السلام عليكم يابنات سيدتي
القصه مره اعجبتني وفكرت انزلها على شكل اجزاء واتمنى نستمتع مع بعض بالقصه
الجزء الاول
كانت منيره جالسه بغرفتها ومتململه الوقت بالكاد يمر وماعندها اي شغله تقدر تلهي نفسها فيها
اهل البيت كلهم حاضرين زواج بنت خالهم اللي كان شبه عائلي
الساعه تشير للحادية عشر اتصلت على زوجها
منيره: هلا خالد
خالد: هلا وش عندك بسرعه الرجال بيدخلون عالعشاء
منيره: اممم بتصل على سواق اهلي بروح وسع صدري عندهم ومرني وانت راجع البيت
خالد: اوك روحي ويمكن اتاخر عليك بعد لان بطلع بعد العرس للاستراحه
منيره: اوك فمان الله انتبه لنفسك
وسكرت منيره الخط وجهزت نفسها وراحت لبيت اهلها
كانت امها موجوده وزوجة اخوها الوحيد وجلست معهم انبسطت وتعشت معهم وغيرت جو
الساعه ثلاث الفجر دق جوال منيره
منيره: هلا حبيبي
خالد: هلا منور جاييك خليك جاهزه
منيره:جاهزه ياقلبي استناك
طلعت منيره من بيت اهلها وركبت مع زوجها بالسياره وجلست تسأل كعادة الحريم عن الزواج ومن حضر وعن اهل العريس وماقصر خالد اشبع فضولها وجاوبها وعطاها التفصيل الممل
دخل خالد زوجته البيت وكانت امه جالسه بالصاله
ام خالد: هلا يابوي حياكم الله تعالو اجلسو معي شوي
دخل خالد زوجته وجلسو مع امه وسوالف الى وجه الفجر
اذن الفجر طلع خالد يصلي وبقت ام خالد ومنيره
ام خالد: والله اهل العريس باين عليهم اجواد وناس اخلاق ومشاءالله بناتهم كثار ولبسهم ساتر ودي اخطب لسعد منهم حتى اماني مدحت فيهم وجلست عالعشاء مع بناتهم وتقول مره ناس جويديين
منيره: الله يوفقه سعد على كثر ماخطبتو له الى الان مااعجبه احد
ام خالد: والله يابنيتي ياخوفي يطيح له في وحده معيوبه على كثرت شروطه ناس كثار خطبنا منهم واجواد بس له مواصفات ومايعجبه العجب
منيره: الله يسخر له يارب ويرزقه على قد نيته
ام خالد: الله يوفقك يابنيتي ويرزقك على نيتك والله بنات هالزمن معد ينفعن وعجايب تنشاف منهم وين اللي مثلك وشرواك
منيره: شرواك الطيب خالتي وهو طيب وبيرزقه ربي على نيته
ام خالد: يالله ياكريم
الناس اللي خذت منهم بنت خالك اجواد ومحافظين وان شاءاله ان بغيتك عندهم
حتى اعجبو اختك اماني كلمها واستفسر منها
سعد: والله يايمه انا قبل الجمال يهمني تكون البنت اخلاق
ام خالد: ياوليدي وهالعئله ماعليهم قاصر اخلاص نحسبهم والله حسيبهم
سعد: تشاوري انتي واماني وراييكم فيه الكفايه
تتصل الام على بنتها اماني واللي تسكن في قريه قريبه من الرياض وتشاور معها عن العروس ويتوصلون لانهم ياخذون من نفس عائلة عريس بنت خالهم
تدبر الام الرقم وتتصل عليهم وتحدد موعد تشوف فيه العروس
وتتصل الام على اماني تجهز نفسها بحيث انها تكون بالرياض بنفس اليوم طبعا اماني هي البنت الوحيده لاام خالد ومتزوجه ولد عمها وساكنه برى الرياض في قريه قريبه
في نفس اليوم تحضر الام نفسها واماني جت من القريه واتصلو على اهل العروس خذو وصف البيت وراحو مع السايق لبيت اهل العروس
ضيفوهم بمجلس الضيوف وطلعت لهم البنت الي جايين يخطبونها
كانت ناعمه طويله وبيضاء مثل ماورد في مواصفات سعد لابسه لبس ناعم وذوق وساتر وحاطه مييك اب خفيف ومسوييه شعرها سترييت
نالت اعجاب الام واماني وطلعو واعدو الام انها تسمع منهم اخبار زينه واتفقو يشوفون اليوم المناسب لسعد يجي يشوف عروسته
رجعو البيت وجلسو اماني وامها مع سعد ووصفو له البنت وكانت اكثر بنت قريبه للمواصفات اللي يبيها سعد
كأن سعد شبه مقنع بالبنت ووصى امه تاخذ موعد يشوف البنت فييه
جلست ام خالد واماني ومنيره بالمجلس يسولفون ويتشاورون وقالو لمنيره انهم رايحيين اليوم يشوفون عروس لسعد طبعا منيره يعدونها وحده منهم وفيهم اولا لانها بنت عمهم ثانيا لانها فارضه نفسها عليهم باخلاقها واحترامها لهم ومر على زواجها من خالد خمس سنين ومابين حمل على مر هالسنيين
وراح لبيت اهل العروس وكان والدها باستقباله
جلس مع الاب وساله عن بعض مايتعلق بعمله وغيره واثناء ماسعد وابو العروس مندمجين بالسوالف
حس سعد بدخول احد للمجلس
حس بارتباك وتلبك بالكلام وكأنه اول مره يشوف بنت للخطبه
هيام وبحياء : السلام عليكم وكان صوتها بالكاد ينسمع
التفت سعد وعليكم السلام
انبهر سعد بطلتها كانت غير كل البنات اللي تقدم لهم كانت لابسه تنوره طويله سوداء
وبلوزه اوف وايت ناعمه وبكم طويل
وشعرها مسرح بشكل ناعم ومكياجها ناعم جدا وكانها مو حاطه شيء
جلست خمس دقايق وكان باين عليها مستحيه وحتى مارفعت راسها ابدا ولاشافت ملامحه
هذي الاشياء مره شدت سعد وزاد اعجابه باخلاقها وحسه بنت غير عن كل البنات اللي مر عليه
استاذنت هيام وطلعت وسعد نظراته مازالت معلقه بالباب اللي طلعت منه هيام
ابوهيام: ياولدي كانك ماشفتها زين ارجعها لك
سعد استحى وحس انه فهى شوي
سعد: لاياخال شفتها زين ونعم ماربيت
ابوهيام: الله يسلمك خذ راحتك ياولدي فالرد معك فرصتك واذا حسيت انك استقريت بالرأي رد علي
سعد: الرد باين ياخالي الله يكتبها من نصيبي بينا اتصال باذن الله
طلع سعد من بيت ابو هيام وطول ماهو يسوق سيارته كان سارح بشكلها واخلاقها ويحس انه فعلا صبر ولقى جزء صبره
دخل سعد للبيت ولقى امه وابوه على احر من الجمر
ام خالد: هاه يوليدي بشر
سعد: يمه ابشرك لقيت البنت اللي اتمناها
ام خالد: الله يوفقك ياوليدي
ابوخالد: الله يوفقك ياوليدي مابغيت وانا ابوك شبه يأسنا من زواجك
سعد: لاابشرك يبه خلاص بترتاحون مني ,, يمه اتصلي عليهم خلاص اعجبتني البنت
ام خالد: لاياوليدي اصبر لايقولون عن عجليين وكلم اختك وبشرها ازعجتني باتصالاتها ماجا سعد ماجا
اتصل سعد على اماني وبشرها وفرحت له : واخيرا ياسعيدان طاح همك يااخي مابغيت مابقى بيت ماطلينا فيه انا وامي
سعد:هههههههههههههههههههههه لابرييحكم الظاهر كلكم ماليين مني تو امي مستلمتني محاضره بعد
اماني: هههههههههههههه الله يوفقك يابوسعود ويجعلها من حظك ونصيبك يارب
سعد: يارب << طالعه من قلبه