الله يسعدكم ادخلوو :"" 2024.

بصراحه انا من زمان ودي احط هالموضوع بس تخبرون الاختبارات والزحمة مافيه وقت
وهاذاني الحين لقيت فرصة واتمنى اني القي جواب سؤالي او حل بالاصح
يعني ابيكم تساعدوني وتفهموني شوي لاني محتاجه هالشيء مع كل الناس عشان يتقبلوني
مشكلتي يابنات تفكيري، قبل ثلاث سنين كنت مرة حساسه وابكي على طول ودايم احس اني كل شي صح والناس غلط > تفكيري هذا نتج من تربية اهلي الي ماعرفوا يربوني زين دايم مايسمعون لرأي وان سمعوه على طول لأ ماتفهمين ومن هذا الكلام كانوا مرة يحطموني فنتج مني هذا التصرف اني كل شي اسويه برا البيت او اقوله صح ، المهم وقد صار نقاش مرة لما عمي رجعني من مدرسه انا وبنات عمي (وحده قدي وثنتين اصغر مننا بكم سنه وبزارين)
المهم حصل نقاش ولان رأي كان غلط جا عمي جلس يتريق ويستحقرني قدام البنات واني حساسه وما انفع لشي انا والله مرة بكيييييت حسيت محد متقبلني ويفهمني ويسمعني.. وبنفس الوقت انصدمت من بنات عمي محد يوقف مع او حتى يواسيني …اي شيء
بس الحمدلله كبرت شوي وبدأت استوعب الي اقوله وصرت اذكى بشوي من قبل..
بس الحين طلعتلي مشكله هي من زمااان بس ماكنت حولها كان اكبر همي اني ابي اكون صح مهما كان ، المهم الحين ما اقدر اخذ واعطي زي الناس
مدري شلون افهمكم بس انا عادي اقدر اتكلم بس في بعض الاحيان ما اعرف شلون ارد؟ شلون اتصرف؟ شلون اخلي ردة فعلي مناسبه؟ شلون اجذب الناس لي؟ ومن هالكلام
احسني مرة متأخرة على هالتفكير بس شسوي ما استوعبنا إلآ الحين وهذا كله بفضل الله ثم بفضل جدي وبابا لانهم نقلوني مدرسه جديده (بسبب ظروف ولاهم مايدرون بشيء) بس انه لما نقلت تعرفت على بنات جددددا طيوبات وجميلات فتحوا عيوني على اشياء ما انتبهت لها ولاكنت الحين بغبائي استغفرالله :""
اتمنى فهمتوا موضوعي زين هو معليش فيها شوي فضفضه على الاقل ارتحت حسيت ربع همي طاح لكن ابي حل لتفكيري .. يعني ابي اخلي تفكيري اعمق ابي يكون جوابي غير عن المعتاد .. لان احيانا يكون ردي سطحي واحيانا حلو ..لكن الحين ما ابي سطحي ابد
وبقية الاسئله فوق، الزبدة انه سمعت القراءه تنفع وتغير من كل شي بس وشلون؟
يعني فيه وحده جربت وتغير مستوى تفكيرها وعقليتها واسلوبها وشخصيتها ؟؟؟؟

وربي يعطيكم الف عافيه ويوفقكم ويسعدكم بحياتكم ويبعد عنكم كل هم ومشكله يارب :")