السلام عليكم ورحمه الله ..
ماعرف هي فضفضه ولا ايه لانه اغلب المشاكل الي عندي عارفه مالها حل وحتى لو لها حل مستحيل انه الوضع يرجع طبيعي قبل المشاكل..
والله ماتتصورو مشاكل قد ايش سبحان الله كدا فجأه اتكومت ورا بعض 
اول مشكله ..
انا من يوم مانولدت وانا مع خالاتي وجدتي وجدي وعلاقتنا مشالله الكل كانو يمدحوها يعني العيله كلها وخالاتي كانو يحبو بعض وامي ودايما سوا خالاتي ماشاء الله مرا كثير المهم كنا دايما معاهم ..
بعدين للاسف اخويا قرر يتزوج بنت خالتي واختلفو بعد الملكه لانه خالاتي كانو يتدخلو في علاقتهم والسبب البنت والام نفسها كانو يدخولهم بعدين انفصلو وبدأت القطيعه..
تخيلو جدتي قاطعتنا وامرت خالاتي كلهم بمقاطعتنا ..
لدرجه يشوفونا في المناسبات ومايسلمو علينا ..
امي في البدايه كانت تروح لجدتي وتزورها وجدتي ماتستقبلها ابدا وترفض زيارتها وامي كانت ترجع مرا تعبانه وينخفض عندها الضغط وتخش المستشفى من الزعل
بعد كذا بطلت تروحلها حتى لما تتصل عليها ماترد وتخلي خالاتي يردو ويسبوها ويقفلو الجوال في وجهها..
وامي مرا انسانه قوويه بس حنوونه..
قررت امي انها ماعاد تروح لجدتي عشان جدتي ماتتمادى وخلاص قاطعناهم مثل ماقاطعونا وباعونا ..
وجدي اتوفى الله يرحمه قبل مايصير ذا كلو هوا كان مطلق جدتي واول ماطلقها تخيلو امي جابتلها شقه وقعدنا عندها فتره يعني امي هي اللي شالت جدتي طول ذي السنين ولا وحده من خالاتي كانت تسال عنها ودحين انكرت ذا كلو ..
امي مرا تعبانه من موضوع جدتي يعني امها والام شي عظيم لكن جدتي انسانه ظالمه جدا حسبي الله عليها حتى احنا احفادها صارت تتكلم فينا ..
ولما اشوف بنات خالاتي في الافراح والمناسبات سوا مرا اتحسف لانو كانو صاحباتي وبرضو قاطعوني وانا مالي ذنب وطلعو عني كلام انو انا فرقت بين بنت خالتي واخويا عشان كنت غيرانه لانو عنست وهما اتزوجو مع اني كنت لسه صغيره عمري 23 ومايهمني الزواج ولا موضوع العنوسه..
المهم مرت ع المشكله تقريبا خمس سنين واحنا على هذا الحال وصدقوني احنا بدونهم احسن واتعودنا على قطيعتهم لانه حاولنا كثير معاهم..
تخيلو ولا وحده منهم رفعت السماعه تسال عن امي مع انه امي هي الكبيره ..وسبحان الله من حنانها وطيبتها جدي اتوفى عندنا في بيتها لانه هي جابته عندنا في البيت في اخر ايامه ومرضه..لانه كان لحاله في البيت وخالاتي تركوه لوحده فجابته عندنا في البيت..وتوفى بعد سنه..
وقريب صار فرح اختي ووحده من خالاتي كلمتها امي وقالتلها انا ماقدر اجي فرح بنتك عشان امي "جدتي" ماتزعل..
تخيلو!!!!
طبعا امي دخلت عمها في الموضوع وحاول الاصلاح بينهم فتره لكن على طول قاطعوها مره ثانيه وجدتي ماسمعت منه ابدا وكثير اتدخلو بين امي وخالاتي وجدتي عشان يصالحوهم سوا بس مافي فايده..
….
المشكله الثانيه..
اخويا الكبير اول ماتزوج بدأت المشاكل معاه وكان يقل ادبه على ابويا ويسبه ويتضارب معاه عشان حرمته مع انه ابويا في حاله مايتدخل ..ويسب امي كمان ..وهوا عندو ولدين دحين بس مقاطعنا له سنتين جا شهر مرا اتصالحنا معاه بعدين رجع سوا مشكله ثانيه وقاطعنا تخيلو لا يجينا لا عيد ولا رمضان ولا شي وامي وابويا مرا واجعهم هذا الشي..
…
المشكله الثالثه..
هذي مشكله بسيطه وهي انه عمري 29 ولسه ماجا نصيبي انا الحمدلله مرتاحه ومبسوطه مع اهلي وعندي شهاده واشتغلت وناويه اشتغل تاني بس نفسي ربه يرزقني بالزوج الحمدلله مو ناقصني شي جمال وادب وعلم واختي االي اصغر مني اتزوجت وقبل يومين اختي اللي اصغر كمان جاها عريس وانا سبحان الله مرا مايجوني عرسان ماعرف ليش ..
اتمنى انه تدعولي بالزوج الصالح ..
..
واسفه لاني طولت عليكم بس ابا اسمع منكم راي في المشكلات وتشاركوني ..
والف شكر لكممم وعلى هذا المنتدى الرائع
|
المشاركة الأصلية كتبت بواسطة الحلم المهاجر
 ادري ياحبيبتي ان كل هذي الامور تاعبه نفسيتك بس الواحد ايش يسوي ماباليد حيله بالنسبه لجدتك امك سوت اللي عليها وزيادة بس تحاول انها تبرها قد ماتقدر وبالنسبه لاخوك ياكثرهم العاصيين بهذي الدنيا وماتدري ياحبيبتي تحاولي تتقربي منهم وتجي على راسك عشان كذا انسي موضوعهم لين ربي يحلها من عنده وبالنسبه ان عمرك 29 ومانخطبتي انا بعمرك وزيك تمام بس صدقيني الخير بيجي بإذن الله امس كان زواج جارتنا عمرها 37 سنه وقبل سنه تزوجت بنت خالتها وبرضوا جارتنا وعمرها 38 سنه وجارتنا الثانيه ملكت قبل كم شهر وعمرها فوق ال 40 يعني ياعمري ربي خلقنا ومتكفل برزقنا ونصيبنا
|
كفت ووفت وازيد ..عليك بالدعاء ادعي الله لهم الهداية ولك الزوج الصالح قريبا والله يهديهم جميعا …
ومع ذلك حاولي بالأسباب لإنهاء هذه القطيعه عسى أن يرقق ربي قلب جدتك وأخيك ويعودون لكم أفضل مما كانوا …. يارب .
وأنت يا أخية لا تهملين المشاركة في المناسبات الاجتماعية وبإذنه تعالى سيكون فرحك قريبا رزقك الله الزوج الصالح والذرية الطيبة