رحلة البحث عن زوج المستقبل الطبيب يجيب 2024.

مرحبا كيفكم يا حلوات

المهم انا وحده عمري 20 وحيده جدا ما عندي صديقات ابدا وبنات العائله يسكونن بغير المدينه الي اسكن فيها وما عندهم جولات عشان نتواصل . عندي اختي اكبر مني ب سنتين بس زواجها بعد شهرين يعني احس بفراغ و وحده . امي بعيده عني جدا ابوي كل وقته بدوام اخواني كلهم اصغر مني بكثير . بيدي جوال ولاب توب بس كنت دايم اقول اللهم اغنني بحلالك عن حرامك . من شدة وحدتي فكرت بزواج لان اختي بتتزوج وبتروح مدينه ثانيه فاكيد بيجن جنوني . المهم قلت بتزوج باسرع وقت بس كيف يجي نصيبي . المهم جتني فكرة مواقع الزواج فسجلت بموقع اسلامي جدا ولازم تقسم بالله انك جاد او جاده عشان تسجل فيه المهم اني سجلت وبدت رحلة البحث حتى لقيت الرجال المناسب لي والي بيسكني قريب من اختي رجال بمعنى الكلمه حالته الماديه مناسبه جدا ويبني بيت بس لسى ما اكتمل وعلى طول كلم اخته بالموضوع وبيتقدم لي قريب ودايم يقول ان اخته تقول يلا استعجلو . المهم اتفقنا نستخير واستخرنا هو كان مرتاح لي من البدايه فبعد الاستخاره قال انه لسا مرتاح مره وانا بعد استخرت وحسيت اني متمسكه فيه بغض النظر عن اني ابي اتزوج وبس لانه بصراحه رجال ومعتمد على نفسه بكل شي وكان اتفاقنا ان صديقة اخته شافتني بزواج وقالت لاخته اني مناسبه له علما ان اخته متزوجه وعندها عيال . وهو حاليا قال لي بسافر للصين اسبوعين وراح انقطع عنك بحكم ان مافي انترنت وفعلا صار له غايب اسبوع ونص وهو دايم في بالي وما حاولت ادور غيره او الف وادور وهو ما قال لي ابدا احبك او تغزل فيني كان كلامه جدا محترم ويقول ان بيتك هو مملكتك انتي سوي فيه الي تبين ويقول انتي زوجتي وام عيالي واذا تبين شغاله انا بجيب لك وبتسافرين وبتاخذين راحتك انا طبعا ما ابي لا شغاله ولا شي ابيه هو بس وهدفه الوحيد الزواج بس . بس الشي الي مخليني متردده ان عمره 30 يعني اكبر مني بكثير . وبعدين حابه اطلب رايكم قبل اتقدم اي خطوه ثانيه وهل الي سويته صح او خطا وهل استمر ولا اتراجع .