وينك ياخلي احتجت لك مالقيتك -همس القوافي 2024.

هذا انت ياقلبي توسدت الآلآم
وهذا انت ياعمري غدى الهم بيتك
وش فايدة نركض ورى كذب الأحلام
راح العمر واحنا ياليتك ياليتك
ياوقت مايكفيك تجرح من اعوام
تجرح ولا يكفيك ماقد عطيتك
الحظ طايح من عرفته ولا قام
يا حظ لو هو في يديني رميتك
ياما شربت المر من كاس الأيام
يا حسرتي ياوقت يومي نخيتك
راح الحبيب اللي خذا قلبي هيام
وينك ياخلي احتجت لك ما لقيتك
ياحيف وعدك بالوفا ليه ما دام
وأنا الذي من كل قلبي هويتك
حبك رفعته من على قلبي وسام
وارخصت كل الناس يومي شريتك
وأثرك تماشيني على درب الأوهام
تلعب على قلبي وأنا اللي وفيتك
ماقصرت يمناك خلتني حطام
فعلك وأنا استاهل مدامي بغيتك
أهديت لك عمري وتهديه الأعدام
أدري بنارك والبلى اني رضيتك
ياما نهيتك وانت تلزمني الزام
ياقلب طاوعتك ولا قد عصيتك
قد لك ثلاث سنين مبلي ومنضام
في حبها وأنا من أول نهيتك
هذي جزاتك تسهر الليل ما تنام
نت البلى ماهوب انا اللي بليتك
ياصاحبي تبغى الصراحه( من العام)
فعلاً أبي انساك بس ما نسيتك