لعب فيني صدى صوتك بقلبي كنه الموال
تحبني؟ سؤال اخرس جوابه لاسهرت الليل
سهرت الليل مع حرفي اجاوبك بهدوء البال
نعم نبضي مع احساسي وقلبي هام بك بالحيل
تثير الشوق باعماقي خرقت الصمت بالجوال
نغم صوتك يجي دافي كأنه كلمة التهليل
هدوء الصوت بانفاسك تغلغل واستغل الحال
رميت القاف لعيونك وانا مدري عن الترتيل
احبك لعنبو جد القوافي جعلها الزلزال
اذا ما جابت لراسك جزيل الشعر والتحليل
اصف البيت لعيونك جنون وقافيه وامثال
ابارسم في شروق النور قصيدة تعجز التمثيل
ارتب في قوافيها عظيم الشوق والامال
مع احلامي مع جنوني وابدحر كلمة التأويل
تعال اسمع ترانيمي تهد قليبي المختال
الحاني بالصدر تعزف على اوتار الوريد
الويل
تسلطن لك جنون الحب رقص مع نغمة الخلخال
على موال (ابن عبده ) يغني لك غناة السيل
اهز الحرف من قلبي واتله واطلق الاهوال
اسطر لك جنوني مع فنوني باعذب التفصيل
ابحكي لك وابهمس لك وابقهر بالهوى العذال
ابا احرقهم وازلزلهم وابشعل للغلا القنديل
حياتي.. يابعد حيي.. ابيك الفارس الخيال
ابي غيرك يجنبني ابي اسمع صهيل الخيل
يدق القلب بالحانه كأنه رنة الفنجال
ابا اشرب صافي لحونك تقهويني بطعم الهيل
هلا بجنون يطربني وشعرن كنه الشلال
ابي اروي يالغلا قلبك وانا مابغي سوى التدليل
ابي كل البشر يمك تغيب وتختفي الاشكال
وابقى اللي لها قلبك وعقلك ياعظيم الجيل
يا حظ منهو كتبت له
تقبلي تحياتي وتقديري , يا عذبة القول