مرحبا كيفكم اليوم جتلكم طريقة الاوزي الي لما تطبخيها ما رح يشبعوا منها انا بالنسبة الي الكل بيطلبها مني على العزايم وان شالله تعجبكم .
المقادير :
كيلو رز بسمتي منقول لمدة نص ساعة بمي مغلية مع معلقة ملح كبيرة مشان ما يتكسر على الطبخ وتضل حبتو واقفة .
2حبة بندورة كبيرة مبروشة .
2حبة بصل كبار مبروشة .
1حبة قليفلة حمرا مبروشة .
1م كبيرة زنجبيل طازج مبروشة .
4 اسنان تومة مبروشة .
1كيس بازيلا وجزر المجمدة الجاهزة .
لومي حسب الرغبة .
جاجة مقطعة الى 4 قطع .
نص اصبع زبدة وشوي زيت قلي .
مكعبين ماجي .
2ملعقة بهارات البرياني وبتكون بهارات ناعمة مخلوطة مع بهارتا حب فيها هيل وورق غار وكزبرة حب وفلفل اسمر حب وقرفة عيدان وبهار حلو ازا مش متوفرة حاولي تعملي خليط من هالبهارات لكن بكميات صغيرة حتى ما تطلع البهارات حادقة بالطبخة .
بنسلق الجاجة وانا بعملها بدون جلد لانو بدنا نخفف شوي الدهون وبحطلها بصلة ارباع وورق غار وملح وورق غار بس.
وبنبلش بالخضار بنقلي البصل بالزبدة وزالزيت بعدين بنحط البندورة لما تستوي شوي بنحط الزنجبيل والفليفلة وبنقلبهم شوي بعدين بنحط البازيلا والجزروبنقليها شوي ورح تحسي انو ما في زيت مشان يتقلى فيها البازيلا لكن لا تخافي وتزيدي الكمية مشان ما يطلع كتير معك .
حطيلها الماجي مكعبين والبهارات وزيدي عليها المي المغلي لحد ما يغمر الخضار واتركيه على نار متوسطة وازا نشفت ارجعي زيدي مي لحد ما تشوفيا استوت لكن لا تخلي المي كتيرة عليها انتبهي انك تحطي قدر الحاجة بس .
لما تستوي البازيلا والجزر تماما بدون ما تدوب خلطيها مع الرز المنقوع والمغسول وحطيهم بالطنجرة بدون الجاج .
اغمريهم بالمرقة واطبخيه كالمعتاد .
بالنسبة للجاج بهريه حسب ما بتحبي وحمريه بالفرن او اقليه انا بالنسبة الي بقليه وبحطو على وجه الصينية وع اللوز المقلي .
وبجنبو السلطة العربية واللبن والله كتير هالاكلة طيبة واكيد مفيدة كتير.
صحتين وعافية ادعولي وبدي اشوف الردود .
شكراً لكـ
