السلام عليكم و رحمة الله و بركاته
كل صيف وانتوا طيبين وبمناسبة الصيف من الاسبوع ده ولغاية رمضان ان شاء الله هنزل وصفة ايس كريم كل اسبوع والمرة دى عملت بسكوتة الايس كريم فى البيت بطريقة سهلة جداااااااااااااا الكل يقدر يعملها وانا معنديش ماكينة الأيس كريم ومفيش اى مشاكل بعمل كل انواع الايس كريم وبتطلع احلى من الجاهز
مكونات البسكوتة:(اخدت مكوناتها وطريقتها من الشيف/أسامة السيد)
ربع كوب زبدة سايحة
نصف كوب سكر بودرة
2 بياض بيض
فانيليا
نصف كوب دقيق
مكونات ايس كريم الليمون:
بشر 2 ليمونة
كوب الا ربع سكر
نصف كوب عصير ليمون
كوب فريش كريم
كوب حليب
فانيليا
ملعقة كبيرة عسل جلوكوز (ممكن نستبدلها بعسل نحل)
الطريقة
اول حاجة بالنسبة للبسكوت
فى اناء هنحط السكر البودرة والزبدة السايحة
ونضربهم بمضرب البيض
ونضيفلهم بياض البيض والفانيليا
ونضربهم مرة تانية
واخر حاجة نضيفلهم الدقيق وبسكويت الايس كريم مفيهوش بيكنج بودر طبعا
ونضربهم بالمضرب لغاية ماتمتزج المكونات
وفى مقلاة تيفال هنحط نقطة زيت وناخد معلقة كبيرة من عجينة البسكوت نشكلها على شكل دايرة
وممكن نكبر حجمها حسب رغبتنا
هندخلها فرن متوسط الحرارة وبمجرد ان الاطراف تحمر هنطلعها من الفرن عشان نعرف نشكلها وهى سخنة
واول مايطلع وهو سخن هنحطه على ظهر كوب عشان يدينا شكل جميل ساعة التقديم
وممكن نلفه على شكل كورن وهينشف بعد التشكيل فى اقل من ربع ساعة
وبالنسبة لأيس كريم الليمون فى الفود بروسيسور هنحط عصير الليمون وبشر الليمون
والسكر وعسل الجلوكوز
والحليب والفانيليا
والفريش كريم
ونشغل عليهم على أقصى سرعة لغاية ماتمتزج المكونات والخليط يغلظ وهنحطه فى علبة محكمة الغلق
وممكن نعمل كل الخطوات دى فى الخلاط مش لازم فى الفود بروسيسور
ونقلبه كل 3 ساعات عشان ميكونش كتل تلجية
ونقدمه تانى يوم بعد مايكون جمد وزينته ببشر الليمون وده شكله النهائى مع البسكوته اللى عملناها
وبالهنا والشفا