يسعدلي مساكم يالبى قلوبكم
كيفكم طيبين ؟؟؟
بصراحه اكتب لعيونكم معاناة شاب
مع ابنة عمه ..
ماراح اطول صرت ثقيله هههههههه
اتفضلوا………..
1- سبحان من يرزق بتـوع الملاييـن
الرازق اللـي مـا يخيـب الرجـا بـه
2- لي عم عنـده معـرضٍ للصواليـن
أموت واعرف بس من ويـن جابـه –
3- وإذا سألتـه قـال بعـت الدكاكيـن
ما يدري إنـي مـا هضمـت الإجابـه
4- الشاهد إني رحت له قبـل يوميـن
فـي قصـره العامـر ودقيـت بـابـه
5- قال ارحب ارحب عدّ ورد البساتين
يـا مرحبـا باللـي لفـا يـا هـلابـه
6- قلت البقـا عـدّ النفـل والرياحيـن
يا شيخ شمـل اهـل الكـرم والذرابـه
7- قال اسلم الله يحفظك لي من العيـن
وآمـر أوامـر حضرتـك مستجـابـه
8- قلت الصراحة طالبٍ قـرب غاليـن
ودي تزوجـنـي كريمـتـك يـابــه
9- ثنّـى وقـال اهليـن والله وسهليـن
والكون ترخـص لجـل عينـك رقابـه
10- لكن ترا عندي شـروط وقوانيـن
قلت اشرط اشرط يـا حبيـب الغلابـه
11- قال أولاً مهـر العروسـة ثمانيـن
غير الرسـوم وغيـر حـق العصابـه
12- والثانية عمك يبـي منـك سبعيـن
رسـم الأبـوّة والنـسـب والقـرابـه
13- وام العروسة حقهـا منـك ستيـن
عشانهـا سـت الحـسـن والمهـابـه
14- واخوانها كلن يبي منـك خمسيـن
عـداً ونقـداً تنـدرج فــي حسـابـه
15- وخواتها الخمس اعطهن من ثلاثين
عشـان تتـوثـق عــروق النسـابـه
16- وتجيب طقم عيار واحد وعشريـن
وخاتم مـن المـاس المصفـى ترابـه
17- واكياس متروسة كعوب وفساتيـن
ألوانـهـا واشكالـهـا مــا تشـابـه
18- وموتر بسواقـه وفيـلا بدوريـن
أثاثـهـا مــن بطـرتـه ينحـكـابـه
19- واحجز لنا قاعة بقصر السلاطيـن
واحجـز بهـا رقاصتـيـن وربـابـه
20- وامنع دخول اهل اللحى والبزارين
واعـزم أمـيـر المنطـقـة بالنيـابـه
21- هذي الشروط اللي على بالي الحين
وذكرني اللـي مـا حسبنـا حسابـه –
22- قلت اذكر الله يـا عـدو الساكيـن
واستغـفـره لا يبتلـيـك بعـذابـه –
23- الظاهر إنك منت عارف أنا ميـن
أنـا لـو ارقـا فـوق متـن السحابـه
24- ما جبت حتى نص درزن مواعين
واضحـك بكيفـك واعتبرهـا دعـابـه
25- شروطكم هذي شـروط المجانيـن
شروطكـم شغـل ابـتـزاز ونهـابـه
26- شروطكم تقصم ظهـور البعاريـن
شروطـكـم هـمّـن وغــم وكـآبـه
27- شروطكم والله سيـوف وسكاكيـن
تذبـح بنـات المجتمـع مـع شبـابـه
28- وين الرضا والعطف واليسر واللين
اللـي ذكـرهـا الله بمحـكـم كتـابـه
29- وين الصفات اللي أمرنا بها الديـن
وين اختفـى نهـج النبـي والصحابـه
30- يا عم جعل اللي خلقنا من الطيـن
يـرد عقلـك مـن خطـاه لصـوابـه
31- ويجعل نصيبي عند غيرك قل آمين
ويحسن عزا الصابـر ويجـزل ثوابـه
32- قال انت لو فكرت تفكير صاحيـن
ما شفت في مجمـل شروطـي غرابـه
33- حنا بعصـر العولمـة والمزاييـن
ماهـوب عصـر الفلسفـة والخطابـه
34- الناس تسعـى للرتـب والنياشيـن
وانـت اهتمامـك بالشعـر والكتـابـه
35- والشعر ما ينفعك لو هو دواويـن
مـا دام جيبـك مثـل بيـت الخرابـه
36- يا بوك لا تسمع كلام المصاخيـن
واسأل مجرب عاش فـي وسـط غابـه
37- قلت الله اكبر يا محـرر فلسطيـن
مـن يسمعـك يحسبـك ذيـب الذيابـه
38- تراك شايب راس مالـك رياليـن
والبنـت مـا تسـوى جنـاح الذبـابـه
39- قال انقلع مالت على وجهك الشين
لا عـاد اشوفـك عنـدنـا يالـزلابـه
40- قلت ابشر ابشر لكن الباب من وين
واقفيت من عنـده علـى صـوت بابـه
والله لو المهور بهذا الشكل كان ماحد تزوج ابد
الله يعطيكي الف عافيه على هذي القصيده الرائعه
مره حلوه ………تسلم ايدك
راااح فيهـــا المسكيـــن ..
تحيتـــي
مشكوره حبيبتى
تسلمين غلاتي وانتظرجديدك
وسانقلها لقسم الخواطر وعذب الكلام عشان تلقى تفاعل اكثر":":
يعطيك العافيه تقبلي مروري
صراحة تحفة الرجال عبر بطريقة جننننان تسلمي ياقلبي 
