طبعا انا من الناس اللي كنت اعاني من فوبيا الصراصير وتعبت نفسيا لأني ماكنت اعرف من وين تدخل البيت بالضبط فالحة بس اصارخ واصحي زوجي من عز نومه عشان يموته
وزادت معاناتي في غرفة النوم ااااخ ياربي ااااخ صارو يخاووني في الستارة وعلى السرير وبعدين قلت يا انا يا الصرصار وعملت لمخي برمجة عصبية وقلت لحالي اسمه صرصار وقذر معقول اخليه يغلبني ويقومني من عز نومي وقعدتي ويعكر صفوي!!! هذا حشرة حدها تنداس لا اكثر ليش اعطيها اكبر من حجمها وتكرهني في بيتي كذا وتحديت حالي وقلت اي صرصار بشوفه انا اللي بلحقه وبموته وبالشبشب مو بشي ثاني لانه مقامة طبعا انا عانيت كثير لدرجة صحاني واحد كبيررررررررر اسود يلعب بخدي وانا نايمة ااااه يارب لطفك وصرت اشتري بف باف بالكرتون واحط بكل غرفة واحد مثل التحفه وبالمطبخ والحمامات والسيب والصالة طيب وبعدين ليش كذا من يكون من يكون اعمله الف حساب!!
قلت استهدي بالله وشوفي من وين يزرعون لانهم يطلعون فجأة وبحياتي ماشفت بالحمام فدائما اقول هذول يزرعون
لغاية ماشفت بعيوني واحد ينزل من المكيف
وارتحت نفسيا لاني عرفت من وين يدخلون وصرت قبل لا اطلع من البيت اطفي المكيف وارش علبة كاملة من البف باف في المكيف واسكر الباب واطلع وارجع القى قوم افواج انا لله ما استفدت شي غير اني كتمتها وخليتها تطلع بزيادة
صاحب زوجي نفس المشكلة قاله لاتقفل المكيفات خليها مفتوحه ماتدخل وصرت اطلع من بيتي يوم يومين ثلاثة والمكيفات لحالها مفتوحة وفعلا حل حلو ولا لقيت ولا صرصار لكن اول ما اطفي المكيف تدخل كلها وبرضو بكثرة حسبي الله عليها اكتب اللحين لكم واما اتلفت حولي واحك بجسمي فقدتني الثقة الحقيرة
المهم
اليكم الحل ،،،،،،،،،
انا قلت اجل لازم يتغطى مكان التهوية حق المكيف
كيف !!
كييييف !!!!!!!
وجتني الفكرة اني اروح محل اقمشة نسائي واطلب منه طاقة جيبون
تعرفونة !!!!؟؟
جيبون حق الملابس اللي تنفشها من تحت
واشتري طاقتين وحده اييض والثانية اسود
وابدأ،،،،
معاي مكيفات رمادي والباقي ابيض طبعا الرمادي بالاسود والابيض بالابيض وافتح الغطاء كامل واغسلة واقص الجيبون عليه واحطة من فوقة يعني البس كامل غطاء المكيف الامامي بالجيبون واخلي اطرافة اكبر عشان اقفل علية الغطاء واحط مساميرة واثبته
يعني بالعربي غلفت المكيف تغليف هههههههه
والله شكله حلو ولا خرب بس مو تشترون قماش تل انتبهو فتحاته صغيرة جدا لاااازم جيبون
بصراحة ارتحت جدا لو اغيب شهر ارجع البيت يارب له الحمد نظيف الصراصير تشوف الحاجز ترجع من مكان ماجات وكل اسبوع او اسبوعين تطلعونة تغسلون وترجعونة بنفس الوقت عيب الابيض يبان تلوسخ بسرعة اما الاسود نفعني وانا اشوف عادي تغليف المكيف باي لون واللي يسأل او يستغرب قولو عشان الصراصر مافيها شي اهم شي النظافة وللأمانة ياحريم هذي فكرتي انا غير منقولة واجتهادي انا ومسامحة اي وحده تنقلها لاني اعرف ان الحريم يعانون وحاسة فيهم
الله يوفق الجميع ادعولي بالذرية الصالحة وربي يحفظلي ابني
شكرا لكي يا غلا الروح
لما تستعمر مكان صعب تتخلصي
منها واذكر عشت بسكن و تعرفوا
السكنات فيها الصراصير بالهبللل
تسلمي حبيبتي