السلام عليكم
والله ي اخواتي مو عارفه من وين ابدأ احس الدنيا صككت أبوابها بوجهي
لي ست سنين متزوجة وما حملت ولا مره وحده والسبب ان عندي تكييس و زوجي عنده ضعف حركة
كل شي سويناه فشل وآخر شي كان الحل الاخير للدكاترة اننا نسوي حقن مجهري
وسوينا وطرررت من الفرح وقاعدين نعد الايام لأننا كنا متأكدين و واثقين بالله اننا راح نفرح
لأنا استخرنا الله ويسر لنا العملية… وللأسف كانت نتيجة التحليل سلبي مو حامل كل الأجنة اللي رجعتها راحت ولا جنين مسك وريح قلبي وطفى ناري كلهم راحوا متى مدري..
الحين الدنيا ضايقه فيني مدري نفسي مره اموت نفسي ومره نفسي اهج مكان محد يدري عني
ما راح اقدر اتحمل كلام الناس اكثر ولا تقولون طنشي لا احد يضحك على نفسه مين من البشر يسمع التجريح ويطنش لا تكذبون على نفسكم وعلي…
اتمنى اللي تقرأ كلامي من اللي مروا بنفس تجربتي يقولون لي وش سووا عشان ينسوون هالألم لأنهم أكيد حاسيين فيني…
انا بغيت افضفض لكم لأني ما قدرت احكي لأحد وجعي احب ابان قويه قدامهم حتى امي ما بغيت احرق قلبها وهي تشوف حالتي هذه حابسه نفسي بالبيت ما لي خلق اشوف احد او اي شي…
أليس الله تعالى هو الرزاق ؟؟؟
طنشي البشر – واطلبي الله في كل وقت وتحرري اوقات استجابة الدعاء خاصة في قيام الليل – ومن اكثر طرق الباب يوشك أن يفتح له
ربك سبحانه رزق نبينا ابراهيم وهو شايب وزوجته عجوز رزقهما الولد – عليهم السلام
فلا تيأسي أبدا من رحمة الله وأحسني الظن بالله – وكلما زاد يقينك بقدرته وكرمه سبحانه قربت ساعة الفرج عليكم …..
أسال الله ان يرزقكما الذرية الصالحة بكل يسر وسهولة انه سميع ٌ مجيب الدعاء – سبحانه
هي كانت منتظمه تتعالج عند دكتوره ومستمره معها في مستوصف
وكمان اشترت علاج ب700 ريال عند وحده تبيعه للحمل ويمدحونها
بس هذا في رياض
اذا عندك تكيس اهتمي بنوع غذائك جدا ومارسي رياضه
انتي خلي تركيزك في تكيس موش بالحمل حاليا
لا تقنطي من رحمة الله . الدعاء الصلاة الدعاء الصلاة الدعاء الصلاة
اللهم فرج على كل مسلم
بنت خالتي سنين اكثر منك تقريبا والحمدلله جابت توام ولد وبنت
مع الصبر والرقيه الشرعيه وانصحك بالحجامه
ادخلي قوقل واكتبي قصتي مع علاج التكيس بالحجامه
اهم شي حسن الظن بالله
وفيه حساب بتويتر لشيخ لاازكيه على الله
ادخلي وقد طلع مرا في قناه البدايه ماشاء الله ابحثي عنه
اسمه ( عبدالعزيز النوفل )
شوفي حسابه واطلعي على فديواته بالنت
وله ملفات وتجارب ناس بحسابه
واهم شي الصبر لعل الله يختبركم ولعل ان التاخر خيره لكم
بالتوفيق
عزيزتي انا كنت بحط رابط بس ما قدرت ماعندي مشاركات
المهم باليوتوب اكتبي" دعاء لمن يريد ذرية ذكره الشيخ صالح المغامسي"
على ما ذكره الشيخ بان كثير دعوا الدعاء وبفضل الله رزقو بالأطفال.
الله يرزكي الذريه الصالحة
لا تنسيني من دعائك جزاكي الله خير