتيرو بعدها ما عدت شفت شي الحمدلله و ع حظي الحلو يومها جاب زوجي اكل جاهز وانا معدتي كتير حساسة للاكل الجاهز ف تسممت
صار معي مغص قوي كتير و اسهال مو طبيعي و حس بلعية و بدي استفرغ بس ما قدرت استفرغ و ماعاد اعرف شو ساوي عملت فنجان شاي بدون سكر و تقيل ليخفف المغص و الاسهال بعدين اتذكرت التحاميل و اخدت وحدة و الحمدلله باقل من نص ساعة ارتحت عليها كتير و عملت حمية للاكل و صرت اكل بطاطا مسلوقة و لبن و بس و الحمدلله تاني يوم اتحسنت كتير و كان تاريخ 1212016 حسيت لاول مرة بحركة الجنين ببطني و طار عقلي من الفرح و سألت الدكتور قلي اي ممكن تحسي بحركتو لانو جسمي نحيف وهلأ بحس كتير عليه عم يتحرك خاصة لما بكون متسطحة ع ضهري
و الحمدلله هلأ وضعي مستقر و رجعت للراحة التامة و لحد الان عم تجيني نوبات صداع احيانا بتستمر ل 3 ايام متواصلة و دائما بشعر ببرد كتير مع انو كل اللي حواليي بيقولوا ما في برد و صار شو ما البس يقولولي لابسة الخزانة و جاية و زايدة الدوخة كتيررررررررر و هلأ باقيلي كم يوم و بدخل بالشهر الرابع و الله يتمم اشهر حملي ع خير لاني رح ابقى كل حملي عايشة ع اعصابي و الله يحميلي الجنين و يتمم حملي ع خير لاني حاسة مارح شوفو الا عيوني رح تطلع و الحمدلله ع كل حال
انشالله يكون تقريري دقيق و نال الاعجاب وادعولي يتمم حملي و يرزقني بالذرية الصالحة الي و لكل حامل او محرومة امين يا رب العالمين
سلام يا حلوين
اتمنى لك كل التوفيق والحظ السعيد في هذة المسابقه
تحيتـــــي
بس حابه انصحك بأنك لا تشربي النسكافيه لأنه اكثر شيء مضر للحامل وخصوصا للي مثل حالاتنا
الي بنحمل من غير جماع هههههههههههه
لما حملت عن طريق الحقن المجهري اول شيء حذرني منه دكتوري هو النسكافيه
أتمنى لك التوفيق بالمسابقه
نم التقييم
اما عن الصور فالطريقة تشرح بس عن الصور اللي هي بالاصل موجودة برابط نت و انا الصور عندي موجودة ع جهاز الكمبيوتر ف شو الطريقة يا ريت تساعديني
بالتوووفيق
موفقة حبيبتي
موفقة حبيبتي