يومــــــــــ @ام راشد @ ـــــيات . منو بتبذا وياي للجادات فقـــــط -للحمية و الرشاقة 2024.

,,,السلام عليكمـ ورحمهـ الله وباركاتهـ ,,

اشحالكم عساكم بخير ..

ان كنتي مستعده للكلام اللي بكتبه كملي الموضوع ..
وان كنتي تحبين نفسج كملي الموضوع ..

وان كنتي تقدرين تتحملين وتصارحين نفس تقدرين تكملين ..
وان ما كنتي تقدرين .. فاسمحيلي انتي داخله الموضوع .. بالغلط ..

قررتي تقرين الموضوع .. حياج ربي .. فديتج الموضوع شوي طويل .. سامحيني بس هالمصلحتنا ..
فضي عمرج وصفي مخج .. وسمي بالرحمن وابدي اقري الموضوع بكل رواااق عشان تعطينه حقه ..

بسم الله الرحمن الرحيم ..ابدا بها موضوعي ..

في لحظة صراحه بيني وبين نفسي .. وقفت وصرخت لــــــــين متى .. فقررت ..

اني اصارح نفسي لنفسي .. قررت اني ابدا .. قررت اني ما استسلم ..
وعشان ابدا صح وعشان اوصل للي اباه صح وعشان اتحدى كل الحواجز صح .. لازم لازم لازم

احــــب نفســــي ..
لان ببساطه اذا ما حبيت نفسي .. ما بقدر اعطيها حقها .. ما بقدر اوصلها للي اباه ..

اسمحولي بكمل الموضوع بصيغة الجمع .. لن ادري ان كل وحده دخلت هذا الموضوع .. تبا تستفيد ..
تبا توصل لهدفها .. تبا حد يكون وياها ..
تحس ان في حد صدق يعاني نفس معاناتها ..
تبا تكون اميره … اميره جدام الكل .. جدام اهلها .. ريلها .. ربيعاتها .. الناس اللي تفهمنا واللي ما تفهمنا ..

تبا اتوقف كل وحده غلطة في يوم من الايام ع جسمنا سواء بكلمه ولا بنظره ولا تطنيزه ..

كلمه صريحه لكل من غلط علينا في يوم من الايام ..
نعم صح نحنا متان لكن داخلنا قلب ولا كل القلوب ..
نعم صح ان شخصيتنا بالنسبه لهم منخمده تحت هالمتن لكن لحظه شخصيتنا موجوده لكن للاسف عماكم المتن عنها ..
نعم لنا مشاعر واحاسيس غافلين عنها انتوا بسبب المتن ..
نعم بسبب حكمكم علينا من متنا نسيتوا انا بشر لنا احقيه في كيف نحب يكون جسمنا ..
لنا الاحقيه في اذا كنا راضين عن جسمنا ولالا ..

والحين كلمات لنا نحن ..
لين متى .. لين متى ونحنا جي .. محبوسين داخل اجسامنا ..
مانقدر نعيش مثل الناس .. مانقدر نستانس
لان ببساط في كلمه بعد الوناسه بتجرحنا والسبب المتن ..
لين متى وقياساتي كلها لارج واكس لارج و4 اكس لارج و7 اكس لارج ..
لين متى وانا في العزايم البس كنادير سواء مخور ولا مغربي جني ام 50 سنه ..
لين متى وانا اذا فصلت موديل لمناسبه .. يقولون لي حلو الموديل بس متنج مخرب عليه ..
لين متى وانا اذا سرت ابا اشتري بدله ..لازم اسمع تعليقات ..
(( هالقصه ما تنفعج .. هالكرشه متى بتخوز .. هالفجره ولا هالروج ولا هالزنود مخربات عليج .. البدله حلوه بس مب حلوه ع جسمج لانج دبه ))

وطبعا هذا شي من ولا شي من الكلام اللي نسمع بس والله صدقهم
لين متى ..لين متى .. لين متى .. ليــــــــــــــــــــــــن متى ..

لين متى ونحنا نحاول في هالرجيم وهاك .. ماخلينا دايت ما مشينا عليه ..
لكن ببساطه ع الحرمان اللي نحرمه عمارنا ما نتهنى وينزل وزنا .. وان نزل اسبوعين ولا شهر رد ..
لين متى
ونحنا من نسمع ان العيد قرب ولا عدنا عزيمه مهمه ولا عرس مهم نركض ونكتب موضوع بنااات بسسسرررعه ساعدوني عندي اسبوعين عن عزيمه وابا انزل كم كيلو ..
ولا عدنا عرس وابا انزللللللل بسرعه ..
بنات انا مستعده احرم نفسي من كل شي الا الحلاوه
ولا بنات عرسي عقب شهرين وابا انزل 20 كيلوا ..
مستعده لاي شي .. ((هني عاد لو اقولها رجيم الماي بس تشربين ماااي ووجبة الغدا بتسويه تدرون ليش لنها تبا تكون اميره في عرسها ))

ولالا خلنا اني للمعرسات ..
بنات بيلز ساعدوني ريلي جرحني والسبب جسمي ..
بنات ريلي مب راضي عن جسمي ..
بنااات تعبت من نظرات ريلي وتجززه من الرظوف اللي بجسمي ..

صح ولا انا غلطانه ..
اذا نحن نفسنا ليش كل الاشياء .. ليش نخلينها مطنزه للي يبا .. ليش ما نقدر انقول لهم بس يكفي ..
ليش مانثبت لهم العكس ليش ما
نوقف ونصدمهم باللي نقدر فيه ..
ليش ما نتغير 360 درجه ولا نرضى بالاقل من ها التغير ..
ليش .. ليش .. ليش نحرم نفسنا من شي يحق لها ..

== احين اكتفي ببهذا الكلام عن نفسنا وانتقل لنقطه ثانيه .. لان كل وحده تعرف نفسها وتعرف وين تبا توصل لكن في المستقبل بكمله ==

احين اني عند نقطه ثانيه ..

يوم اتينا الارداه والعزيمه .. وخلاص نتشجع .. نفكر بالهدف اللي نباه و نفكر باسرع الطرق اللي توصلنا له .. حتى لو كان الحرمان والرجيم المهلك ..

والحرمان وما ادراكن ما الحرمان ..
الحرمان خلاني احس اني في سجن ما اقدر اكل اللي اباه الحرمان خلاني اكره كل الرجيمات
الحرمان خلاني احس ان ان كلت ولا ما كلت نفس الشي
اه بس
والرجيم .. يلعنه .. يهلكنا ع الفاضي ..
نحرم عمارنا ونتبه .. وعقب اسبوعين هلكنا تعبنا والنتيجه يا مرضيه ويا مغضبه ..
وتمر الايام ولا ننزل وان نزلنا عقب اسبوعين ولا شهرين ردينا زدنا ..

ليش ليش كل ها ..
ليش ادور ع رجيم الماي ولا رجيم التمر ولا رجيم الاندموي ولا رجيم الكيبوهيدرات ولا دشتي ولا البروتين ولا اكتز ولا فصيلة الدم ولا الكميائي ولا ولا ..
ليــــــــــــش ونحن نقدر انزل بدونهم وبدون الحرمان ..

ليش انفكر انسير عن شركات الدايت ترشن .. من رايت بت ولالايفلي و سنتر دايت و نيوتشرن وووو الخ

ليــــــــــــش نحنا نقدر نخسر وزن بدون ما ندفع هالبيزات ..

ليش نفكر بتحزيم معدة و تحويل مسار وتدبيس معدة وبالون معدة و بربط المعده ولا جهاز ال ( COOL TUCH ) ولا …ولا …

ليــــــــــــش و نحنا نقدر نخسر وبهالمبلغ نشتري به ارقى الثياب والماركات لنا ولجسمنا ..

ليش ندور ع حبوب تسد الشهيه ولا غيرها من الادويه ونحنا واقفين بس ندور ع الحل السريع ..
ليش ندور ع الشي السريع مع انه الشي السريع يردنا اللي ورا بسرعه ..

خلونا نبدا بقوه .. بشي يديد علينا .. تعبنا من التكرار والروتين في الرجيمات والحوسه بينهم ..
انا قررت ابدا بنظام .. نظام اسمه
عالم جديد .. تحدي جديد .. بدايه جديده .. شخصيه جديده ..

بتحول لنقطه ثالثه ..

الاداره .. العزيمه .. القوه ..الارداه .. الصبر .. طولة البال .. ومجهود بسيط ….
هالاشياء بتحقق لج اللي تبينه بدون اي خساره وهالكلام كوني متاكده منه 100 %

الاداره :
لازم لازم تتعلمين اديرين حياتج الغذانيه ..
يعني لازم تعرفين وتتعرفين اكثر ع اللي تاكلينه وبتاكليه .. وع اذا ها الشي قياسه يناسب لهدفج ولالا .. مثلا يتي بتتغدين والغدا فيه عيش لازم تعرفين القياس اللي تسمحين لنفس بانج تاكليه ..

العزيمه و الارداه :
ماا اتينا من هني والطريج .. ولا بتينا اذا تريناها اتينا.. نحنا اللي نخقها .. نحنا اللي نبنيها فينا .. ماعندج عزيمه يعني ما تحبين نفسج يعني ما بتين تكونين احسن من الكل ..
تبين الارداه حققيها لنفس بنفسج … مثال بسيط امسكي ورقه وقلك واكتبي فيها عندي عزيمه عندي اراده اقدر احب نفسي اقدر احقق اهدافي كرري كتابتها 100 مره
وتمي كل يوم تكتبين هالشي وكل فكري انا اقدر انا عندي عزيمه انا عندي اراده .. ياج الشيطان وقالج لا ما تقدرين اكسريه ولا تخلينه يقدر ..حركه ثانيه عقب كل صلاه مثل ما تستغفرين 33 مره كرري هالجمل 33 مره ..

القوه :
بدونها ما بتقدرين اتكملين ..
بدونها ما بتقدرين توصلين لهدفج .. بدونها ما تقدرين تسوين اي شي لنفسج اللي تحبينها ..
انتي محتاجتلها اكثر من ما هيه محتاجه لها .. انتي قويه وتقدرين بس لا تخافين ابدي وبتشوفينها تزيد مع الايام ..

الصبر:
الصبر الصبر الصبر .. ماتدرون ان حلولنا كلها فيه .. لو اخترنا النظام الصح ومشينا عليه وصبرنا ع المده اللي بنحتاجها عشان نوصل لهدفنا .. وبدونه ما بنقدر نوصل للي نباه ..

طولة البال :
لازم انطول بالنا .. في كل شي .. نطول بالنا ع كل انسان يبا يحطمنا .. نطول بالنا عشان نوصل لهدفنا نطول بالنا عشان اتي اللحظه اللي نكسر كل من غلط علينا في يوم من الايام ..
لازم انطول بالنا .. لان ماشي ايي بسرعه ..
انتي بتردين تبنين جسمج من اول ويديد يعني لازم شوية وقت .. مثلا احين يوم انشوف بنايه يبنونها نعرف ان يبالها فتره لين ما تخلص اقل شي 12 شهور اللي هو سنه .. نفس الشي جسمنا يباله وقت .. لا يقل عن 5 شهور ..

لازم نلتزم من هالاشياء عشان نقدر نكمل .. مشوار هدفنا ..

واحين اني للحظه وللسؤال اللي اكيد من بديتي تقرين الموضوع وانتي تكررينه كيف ياترى كيف اقدر احقق هدفي .. كيف اقدر اوصل لهدفي وكيف اقدر اكسر كل من غلط عليه بيوم ..
وادري بعد بيي ع بالكم العنوان شو يخصه في المتن ..
واحين بشرح لكم كيف وليش و بحط لكم النظام اللي حطيته لنفسي لاني احبها وابا اخليها احسن شي ..

اول شي .. وانا احصو في المنتدى بين اقسامه .. داايما اشوف ..
ابا حل لجسمي ..
ابا حل لشعري ابا حل لبشرتي .. عرسي قرب ..
فقلت خلني افتح موضوع اجمع فيه كل ها الاشياء يجمع بين هالاشياء .. مع شي يقربنا من ربنا ..
لن مهما نسوي نحنا مقصرات في حق ربنا ..

واحين بخبركم بنظامي .. وكل وحده مستعده تبا تنظم لنظامي وجــــاده تراسليني بالاشياء اللي ابا

يلست اشخبط وافكر .. قلت لو عرسي عقب 7 شهور شو ابا يتغير فيني واذا ابا اغير لازم يكون قبل في وقت كافي لا يقل عن 5 او 7 شهور
وطبعا نادر الخطبه وهالسوالف تستوي بسهوله بمعنى ياخذون وقت اطول ..
((ليش اخترت العرس لان كل بنت تحلم بها اليوم ووتحلم تكون صدق اميره فيه ليش اخترت 7 شهور لان في نظري اقدر اغير اشياء وايد فيه هال7 شهور )) ((هذا بالنسبه للعازبات ))

بالنسبه للمتزوجات
(( طبعا ما تبين ريلج يشوف غيرج ..
وتبين تكونين كامله مكمله جدامه من كل النواحي .. وها السبب لوحده كافي ))

واحين اني لنظام حياه يديده بدايه يديده هدف يديد ..

1- الهدف :
حددي الهدف ( من 5 كيلوا في الشهر )
يعني اذا وزنج 70 حطي اي وزن تبين يوصلج .. واقسميه ع كم شهر
مثال : وزني انا
وزني 91.8 طولي 145 ..
الوزن المثالي بين 45 و 55
راضيه عن نفسي تمام الرضى ب55
يعني لازم انزل 35 الى 40 كيلوا
40 كيلوا بقسم كل 5 كيلوا في شهر ..
اذا زاد لا باس بس المهم انزل 5 كيلوا في شهر
يعني انا احتاي 8 شهور .. صح وايد لكن بكون مرتاح وانزل ع راحتي .. والنتيجه روعه باذن الله

اني للرجيم ..
الرجيم اللي بتنبعه .. ماشي رجيم ..
صدق ماشي رجيم بتمشين عليه محد بيقولج هذا كليه وهذا لا تاكلينه

تخفيف مع قوه ..

يعني اكل واكل اللي في البيت واحد وما بتضطرين تعزلين اكلج ..ما بتضطرين تطلعين لعزيمه وانتي تحاتين شو بتاكلين .. واهم شي تنسين انج تسوين دايت ولا رجيم انتي تغيرين اكلج للصح وتخففين عشان تكونين صحيه ..

مثال : ريوقنا اليوم بلاليط .. باخذ لي ملاس واحد بس ويا كوب الحليب بس .. او باخذ لي 2 توست اسمر ويا جبن او لبنه دايت ..غدانا اليوم : عيش وصالونة دياي ..
باخذ لي كاس عيش بس ويا صدر ديايه او جوانج وياسلطه ولا روب عشانا اليوم : سندويجات همبورجر ..
بدل لا اقلي الهمبورجر بسويه بالبخار وعقب بحط خاشوة زيت زيتون وبحمره با بالفرن او ع التوستر .. بعد ما ننسى وجبتين سناك : الاول بتكون الضحى : يابسكوت مع الجاهي او فاكه او صلب حلاوه
الثانيه بتكون العصر : جبس ولا حلاوه بس كيف يعني كيس ليز الحجم الصغير واذا حلاوه مثلا توكس باخذ صبع واحد بس كتكات باخذ صلبين بس كندر بينو باخذ واحد بس
نوع ثاني من الحلاوه مثل جلكسي تقسمينه 2 يعني 3 حبات بس
او كندر فاكتوري حبه وحده بس وجي
النوع الثاله مثلا انا من الي يحبون الحلاوه مااحب الفواكه باخذ توكس صبع الصبح صبع العصر بس ما
اكلهن مره وحده لازم واحد صبع وواحد المسا مب انقص ع عمرنا وناكلهن مره وحده
ونضيف
واحد دايت سفن ولا بيبسي و كوب عصير طبيعي واحد في
اليوم مثلا الغدا سفن العشى عصير طبيعي
طلعتي لمطعم ويا هلج اول شي اجلبي الغداء عشا و العشا
غدا يعني العشا تغديه لان العشى دايم اخف في المطعم دوري اقل شي فيه دهون مثلا الفهيتا طبعا بيي ويا الطيق بطاط حددي كم حبه بتاكلين مثلا 6 حبات وخلاص استوب

الرياضه :
ماينفع اتسوين اي رجيم او اي دايت او اي شي حتى التخفيف و ينزل الوزن بدون الرياضه ..
عندج من 45 دقيقه لين ساعتين .. خصصي ها الوقت لنفسج ولا تنسين لجسمج حق في وقتج ..
اقل شي للي بتشارك ويانا 5 مرات في الاسبوع 45 دقيقه ..
انا بسوي رياضه لمدة ساعتين 6 مرات في الاسبوع ..

الماي :
لازم نشرب ماي قد ما نقدر دبة الماي تستوي مثل مبايلج .. مثل ما تتحركين والفون وياج دبة الماي جي .. اشربي قد ما تقدرين ..
واكتشفوا في اليابان ان شرب 4 كاسات ماي ع الريج ينزل الوزن بسرعه ..
ماتقدرين هاالطريقتين .. عندي طريقه ثانيه واسهل ..
عقب كل صلاه اشربي كاس ماي وجي بتكونين شربتي 5
كاسات ماي وزيدي كاس قبل الرقاد وجي انتي شربتي
6 كاسات ماي في اليوم وعقب فتره زيدي
كاس ونص كل مره وجي بتكونين شربتي 7كاسات ونص ..
زيدي نص في اي وقت استون 8 كاسات ماي في اليوم وهذا يكفي ..
في ماء زمزم او دبة ماي اللي بشرب منها طول
اليوم بقرا سورة الزلزله بنية الله يزلزل الدهون اللي جسمي ..
وكل ما اي بشرب برد اقرى فيها .. بس من الفليل بجهز لي
دبه وبقرى فيها الزلزله 7 مرات .. وقرايت السوره وصتني بها يدووه ربي يطول بعمرها قالت لي اقريها بنيه يخوز عنج الباس فانا قررت اقراها بعد عن المتن
واخر شيين لازم نسويهن ونحرص عليهم ..

الريوق و الرقاد
لازززززم نتريق مافي مجال للتغيير خاصه اول ساعه من قومتنا يعني نشيتي 8 عندج لين 9 عشان تتريقين
الرقاد : 1 الصبح بالكثير انتي راقده و10 بالكثير الصبح انتي ناشه ..
انا الريوق ابما اني اداوم فاول ما انش بتريق قبل لا اطلع
و ناويه ارقد 1 وانش 8 للداوم وايام ما عندي دوام انش 10
هاي نصيحتين عطتني اياهن
وحده ويوم التزمت نزلت ولاول مره في حياتي كيلوين في اسبوع واحد

خلصنا من الجسم وعرفنا ان في 5 اشياء ان مشينا عليها بننزل
التخفيف + الرياضه + الماي + الريوق + الرقاد .. بحقق هدفي..

اني لــ (( بياض روسيات ))دايم اقرى البنات يدورون شي يبضهم .. واللي عندها مناطق داكنه وتبا تفتحها ..
وتقريبا اقل مده للخلطات تاخذ وقتها 3 شهور بس نحنا بنسويها لمده نفس مدة التخفيف ..
اختاري خلطه او زيت وواصلي عليه لا تقطعينه

وانا اخترت زيت اللوز و الخروع لرموشي ..

اني لــ (( شعر هنديات ))
منو ماا يحب الشعر الطويل الغليض ..
وبعد عشان يعتدل شعرنا ونحس بالفرق يبا له 3 شهور من العنايه ع الاقل
حددي يوم اتزيتين شعرج لمدة ساعه الا ساعتين
انا اخترت يوم الخميس والزيت اللي بستخدمه زيت دابر املا وحده
تقول جربته ع ان ريحته خايسه بس نتايجه تبدا من 3 اسبوع من اللاستخدام

وجربته لمدة شهر وحسيت ان شعري ردت له الحياه فعشان جي قررت اكمل عليه ..

واحين اني(( للقرب من ربنا ))
1- كل ليله نقرى سورة البقره للفوايد اللي فيها .. سمعت خالد جبير يقول اللي يستعصب عليه شي ولا يبا علاج لشي يقرا البقره كل ليله ..

2- بكرر ((ربي اني لما انزلت علي من خير فقير )) وهالايه سبب من اسباب فتح الرزق بكررها بكذا نيه نية الله يرزقني الجنه و يرزقني العزيمه والقوه والجسم الرشيق و نية الزوج الصالح

3- في ماء زمزم او دبة ماي بقرا سورة الزلزله بنية الله يزلزل الدهون اللي جسمي ..

4- الاستغفار .. سبحان الله له مفعول عجيب .. من غير انه سبب من اسباب الرزق يسهل عليك الامور ..

5- احيانا ما اصلي في وقت الصلاه من ابدا نظامي ببدا التزم بوقت الصلاه .. وربي يعيني ع نفسي الاماره بالسؤ .. وجي اكون تقدمت كم خطوه للامام ..

اما الجمال الطبيعي :: فمافي وحده منها ما فيها ها جمال لان خلقت ربنا كلها جميله ..

واحين اخر شي :: اللي تحب تبدا وياي لازم تمشي ع كل اللي قلته ..
ان كنتي جاده .. ان كنتي واثقه بنفسج ..
حيــــــــــــــــــــــــــــــــــــــاج الله

اسمج في المنتدى : @ام راشد@
وزني 101طولي 170..
الهدف الاول 95
الهدف التاني 90
التالث …85
والرابع ..80
والاخيييييييييييييييييير 75 باذن الله
فبحتااج ل6 اشهر ,,,,, كل وحده تكتب كذا وكم المده
2- بياض روسيات (( كل شي يخص البشره ))
بستخدم مثلا زيت ولا خلطة
3- شعر هنديات ((كل ما يخص الجسم ))بستخدم مثلا زيت ولا خلطه
قرب لربي ((بتلتزمين بقراية سورة البقره و الاستغفار ))
+اي شي ثاني تبينه ..
4- (( اي شي تحبين تسوينه لفتره ))
مثلا انا ابا اعتني بضروسي فضفت ها الشي لجدولي

وطبعاا الشروط اللي بنلتزم بها …

*ان محد يعرف انج اتسوين دايت او مخففه ..
لان ان خبرتي حد بيركزون عليج ومن يشوفونج تاكلين حلاوه
او اي شي فيه دهن بيعلقون وبيخربون عليج مزاجج ..

* وان اذا خبصتي لازم تعاقبين نفس ب 45 دقيقه رياضه
ع وقت الرياضه الاساسي يعني اذا خبصتي لازم تتخلصين
من اللي خبصتيه بزيادة وقت الرياضه

انا ,,,,,,,,,,,, باديه من الثلاثا الي طااف ,,,
كان وزني 101

وان شا الله كل ثلثــــــــــــاء الوزن …
ان شا الله يكون

ويوميااتي وتقريري لكل يوم اهني

المشاركة الأصلية كتبت بواسطة ((بياض الثلج)) مرحبا ام راشد الى الامام ان شاء الله ويارب انك تخسين واخس انا معك ياااااااااااارب

مرحبتـــــــــــــــن بياض الثلج