السلام عليكم اخواتي انا بدخل بموضوعي على طول انا تعبانه نفسيتي مدمره محطمه مجروحه خلاص معد اقدر اكمل حياتي احس الدنيا قفلت ابوابها بوجهي ربي يشهد اكتب هالحكي ودموعي ماليه عيوني والغصه بحلقي والحرقه بقلبي والقهر بموووت حره وقهر على حالي وحياتي معد بقى عندي صبر وش اقول وش اخلي انا وحده تيتمت من ابوي من كان عمري 12 سنه وتولاني اخوي هو كان مطوع من النوع اللي ماسك وشاااد بالحيل يعني ماعرف باب البيت الا لمدرستي بعد مادخلت المتوسطه شفت عالم غير الي انا عايشته حطيت فبالي اتزوج علشان اشوف الدنيا ولمن صار عمري 17 سنه تزوجت ياناس وانا ماعندي الخبره الكافيه بالزواج وماستمريت 4 شهور وتطلقت وانا حامل ورجعت لاهلي ورجعت المعاناة والحكره بالبيت والهم ،،، تخيلو لمن طلقني جاب اغراضي ورماه بالشارع قدام الجيران حسبي الله ونعم الوكيل والله وقتها بغيت اروح لولا ستر رب العالمين وقعدت اعاني حملي لوحدي كنت ابكي ومنعزله عن العالم من اللي شفته وبعدها وقت ولادتي ياانا عانيت فيها مايعلمه غير ربي وولدت واخواني كلمو ابو الولد كان يقول لهم لاتشغلوني اذا ماتبون الطفل ارموه بالزباله لاحول ولاقوة الابك يارب وقعدت اربي ابني لوحدي لين بلغ عمر سنه وجا ابوه يشوفه وطالب بتحديدزياره له وصارياخذه مني والله اعلم بحالي وقاسيت الظلم منه لاينفق عليه ولايهمه لين بلغ الطفل3 سنين وانخطبت لواحد كان متزوج ولا علمني الله حسيبه وبعد مانكتب الكتاب بشهرين جتني رساله على جوالي تهديد من زوجته انها ماراح تتركني وكانت تقول دخلتي النار برجولك والله وصارت المشاكل بيني وبينه وطلقني واحنا لسى بكتب الكتاب بعدها بسنه انخطبت واتزوجت واشترطت ابني ورضى فيه لكن بعد الزواج طلع قليل اصل وكان يمد ايده على ابني الي عمره 4 سنين وكان يعايرني اني مطلقه مرتين يشهد علي الله اني ماينقصني شي لكن قدر الله وماشاء فعل كنت اصبر اصبر ومرت شهور وهو يضرب بالولد لدرجة يطلع الكدمات بوجهه والله وبعدها معد قدرت استحمل قلت خلاص برجع لاهلي استحمل الحكره والتهكم ولا الولد يتعذب قدامي ولمن رحت لاهلي عرف اخوي اني حامل من زوجي وطردني ورجعت للزوج الظالم وكان يسحبني يبغى الي فبطني ينزل الله لايسامحه والله معد تحملت العيشه رحت اشتكيت للجيران وكان ياخذ جوالي ويخبيه ويقفل علي باب الشقه كان ظالمني ياعالم ومحد وقف معي والا حس فيني لو ابوي موجود ماشفت كل هذا ومرت الشهورولمن وصلت بالشهر الخامس رماني عند اهلي وتركني بدون طلاق ورجع لزوجته الاولى وكان يرسل لي مسجات اهانه الله لايسامحه ومتحمله وساكته مين ياخذ حقي؟؟ ومرت الشهور ورحت اولد وبعد ماعرف جاني وشاف البنت وطلع ولا شفت منه ولامصروف ولانفقه وقعدنا ست شهور فبيت اهلي ورجعني شهرين عنده وكان يهددني فبنتي يبغاني اسكت على الضيم والا يجي ياخذها يقول بوديها لاهلي وانا خلااااص خذت اغراضي ورحت جري لاهلي وقعدت ابكي عليهم قلت ارحموني فكوني منه معد اقدر اقاوم عيشته قهر وبعدها تطلقنا وقعدت اربي فبنتي وابني الله يخليهم لي لين مابلغت البنت 3 سنين كان شهر يصرف عليها وشهر لا وكنت ساكته لييين قبل اسبوعين جاء واخذ بنتي خذها من حضني حرمني منها الله يحرمه الجنه بكيت عند اخوي ترجيته يجيب بنتي راح قدم على المحكمه وتعرفون مواعيد المحكمه بهذلوني رايحه جايه وبنتي لها 15 يوم بعيده عني والله العظيم لااكل ولاانام تعبت الله وكيلكم تعبت رحنا للشيخ وجا اخوطليقي قال بجيبها وبعدها سحب علينا كلمت ابوه وبكيت وترجيت قال بجيبها وبعدها انقلب وتغير وقام يسبني ويدعي علي حسبي الله عليهم الظالمين يارب انت تبصر وتعلم وشصار فيني من الضيم راح عمري بكي وقهر وحسره ماعشت ابد سني يااجاويد الله وبعدها قال الشيخ بيجيبها عن طريق الشرطه لمن سمع طليقي هالحكي حضر المحكمه وقال اطالب بزيارتها كل جمعه وتنام ليوم السبت والاسبوع اللي ماخذها فيه راح ادبل الايام بالنوم عندنا ووافقت وانا مجبورا علشان ترجع بنتي لحضني وبعد يوم جاب البنت اقسم بالله انها مبلوله بالبول اعزكم الله وحرارتها مرتفعه ونحفت بنتي انسل حالها ضميتها وقعدت ابكي زي المجنونه ماصدقت رجعها من بعد المعاناة والبهذله واليوم الظهر اخذها ماصدقت رجعت لي والله ماصدقت وقال بيخليها يومين اخوي واقف معه انا بينقطع قلبي وينكم يالامهات تحسون بمعاناتي قلبي كله جروح وطعنات وقهر وضيم وظلم سنين راحت وانا اقاسي واعاني وربي معد فيني افكر اترك البيت واخذ عيالي واروح اي مكان اوانتحر بس من بيرعاهم وينتبه لهم مالهم احد امي كبيره وتعبانه ومحد يحن عليهم والي ذابحني اكثر اني اسال بنتي من يلبسها ويغير لها تقول سيتي تقصد الخدامه ياخذها من حضني ويخلي الخدامه ترعاها قلبي محترق محترق والله مخنوقه وقفو معي ارشدوني دلوني معد فيني عقل ولاتفكير وعندي عضويه هنا بالمنتدى من يدلني على محامي ينصفني من هالشي يعلمني احاكيه بالخاص الله يخليكم حسو بمعاناتي ادعولي بالفرج ادعوووولي لاني خلاص انتهيت
دنيآ قاسية ، مححد يرحم
وججعني قلبي عليك
الله ينتقم من كل رجال ظلم حرمة ضعيفة
الله ينصرك على من ظلمك.ويجمعك بعيالك يا رب ويوفقك
قلبي معك
ادعي ربك يفك كربك
اتمني من الاخوات يساعدوك
ما فى غير الدعا فى جوف الليل اختى
شوفي يابنتي الله اقسم راح ينصر المظلوم
والله راح تشوفينهع بعينك عاجلا غير اجل
عليك بالدعاء واكثررررري من الاستغفار يابنيتي كثير بنيه الفرج
واحسني الظن بالله يكون عند حسن ظنك
بنتي اتصلي على حقوق الانسان اتصلي عليهم
ووضحي مشكلتك وهم بيكفلون لك محامي وغصبن عن ابوهم يصرفون عليك
وانتي بنتي قدمي على حافز والجمعيه لك يمشي وخاصه للمطلقات يمشي لك راتب من الحكومي
وانا الليله بدخل اجيب لك رقم حقوق الانسان ان شاء الله
واسال الله العلي العظيم ان يفرج كربتك
اكثري من قول ( لااله الا انت سبحانك اني كنت من الظالمين ) الرسول صلى الله عليه ةسلم اقسم من قاله مسلم موقن بالاجابه راح يستجاب له
انتظريني يابنيتي
ياليتك تعلميني باي منطقه انتي
هل انتي بالرياض علشان اطلع لك الرقم
تحملتي كل هذا وانت بعمر الزهور
تحسبي عليهم وربي بنصرك
دعواتي لك
https://saudiwomenrights.files.wordpr…/02/nomore.jpg
…
موقع اكتروني لجميعه حقوق الانسان ارسلي شكوى لهم
https://nshr.org.sa/
…
1919 << بامر من خالد الفيصل
للعنف بكل حالاته ام زوجه ابن ابنه
شفته بموقع فماجربته ان شالله يكون مفيد لك