بسم الله الرحمن الرحيم
اليكم عزيزاتي .. اكتب مشكلتي
لعلي أرى بردودكم حل يريح قلبي .. يكشف عن عيني وقلبي الغمامة السوداء
انا بنت عمري 22 سنة
وعندي اخت اكبر مني بسنة ونص .. و 2 خوات اصغر مني وحدة بـ 3 سنوات وثانية 7 سنوات
الحمدلله اني بالبيت شخصيتي مرحة .. عصبية احيانا .. بس قلبي طيب مرة
اني بالبيت كأني الكبيرة اطبخ واغسل واساعد امي .. لو تصير عزيمة بالبيت اني الي اقوم فيها .. غير كدا خواتي معتمدين عليي في امورهم .. اداكر ليهم اساعدهم لو طلبو اي شي
ما اقصر عليهم
وهوشتنا مثل اي خوات بالبيت ساعة ويطيح الحطب ما نحمل في قلوبنا الحمدلله
برغم كل شي .. اني احس اني بعيدة عنهمم .. احسهم يتقربون لي وقت حاجتهم بس
طبعاً الكبيرة والي بعدي مباشرة .. يتشابهون بالطول وشكل .. يعني كانهم تؤم .. وما كأن في فرق بالعمر وني بينهم
يلبسون مثل بعض .. كل شي مع بعض .. ما ياخدون رايي بشي كأني مو اختهم
والله ساعات يجلسو يسولفون ويضحكو .. واني مدري عن شنوو
تعبت والله .. مدري ادا اني حساسة بزيادة ومكبرة الموضوع .. او الموضوع من جد يضايق
اختي الكبيرة ادا تبي تطلع سوق .. ما تقول لي تطلب من اختي الي اصغر
وتجلس ساعة تحاول فيها .. واني ما تقول لي اصلاً
وساعات اشوف عليهم لبس يعجبني .. اسالهم متى اخدتوه .. يضحكو يقولو اهوه من زمان
بكل شي مبعديني .. حتى مرة اختي الي اصغر مني عازمة صديقاتها
يوم الخميس .. امي وخواتي كلهم قالو بيطلعون بيت جدي
الا اني قلت خلاص بجلس وياها اعاونها بالعزيمة وضيافة
والله بغيت اصيح تطلب مني اجيب و اشيل ولا نادتني ادخل اسلم ع صديقاتها او تعرفني عليهم
مع انها تدري اني جالسة بحالي
برغم اني يوم جبت صديقاتي دخلتهم كلهم يسلمون واعرفهم على صديقاتي عادي
اليوم الي حرق قلبي واحرجني
رحت انادي على اختي تتغدى
قالت لي وهي مبسوطة اليوم رحت سوق مع صديقاتي
قلت لاختش الثانية وسهرت ولا راحت معي :/
قلت ليها ليش ما قلتي لي .. تدري ودي اروح اشتري فستان لعرس صديقتي
ضحكت ومشت عني
يالله حسيت نفسي بصيح من معاملتهم
والله اني احبهم وايد واخدمهم بعيوني
لدرجة والله يوم ملكة اختي .. رجعت من صالة بعز الحفلة البيت
عشان ارتب المجلس وابخره ليها وللمعرس .. لانهم بيرجعو من صالة ويجلسون فيه
شرايكم حبايبي
اني مكبرة سالفة ولااا .. ؟؟
وشلون اتصرف معاهمم
امانة نزلو موضوووووووعي لان حيل مضايقة
و لا تخدمهم كل واحدة تخدم نفسها
و اعطي قيمة لنفسك عشان يعطونك قيمة
طول مانتي بتخدمهم و مهملة نفسك راح يحسو اني هذا من واجبك
و انك خدامة عندهم
فطنشهم و اهتمي بنفسك
اني ما ودي اطنشهم او احقرهم .. بالعكس اني ابي اكون اقرب ليهم
ماودي بكرة اتزوج .. وابتعد عنهم .. ودي خواتي يكونو قراب مني
الكل والله من بنات عماتي وبنات خالاتي
يحبوني وعاديني مثل اختهم
حتى كل يقولون لخواتي .. نحسدكم على اختكم وطيبتها
اني ماودي ناس تحبني .. ودي هم يحبووووووووووني
يعاملوني مثل ما يعاملون بعض
تخيلو ان ابووي صرف عليي عشان اكمل دراستي بالمعهد
كانو كل يقولون له .. لو جايب خدامة اصرف من لفلوس الي طيحتهم عليها
وادا سويت شي بالبيت او ساعدت امي
وقلت لهم قومووو ساعدوني .. يقولون لي حللي الي دفعه ابوي مصاريف دراستك
برغم ان ابوي صرف عليهم هم بعد لدراستهم مو بس اني
:/
| أأأأأهــ ليتك اختي ربي يخليك لهم يالغلا |
تسلمين والله حبابة .. اتشرف انك تكوني اختي
ويجعل لنا من النصيب احسنه ومن الرزق اوسعه
ومن الحظ اجمله
ولايكسر انفسنا بين المسلمين