اجبروني على طلق صناعي اوافق والا لا ؟ -علاج 2024.

السلام عليكم ورحمة الله

اهنيكم بمنتداكم الحلو .. ويشرفني الانضمام لكم ..

وهذا اول موضوع .. وهوه استشارة ..

الحمدلله انا حامل بعد انتظار 12 سنة باطفال انابيب ..

مشكلتي انو دكتورتي بدون اسباب صحية سواء ليا او للجنين تبغى تقدم يوم ولادتي اللي المفروض والمتوقع من بداية حملي تكون يوم 111111 .. ومن اول زيارة للاسف تلمح على القيصري لاحظو من اول زيارة يدوب كانت مجرد تعارف لا كشف لا تحاليل ولا شي .. بس مجرد ماعرفت انو الحمل انابيب صارت تصر كثير على القيصري ..

طبعا خيرتني ياطبيعي او قيصري .. بحكم قوانين بريطانيا لازم تتخير الحامل .. طبعا اخترت من اول زيارة تكون ولادة طبيعية .. بس ماحسيتها راضية بهذا القرار ..

مع زياراتي المتعددة للعيادة تسألني بكل مرة ايش قررتي ؟ وارد نفس ردي وجوابي وقراري الاول ( طبيعي ) .. وترد عليا انو القيصري اسهل واسرع ومافيها خوف وكل الناس متوجهين للقيصري .. واقولها لا لا طبيعي وبس بإذن الله ..

وتعبت نفسيتي وصرت بس ابكي واكره اروح اي موعد عندها ..

اخر زيارة كانت امس .. وكالعادة رجعت قالت القيصري افضل .. بس حكون معاكي طبيعي ولو صار اي شي وقت الولادة خلي فبالك راح اعمل قيصري على طول .. طبعا وقدمت موعد الولادة من 1111 الى 411 .. بعذر انو المستشفى ماتقبل الحامل الا بموعد محدد فقط .. وانا كنت حاجزة على 1111 موعدي الطبيعي ..

قالت ماراح استنى الى 1111 .. راح احجزلك على 411 .. واعطيكي طلق صناعي ..

وانا خايفة بصراحة من كلامها وانها اخذت الطلق الصناعي عذر واتعب منو انا والجنين وبآخر لحظة تقول مضطرة اسويلك قيصري ..

واللي اعرفو انو كثرة المثبتات بأول الحمل تأخر الولادة .. وهيه تبغى تستعجل عليا ..

وطبعا ما احس بشي ابدا حاليا لا طلق ولا الم ولا شي والنونو فووووق مرة فوق وماتتخيلو صعوبة النفس عندي من كثر ضغط الجنين على الحجاب الحاجز .. وانا اليوم ثاني يوم بالاسبوع الـ 37 ..

اهل الخبرة ابغى مشورتكم .. وياليت رأي الدكتورة سونيا ..

اكيد هيه بتكون ادرى واعرف مني بكثير .. بالذات اني بكرية مدري فين الله حاطني .. ماغير اقرا تجارب البنات .. غير كذا بإذن الله ماعندي شي يمنع الانتظار لا ضغط ولا سكر والجنين بخير ويارب لك الحمد هذا من فضل الله .. ليش الاستعجال طيب ؟

وحدة قالتلي يمكن لانها ماتبغاكي تولدي بيومك المحدد لانو التاريخ مميز وبالعادة تصير المستشفيات زحمة لانو هنا اغلب الحريم فاضيات يستنو التاريخ المميز ويطلبو قيصري .. الحمدلله والشكر 🙂