تجربتي وبداية مشواري بعمل اكسسوارات الهاند ميد -طريقة سهلة 2024.

ولكي يستفيد بقية الاخوات العضوات المتواجدات بالجروب معانا ..

ابدا بدايتي وكيفية اتجاهي لمجال عمل اكسسوارات الهاند ميد اليدويه ..

طبعا بداياتي كانت عاديه مثلي مثل اي بنت خلصت الجامعه متخرجت وجلست بالبيت سنتين بدون الحصول على عمل بسبب صعوبة الحصول على عمل ببلادنا بسبب الظروف الحاصله والواسطات الي هي المحسوبيات والخ ..

فموضوع عمل الاكسسوارات كان موجود من قبل ببالي بس ماكنت الاقي تشجيع وحماس وبحكم دراسة الجامعه مافي وقت فبعد ماخلصت الجامعه بدا الوالد والوالده بتشجيعهم لي بدل الجلوس هكدا بدون عمل وبحكم انه صرفياتي تزيد اكتر واكتر واعتمد على نفسي ويكون لي دخلي الخاص وانه بكره بتتزوجي ولاسمح الله زوجك دخله قليل حلو تتساعدوا مع بعض ويدك على يده وعشان بكره بيجيوا اطفال يعني بالمختصر تشجيعهم انه الواحد يفكر لنفسه وللمستقبل الجاي حتى وان كان لسه مش مخطوبه او مزوجه وطبعا تشجيعهم لي كان قبل مانخطب والان الحمدلله معقوده وزواجي على شهر 9 ان شاء الله وطبعا اللهم ولك الحمد النصيحه جت بمحله وطبعا الفضل بيد رب العالمين قبل كل شي وبفضل الوالدين ابي وامي الله يحفظهم ويطول باعمارهم هم البركه واساس وعماد البيت ..

وطبعا قبل كل شي الى جانب النصيحه والتشجيع لازم لازم لازم واكررر ( النيـــه ) والنيه تسبق العمل لازم عندك نيه وناويه تعمل وتصري انك بتتقني هدا الشي وتحبيه وبينك وبين نفسك تقولي اني احب هدا الشي وان شاء الله بقدر اعمل واستمر وطبعا بالاول بتواجهي صعوبات وتعليقات من الناس وانه مش حلو عملك وانك ماتعرفي تتقني وعلى فكره مازلت للان اواجه هدا الشي وقد صارلي لشهر ابريل من 2024 بغلق سنتين من بدا افتتاح مشروعي الصغير بعمل اكسسوارات الهاند ميد ..

وبدات فعلا وماكان عندي مبلغ وامي الله يعطيها طولت العمر سلفتني مبلغ بسيط جدا 6000 ريال يمني يعني مايقابل 27 دولار تقريبا اشتريت فيها بعض اغراض بسيطه جدا وكنت اشتغل واخد صور من النت واحاول اعمل مثله واطبق حسب توفر المواد عندي او اصمم من اختراعي واصور واعرض بالجروبات العامه على الفيسبوك البعض نالت اعجابهم والبعض كان يقترح لي افكار والبعض يدعمني بصور والبعض ينصحني بتغير لون او اغير من الشكل وهكدا ..

ومن هنا بداو الناس تطلب مني شويه شويه وكل ماعمل طلب لحد اصوره وبداياتي ماكنت اعمل شعار للصور او اسمي على الصور وهكدا جمعت كدا تصميم والاغلبيه نصحني افتح جروب خاص فيني على الفيسبوك وانزل كل جديد لاعمالي ..

بالاول كنت لما اخد طلبات اوردر من الزبائن مااخد عربون مقدم منهم كبدايه ولكن مع الاسف انصدمت وتلطمت بالعاميه من كتير من الزبائن لاني ماكنت افهم بشي وماعندي خبره وفكره بالمواضيع دي ولاسئلت وثقت بالكتير لكن محد طلع عند حسن الثقه الا من رحم ربي ..

وبعد كدا تعلمت مع الوقت ماقبل اي طلب الا لما اخد عربون مقدم نص قيمه طبعا لمحافظات عدن الي اني فيها .. وماكنت لسه اوصل لخارج عدن ومع الايام ولما بدات انعرف وانشهر قليل قليل عند الناس والبنات طلبوا اوسع نفسي واوصل لكل المحافظات اليمنيه وفعلا تشجعت ووصلت بعد مااستفسرت عن الطريقه اخد قيمة الاكسسوار + قيمة الشحن على الزبون مقدم طبعا من مكتب التحويل وبعد كدا ارسل طلبهم عبر مكتب التوصيل وخلال اسبوع يكون طلبهم عندهم ..

ومع مرور الايام لما تطورت بدا يتم سرقة الاعمال ياخدوا من افكاري وتصاميمي ويفتحوا جروبات يقولوا انه تصميماتهم او بيعملوا مثله مع حدف وهدا الشي ضايقني بجات بكتابة اسمي على التصميماتي تبعي وحده من البنات اقترحت اعمل شعار خاص لي على التصميمات وطبعا ماعرف بالفوتشوب كلمته ولانه زوجه مصمم وافقت وقالت ولاتهتمي وفعلا كلمت زوجه وعملي الشعار وكانت هي تحطلي شعاري على تصميماتي جزاها الله الف خير ..

وبعد مرور سنه قررت اعمل كارد خاص بحيت اكون احط كارد لتعريف بعملي من خلال طلبات الزبائن الاوردرات ومسجل على الكرت اسمي الخاص بالاكسسوارات ورقم جوالي وحسابي تبع الفيس والتويتر ..

وبالاول كنت احط الطلبيات بمحل صغير بالسوق الشعبي العام وابلغ الكل يروح يستلم وكانوا بنات تجي لعندي اني احاول ابحت عن محل بعدن مول مركز تجاري مول كبير بحكم انه المول الكل يروح عكس السوق العام الشعبي وماكان عندي حد اعرفه يتعاون معي وكنت فعلا محتاجه عشان بالمره اكون اي اكسسوار اعمله اصوره على المنيكان لانه ماعندي بالبيت وماعندي قدره اخد بحكم السعر والدخل القليل اللهم ولك الحمد ..

وفي صاحب محل متعاون عنده محل بالمول هدا وتقريبا اغلب البنات الي متلي عندهم مشروع يحطوا عنده حاولت اكلم وحده تلكمه قالت ماعتقد بيوافق لانه مننا كتير نحط عنده فقلت كلميه توكلي والباقي على الله ان رضى خير وبركه وان لا خلاص وفعلا كلمته وعلى طول وافق وماقال شي قلي المحل محلك وخدي راحتك وانا اشجع البنات الي مثلك يسكبوا من عرق جبينهم وتعبهم بدل مايضيعوا وقت وجزاه الله الف خير ساعدني كتير ..

وبدات احول طلبات الزبائن لعنده وكلمت البنات والكل اعجبه الفكره وفرح فيها لانه انسب لهم المول عن السوق تواصلت معه اخد ادنه بما انه صاحب المحل اني كل مااعمل تصميم هل اقدر اروح المحل واصور على المنيكان واعرض قلي برضو خدي راحتك المحل محلك وفعلا صورت وحطيت بعض اكسسوارات عنده وقلت للبنات للي تحب تشوفو تاخد تروح المحل بتلاقي هناك اشكال ..

والحمدلله مابقول اني تاجره كبيره وعندي راس مال كبير وانما اقول انه اني طالبه رزق واعمل حسب هوايتي ورغبتي لهدا الشي واضافه الى جانب عمل الاكسسوار عندي هواية عمل الاكلات سواء حلويات مقبلات معجنات والخ وعندي مشروع صغير برضو بدات فيه ووقفته لفتره مابعد الزواج برجع له مره تانيه بسبب ضغط طلبيات الاكسسوار ماقدرت اوفق بين الاثنين فربي يقدرني وافق بينهم ببيت زوجي لانهم اكثر حاجتين محببين لي ..

هدا كان ملخص تجربتي ومشواري بعمل اكسسوارات الهاند ميد اتمنى من الكل الاستفاده منه والعفو على الاطاله بالكلام ..