راح العمر بأيام (صيتة) وانا أشوف *** عزالله انها يابو متعب فقيده
قال: القوي الله والانسان مصدوف *** العمر يفنا والليالي مديده
الأرض بيت الله وحنا بها ضيوف *** أسأل الله قديم الوقت وانشد جديده
قلت: الحياة أيام واقدار وظروف *** وجروح أهلها يابو متعب أكيده
الدايم الله… كل ما راح مخلوف *** إلا فراق اللي عيونك تريده
قلت: العزا يا أمان ربي من الخوف *** سلوى الحزين وشمس عمره وعيده
عبدالله المحبوب ياعز موصوف *** يا سيدي.. يابو الصفات الفريده
وقفت لك قلوب.. يعزونك صفوف *** الحب سيد.. والمشاعر عبيده
لا تنشدون الدمع وش فيه مردوف *** (صيتة) توارت عن عيونه بعيده
صلوا عليها العصر في المسجد وقوف *** وهلوا عليها.. ما طهر من صعيده
بنت الزعيم اللي روى الأرض بسيوف *** أخت الكريم.. اللي سنينه مجيده
راحت وراح القلب والروح والشوف *** وهي تحسب انها يوم راحت.. وحيده!
باق لها.. فضل علينا ومعروف *** يالله عساها في جنانك سعيده
داعيك داعي خير.. وارفع لك كفوف *** وأسألك يا خالق.. سمائه وبيده
تعز ابو متعب.. وتحسن عزا (نوف) *** وتجبر عزائنا.. كلنا في الفقيده
خالد بن عبدالعزيز التويجري
الله يعينه ويصبره
ويرحم موتااا المسلمين