الجاتوه السواريه من مطبخ الشيف مونى بالصور -من مطبخي 2024.

السلام عليكم ورحمة الله
النهارده ان شاء الله هقدملكم اسهل طريقة للجاتوه السواريه وعملته بالكيك الاسفنجى العادى
هنعمل 3 كيكات 2 فانيليا وواحدة كاكاو هقول مكونات الكيكة الواحدة وهنكررها مرتين
مكونات الكيكة الاسفنجية:
كوب دقيق
نصف كوب سكر
3 بيضات كبار
فانيليا
نصف ملعقة صغيرة بيكنج بودر
(وطبعا الكيك الاسفنجى مفيهوش اى مواد دهنية يعنى زيت او زبدة او حتى حليب)
مكونات الحشو:
3 كوب كريم شانتى خام
2 ونصف كوب حليب بارد
فانيليا
7 ملعقة كبيرة سكر بودرة
مقادير صوص الكاكاو:
كوب كاكاو خام
كوب سكر
2 ملعقة كبيرة زبدة
فانيليا
كوب وربع حليب
وللتزيين:
فارمسيل الوان
فوندان ملون
شوكولاته بيضاء
جوز هند اصفر
(وطبعا التزيين حسب رغبتكم)
الطريقة:
فى اناء هنحط البيض والفانيليا

ونضربهم بمضرب البيض لمدة لاتقل عن دقيقتين وهيعملوا رغاوى

ونضيفلهم نصف كوباية السكر

ونضربهم على سرعة عالية لمدة لاتقل عن 5 دقايق متواصل
هيبقى الخليط لونه فاتح وكريمى وكثيف

ونضيفلهم الدقيق والبيكنج بودر بعد ماننخلهم

ونقلبهم برفق بالاسباتيولا من تحت لفوق

لغاية ماتختفى كل كمية الدقيق وتمتزج المكونات

ونحط خليط الكيك فى صينية مربعة على ورق خبز ونوزعه بالتساوى

ودخلته فرن حرارته هادية وطبعا كل شخص فرنه غير التانى وطلعته لما استوى
ولازم الكيك يبقى لونه ابيض ومنسيبش الجناب تحمر

وقلبته على ورق خبز ونشيل ورقة الخبز اللى استوى عليه بحذر وبرفق
ونكرر كل الخطوات اللى فاتت وهيبقى عندنا كيكتين فانيليا

وهنعمل كيكة الكاكاو بنفس المقادير اللى فاتت بس هنشيل معلقة كبيرة دقيق وهنحط بدالها معلقة كبيرة كاكاو خام
وهنحط الدقيق والبيكنج بودر والكاكاو على خليط البيض والسكر بعد ماننخلهم

ونقلبهم برفق بالاسباتيولا من تحت لفوق

لغاية ماتختفى كل المواد الجافة وتتجانس المكونات

ونحط الخليط فى صينية مربعة على ورق خبز

وندخله فرن حرارته هادية ونخلى بالنا عشان الكيكة لونها غامق فمتتلسعش مننا ونختبرها ونطلعها

ونقلبها على ورق خبز وبكده بقى عندنا 3 كيكات 2 فانيليا وواحدة كاكاو
ودى من اسهل الطرق للكيكات الاسفنجية واحلاها طعما
وفى الغالب بنريح الكيك فى التلاجة قبل مانشتغل بيه بس بما ان الجو بارد جدا فانا محطتوش فى التلاجة بس ريحته 6 ساعات قبل مشتغل بيه
وهنحضر الكريم شانتى اللى هنحشى بيه الكيك هنحط كل المكونات بتاعته ونضربهم بالمضرب الكهربائى لغاية مانوصل للقوام المطلوب ونجيب كيكة فانيليا من اللى عملناهم
نقسمها بالنص بالظبط وهيبقى عندنا شريحتين

وهنحط على واحدة منهم كريم شانتى

ونفردها بالاسباتيولا ونحط عليها الشريحة التانية ونفرد عليها كريم شانتى

وهنجيب قطاعة على شكل دايرة ونقطع الكيك اللى حشيناه

وهنجيب الفوندان الملون نفرده بالنشابة عشان نقطعه بالقطاعات ونزين بيه

وكل قطعة قطعناها على شكل دايرة هنجلسها بالكريم شانتى ونزينها من الجناب بالفارمسيل ومن فوق بالفوندان الملون
تااااااااااااااااااااااااااااابعونى

وهنجيب الكيكة التانية الفانيليا ونكرر كل اللى فات بالنسبة للتقطيع والحشو بس المرة دى هنقطعها بالقطاعة اللى على شكل مربع

وبردو هنجلسها بعد مانقطعها بالكريم شانتى وهنزينها بالشوكولاته البيضا واللولى الالوان ودى هتبقى جاتوه سواريه وايت فورست
وطبعا هتقلولى هيفضل كيك بعد مانقطعه بالقطاعات ده هقولكم فى اخر الموضوع هنعمل بيه ايه مفيش حاجة هتترمى او ملهاش لزمة
كده خلصنا جاتوه الفانيليا وزيناه هندخل على كيكة الكاكاو
فى كسرولة هنحط كل مكونات الصوص مع بعض وممكن نستبدل الحليب بميه

ونحطه على نار هادية مع التقليب واول مايغلى هنطفى النار

وهو سخن كده هنصفيه عشان ميبقاش فيه اى كلاكيع

ونسيبه يبرد على جنب بس مندخلوش التلاجة
وهنجيب كيك الكاكاو نقسمه بالنص بالظبط وهيبقى عندنا شريحتين

وهنزود على الكريم شانتى شوية حليب ومعلقة كبيرة كاكاو خام وهنحط على شريحة منهم كريم شانتى كاكاو

وهنحط عليه الشريحة التانية ونغطيها بالكريم شانتى

وهنقطعها بالقطاعة اللى على شكل قلب

وهنجلسها بالكريم شانتى وهنغطى الوش بصوص الكاكاو اللى عملناه

ودى هنزينها من الجناب بجوز هند اصفر وعلى صوص الكاكاو هنعمل خطوط شوكولاته بيضا سايحة وطبعا هيفضل صوص كاكاو ده هنحطه مع بواقى كل كيكة اللى قلنا عليهم فى الاول عشان مفيش حاجة تترمى وهيبقى طعم الجاتوه واحلى وكل كيكة ياجماعة ادتنى بالظبط 8 او 9 قطع جاتوه
وده الشكل النهائى
دى اللى عملناها اول حاجة وزيناها بالفارمسيل الملون والفوندان



وده جاتوه الوايت فورست



وده جاتوه الكاكاو بصوص الكاكاو



وبالهنا والشفا