السلام عليكم
انا امرأه " تعقدت من قولت بنت او شابه " ابلغ من العمر 30 عام
نشأت وكبرت وعشت في مجتمع البنت تتزوج اول ماتبلغ ويفضلون بنات ال15 الين ال19
في الزواج
ومجرد ماتدخل البنت عمر العشرين تصير مهدده بخطر العنوسه وتصير امها تاخذها معها كل مناسبه عشان تنخطب
وطبعاً اي بنت تتعدى العشرين بالنسبه لهم هي رسمياً عانس
انا تزوجت بعمر الثلاثين وراضيه بنصيبي ومقتنعه فيه
والحمدالله عشت احلى سنوات عمري اللي هي العشرين بدون اي مسؤوليه كنت دائماً انظر لزواج الثلاثينيه بإيجابيه
بس مجتمعي هدم هالنظره بعيني
دائماً ينظرون لي اني عجوز ! مع ان الثلاثين سن الشباب حتى اهل الجنه كلهم عمرهم واحد وهو 33 ! هذا اكبر دليل انه عمر الشباب والنضج
واللي اعرفه ان جمال الشخص يكتمل في الثلاثين
بس مجتمعي ينظر لي اني عجوز منتهية الصلاحيه .. مع ان حتى المرأه الكبيره بالسن محد له حق انه يسلب منها فرحتها وسعادتها واقبالها على الحياه لمجرد انها كبرت
في مناسبه قريبه كنت صابغه شعري اومبري ولابسه وكاشخه كأي شابه بعمري
ولما دخلت اسمع من قريباتي يقولون بوجهي وبكل وقاحه جت العجوز المتشببه !
واخت زوجي واللي مارزقها ربي بطفل الا بعد 7 سنوات من العلاج تقول لبنات جالسين معها " مسكينه اللي تتزوج بالثلاثين مايمديها تجيب ولد وتربيه الا وهي عجزت قبل لا هو يكبر "
وانا قاعده واسمع واعرف اني المقصوده بالكلام لأن كلهم عشرينيات اكبر وحده فيهم ماتتعدى ال26 واطفالهم حولهم
طيب وش ذنبي انا اذا جا نصيبي بهالعمر ؟
كنت راضيه وقانعه بعمري ومبسوطه فيه بس مجمتعي جاب لي الاحباط
كرهت الكشخه والطلعه والجمعات والناس بسبب كلامهم .. كيف اجيب لي مجتمع جديد !
مع ان الحمدالله مرتاحه في زواجي واهلي ناس متفهمين وحنونين بس مجتمعي تفكيره ان الثلاثينيه لازم لبسها مايتعدى الجلابيه ولازم تلف الطرحه وتجلس مع الحريم وتكون كل سوالفها انتقاد للبنات الصغيرات
طيب واذا انا انظر لنفسي اني صغيره ليه تخلوني غصب اعيش نفس منطقكم وتفكيركم
والله تعبت لدرجة كلامهم صار فعلاً يأثر فيني وصرت اشوف نفسي عجوز …
وش اسوي من فين اجيب لي مجتمع جديد ؟ كيف ارجع احب الكشخه والحياه والطلعه وما احس ان العمر فاتني واني كبرت
والاربعين مو سن عجز يعني بالعامية مانقول عن ام الأربعين انها عجوز ..!!!
وانتي بداية الثلاثين ؟
امس طلعتي من العشرينات ؟؟ياشيخه خافي ربك ؛(
احلى عمر عمر الشباب لاتقتلينه
وقلتيها بنفسك إعمار أهل الجنة 33ليش الله اختار لهم هالعمر اذا مو عمر الشباب ،،
وربك شوفيني حلفت بعدين لما تدخلين الأربعين والخمسين بتندمين انك فرطتى بهالعمر الجميل ..
واللى يقولون لك كذا غيرة وحسد اكيد انتى أنيقة وجميلة ولا ماقالوا هالكلام
استمتعي بشبابك ماراح يتحسر بعدين غيرك 🙂
واضحكي
لا تخلين يهدمون ثقتك بنفسك
اكيد غيرانين منك
|
المشاركة الأصلية كتبت بواسطة ~Romantic~
 تعرفي خلي كلامهم تحت حذائك ودوسي عليه
واضحكي لا تخلين يهدمون ثقتك بنفسك اكيد غيرانين منك |
.
.
وصدقيني من زود الحسد والغيره يقولو هالكلام
لانهم اتزوجو بدري واتحملو المسؤوليه بدري وماعاشو حياتهم
وانتي عيشتي حياتك والحمدلله اتزوجتي
ماعليك من الي يتكلمو والي اتزوجت بدري وخلفت ضامنه انها بتعيش بكرا!!!
عقول غبيه ومتخلفه
لاتنزلي نفسك لمستوى تفكيرهم اسحبي عليهم ولاتجلسي مع ناس متخلفه
وداااايم اضحكي واقهريهم
ليس من الضروري أن تكون كل نظريات المجتمعات صحيحة
اعملي كل شي أنتي مقتنعه به مادام ذلك لا يُغضب الله عز وجل
انبسطي وعيشي حياتك ، اسعدي نفسك و زوجك ولا تلتفتي للمتشائمين ، نعم متشائمين ما دامت نظرتهم للشباب تقتصر على عمر معين
الشباب هو شباب الروح ، لذلك أنا لا أحب أن نطلق على أي شخص مصطلح عجوز ، فلا أحد عاجز إلا من جلب العجز لنفسه
كوني كما تحبين ، ابتسمي للحياة لكي تبتسم لك ، وحصني نفسك لا تعلمين فقد يكون بعض المنتقدين يحسدونك على شيءٍ ما
أتمنى أن تراجعي نفسك وتثبتي لنفسك أنك ما زلتي صغيره ، حدثي نفسك و حاولي زيادة ثقتك حتى لا تتأثري بكلام أحد
قد يكون هذا صعب في البداية ، فكلام الناس مزعج فعلاً ، ولكنك مع الوقت سوف تعتادين على ثقتك و روحك الجميلة
أتمنى لك السعادة ……… 
واستمتعدتي بجسمك المشدود و تتكشخي وتلبسي الي تبين
ماعليك منهم انا صغيره عمري 22 وعندي طفلي
وكل يوم اتمنى اني ماتزوجة بدري وانتظرت اقل شي
يصير عمري 27 او 28 واتزوج
هم عندهم اطفال كل شي فيهم توسع
ولا انبسطو بالانوثه وكل شي ترهل بسبب الحمل والولاده
كله غيره منهم اسفهيهم
قولي اقل شي انبسطة بشبابي
وتدلعة ولين الحين جسمي جسم بنت بنوته
مو عمري 20 وجسمي جسم عجوز مترهل
بينقهرون والله اشوف البنات واذكر الله عليهم
حتى بنات اكبر مني ولا تزوجو
اجسامهم تجنن وعاشو صح مو انا
كل حياتي صارت تنظيف شغل كرف تربية اطفال
همي كله بالبيت وبعيالي انسى نفسي مرات من التعب
اقهريهم وبعد قولي الاجنبيات مايتزوجون الا بعد 30 ليش
قولي الحمدلله انو ربي رزقك بالعمر هذا
عشتي كل المراحل بحياتك بنتظام وبالفطره
وشبعتي مراهقه وتكشخ واستهبال بنات واكبر همك اظفري لا ينكسر
والحين دخلتي الحياه الزوجيه بعقل رزين وثقل وثقافة بنت واعيه
قادره تديرين حياتك بنجاح ان شاءالله
وشغفك بالامومه اكثر من بنت 20
راح تبرعين بتربيه
وعمرك جميل م شاءالله تبارك الله
كنت اتمنى اكون مثلك اعيش الحياه صح واشبع من مراحلها
بتوفيق حبيبتي واقهريهم لا تنسين ههههههههه
اجعلي هذا ردك