السلام عليكم ورحمة الله وبركاته
النهرده جيبالكم طريقة بسيطة جدا لمحشى الكرنب للمبتدئات والعرايس وكل اللى مش بتعرف تعمله
المكونات
طبعا كرنبه
مقادير الخلطه
كيلو طماطم
بصلتين متوسطين
حزمتين كسبرة خضرا وحزمتين بقدونس
7 كوبايات رز
توابل للخلطة /فلفل-ملح-رشة شطة-بهارات-قرفة-كمون-كسبرة ناشفة
طريقة الخلطة
نغسل الرز كويس
نحط البصل والطماطم ع النار شوية وبعدها البقدونس
نطفى النار ونضيفلهم الرز ونقلب ويعدها نحط التوابل ونقلب
نيجى بقى للكرنبه
هتشيلى ورقة ورقة من الكرنبة وتحطيهم على الترابيزة
وقبلها تكونى مجهزة حلة كبيرة فيها ميه ومعلقتين كمون وفصين توم دى اللى هنسلق فيها ورق الكرنب
نغطيها ونسيبها تغلى ولما تغلى نحط فيها كل ورقة لوحدها لمدة نص دقيقة او اقل عشان متتقطعش منك فى اللف
ونشيلها ونحط اللى بعدها وهكذا لغاية مايخلصو
انا عنت الورق فى بولا فى التلاجه عشان مش هحشيه فى نفس اليوم
نيجى بقى للتقطيع
هتجيبى الورقة وتفرديها على طبق وتقطعى العرق التخين اللى فى النص
بعد كده هتلفى الورقة على شكل اسطوانة
وهتقطعى الاسطوانة دى
طبعا الكلام ده هتطبقيه على كل الورق
هتجيبى اى جزء من اللى انتى قطعتيه من الاسطوانة
هتفرديها هتطلعلك ورقة طويلة
هتقطعيها عشان تاخدى كل ورقة من اللى قطعتيها وتبدأى تحشيها
هتجيبى الورقة وتفرديها على الطبق اللى هتحشى عليه ولازم وانتى بتحشى عروق الورقة تكون بالعرض زى كده
تجيبى كمية الخلطة اللى انتى حباها وتحطيها على طرف الورقة
فيه ناس بتحب تحط كتير وناس لاء
تمسكى الخلطة بالورقة وتضغطى عليهم وتلفى عشان يبقى الصوبع متماسك
وتكملى لف
وتحطى الصوابع فى الحلة بشكل دائرى او بالشكل اللى يريحك
انا كنت فارشة الحلة ورق الكرنب الاخضر اللى بيبقى على الوش بس الخطوة دى
على حسبك انتى يعنى ممكن نستغنى عنها
وهكذا لغاية ماتخلصى الحلة بس سيبى فيها مسافة عشان الشوربة وعلى فكرة غالبا الكرنبة بتعمل حلتين واحدة متوسطة وواحدة صغيرة
نيجى بقى للسواء هتسخى الشوربة اللى هتسقى بيها الكرنب
وهتحطى الحلة ع النار وتحطى على الوش معلقة زبدة وتغطى الحلة لمدة 10 دقايق
وبعدها تحطى الشوربة بعد ماتكون غليت تحطى لغاية ماالشوربة تبقى فوق
الكرنب
وبعدها تحطى طبق على وش الكرنب يكون قد الحلة
الخطوة دى مهمة عشان الطبق بيكبس الشوربة مع البخار وتخلى الكرنب يستوى كويس
وتسيبيه على نار هادية لمدة ساعة ونص ممكن اقل او اكتر انتى لازم كل شوية تكشفى عليه وتحطى الشوكة فى واحدة وتشوفيه استوى ولا لاء
وبالهنا والشفا
سهله وحلوه كثير
يعطيك العافية اختي
انا بمووت بالكرنب
تسلم ايدك اختي
بس ياريت لو تكتبي اسمك على الصور
لحفظ حقوقك
شكرا الك
ما شاء الله وتبارك الرحمن يا شيف موني روعة تسلم اناملك ..
يمي يمي بجد يحتاج شغل وتعب بس الطعم ولا أروع ..
باصحة والعافية ع قلبك واحلى تقيم لك مني
ع الوصفه الرآئعه
لكن ضروري كتابة اسمك واسم المنتدى على الصور~~لانها من شروط مطبخ العضوات~~
يقيم بالنجوم
تحيتي لك
وبالنسبة لكتابة الاسم على الصورة
ياريت واحدة من المشرفات تتكرم وتكتبلى الاسم ع الصورة لأنى فى الحقيقة مش بعرف
يسلمو
اموت فيه شهيتيني
اعمله