السلام عليكم بنات انا مشكلتي ما اعرف كيف اشرحلكم هيا ؟
انا الحمدلله جميييييله وهدا اكتر حاجه تجدب الناس ليا انا
وانا والله مو قصدي اني اصير مغرورة لا والله انا اي وحده تتعرف عليا ما يتوقعني كدا
وطبعا ماقلت هدا الكلام الا عشان تفهمون كل شيء وتفهموني صح
على العموم انا كارهه شخصيتي لاني احيانا لما اتكلم مع ناس ولو لاول مرة والله نضراتهم ليا ماتعجبني لاتفهموني غلط نضراتهم يعني: يحرام او ياحبيبتي.. مع اني واللهي كبيرة وعمري 18 يعني فاهمه كل حاجه ومع هدا بتلاقا هدا النضرات انا فاهمه وافهم حتى ايش قصدهم من الكلام ماني بزرة لكن يقهروني كدا واحس من دا الشي ضعفت شخصيتي
والي زودها بنت خالتي هدي وربي احسها شايفه نفسها عليا تحسسني دايما انو شخصيتها مرة حلوة وانو كل الناس يهتمون فيها وانها افهم واثقف مني بس طبعا مو كدا تقولي انتي كدا وكدا.. لأ بكلامها الغير مباشر وحتى نضراتها يعني لما متلا صحبتي تتكلم عني مع بنت خالتي وكنا متخاصمين على شي (وعادي انا وصحبتي مع بعض حلوين وزي العالم نتخاصم ونرجع عسل) المهم تجي هيا بنت خالتي تطالع في صحبتي وبعدها تطالعني بنضرة يحرام او اش تحسين او تقول لصحبتي بنضراتها الله يعينك عليها .. وانا ادعي انو يارب صحبتي ماتنتبه او تعطيها اي اهتمام لاني احبها والله ومالي غيرها وهيا الوحيدة الي احس كل ابداعاتي تطلع معاها المهم جات صحبتي مرة قالت ايش بينك وبين بنت خالتك؟ انا مرة قرفت نفسي وما اباها تعرف عشان لا اصغر بعيونها وتكرهني مهما كانت اقرب الناس ليا انا والله مو ضامنه واخذت درس كمان قبل يعني مو اول مرة (تعرفت على صحبة وصار نفسس الشي وفضفضت لها وكرهتني وفوق هدا صارت تمشي مع بنت خالتي) بنت خالتي هيا قدي بس مو بفصلي وانا كارهه العالم بسببها وربي اكره المدرسه ونفسي انقل منها بس عشان اول شي صحبتي وما ابا افارقها وبيننا ذكريات ومواقف مضحكه واشياء كتيرة يعني حسيتها تفهمني اكتر شي وبالعافيه حصلتها (بس كأأأأنه دي الفترة صار فيها برود.. وبس ادعي انو يارب اتوهم) وتاني شي المواصلات يعني هادي اقرب مدرسه
وتاني شي ماما وربي ما اعرف كيف اقولها لكم وكيف حتفهموني؟ خاصة انو في غيري من البنات الي حطو مواضيع زي كدا هنا وانتوا ماتصدقونهم وكانكم عايشين معاهم
انا ماما هادي والله ماتحوبني دايما عكسي ولاعمرها مدحتني او حضتني او حسستني باني بنتها او اي شي يعني كاني وحده غريبه وساكنه عندها وربي لو بنت عمي الصغيره تجي عندنا ماتصدقون بس! وربي تتكلم وتاخد وتعطي بالكلام وتحسسها انه مافي احسن منها واحيانا تجلس تمدحها وماشاء الله عليكي ومدري ايش وربي اصير نمله في هدا الموقف اكره نفسي وازداد ضعف فوق هدا وربي ماتتخيلون.. لما متلا اقولها رأي ماتتقبله ابدا حتى ماتناقشني ولما امزح تقول مو وقتك او فايقه يعني ماتجاملني حتى ماتفهمني وربي احسني من جد غريبه مانعرف بعض ماتعرف ايش احب وربي احيانا اتفشل منها عند الناس
ومنها صرت ما اعرف اتكلم واخد حقي ما اعرف اخد واعطي بالكلام إلا الي اعرفهم ومن زمان ..يعني لو وحده بنت معجبه او حتى غيرها جايه تسألني ارد برد رسمي وربي وحده مرة لما غبت سألت صحبتي انتي ليش تمشين مع هادي المغرووورة؟ انا ديك الساعه وربي ضعت ما ادري ليه عقول الناس متحجره احيانا يعني لما يشوفو وحده حلوة وماتعطي وجه معناتوا خلاص متكبرة مايعرفوا انو شخصيتها له دخل.. اهم شي الجمال يعني هيا كامله وتونس وتضحك وكل حاجه لاوالله زي زي اي وحده من البنات ماله دخل الجمال اهم شي شخصيتك واسلوبك وبصراحه الحين صايرة عند الناس مالي وجود اختفيت وسحت زيي زي الجدار حتى ما اقول رأي وبعض الناس لما اتكلم معاهم احس بشي غريب وكاني اتكلم استغفر الله مع رجال يعني كدا شعور خوف وتوتر يعني زي كاني لما بكلم خطيبي لاول مرة عارفين كيف الشعور؟ زي كدا مع انها حرمه زي زيها بس مني قادرة
حتى جدتي والي تقولي تغييييرتي ما اعرفك وربي اصيييييييييح انا.. من زمان كنت احبها واضحك معاها واساعدها واتحرك واسرح لها شعرها واسولف معها وكل شي دحين مرة غير تقولي مااعرفك حتى ماتعطيني وجه ولاتسمعني حتى لو جبت لها شي طلبتو من اي احد وقمت انا ماتقبلوا وتصرفني وربي اصيح انا بداخلي وانكبت وانا دحين مني قاددددرة خلاص حتى ما ابغى اروح عندها كافي الي فييييني مُت انااااا محد متقبلني ويحبني
حتى لما ماما بتروح لجدتي(ام امها طبعا حتى الي فوق جدتي ام ماما) وتقولي يلا قومي واقولها لا واصرفها تقولي انتي كانو ماعندك جدات انتي وحده غريبه عليهم مالك داعي
انا بس استناها تروووووح وعبي البيت سيووووولل
لا وكمان قبل فترة انخطبت وياحضي اروووح ملح بس.. والله ياناس ما اقدر اوافق فوق هادي الضروف ادا اهلي وانا كدا اجل مع زوجي واهله كيف؟؟؟؟؟؟؟؟؟ لاتقولون بتتغيري ولا اي شي واصلا محد راح يوقف معايا سواء بيوم زفتي حتى يواسيني كلهم بالكدب واقفين زينه محد يجي يفرحني وغيره وربي ما ابا احرق نفسي كمان كفايه الي فيني وربي تعبببببببت من دا التفكيييييير .. ودحين قبل يومين انخطبت كمان وبابا يزن فوق راسي هوا وماما اعرفهم يبون الفكة مو الفرحة لااااا الفكة بس انا اقولهم لا وإلين دحين يقولون الرجال مستعجل ومدري ايش وانا اصلا حتى الاستخاره ماصليتها ما ابغااه انا عايفه نفسي وكارهه العالم مييييييييييييييته ميتهه
سبحان الله وبحمده
سبحان الله العظيم
وبنت خالتك طنشيها شكلها غيرانه منك وامك وجداتك الله يعينك شكثر امهات كذا اسلوبهم ما يعرفون يعبرون عن حبهم لعيالهم هذا مو عناته انها ما تحبك مستحيل ما في ام عاقله ما تحب عيالها
واستخيري بموضوع الخطبه اكثر من مره
الله يكتب لك الي فيه الخير