اللهم اني استودعك نفسي في الاسلام 2024.

السلام عليكم اخواتي
ان شاء الله تكونو جميعا بخير

صارت معي حادثه من كم يوم خلت عيوني تدمع و قلت ما اعظمك يا ربي و ما اكرمك.

انا بطبيعتي كتير حذره و ما بحب اخالف القانون بالمره. تكاليف المواصلات عنا كتير مكلفه يعني بحدود ال 100 دولار بالشهر و اختي طلعت متفوقه بمدرستها فأعطتها المدرسه بطاقه بتسمحلها تستعمل المواصلات مجانا لمدة 6 شهور. اختي عندها بطاقه تانيه من قبل و مش بحاجه للبطاقه يلي اعطتها اياها مدرستها. عندنا بالقانون كل واحد المفروض يستخدم بطاقتو. فأنا فكرت ليه ما استخدم بطاقة اختي. عندنا بالباص في جهاز بنحط البطاقه عليه و بيسحب الفلوس يعني سواق الباص مش حيعرف اذا البطاقه يلي بستعملها الي او لأ. فقررت استعمل البطاقه و اتوكل على ربنا بس كنت خايفه انكشف لإنها الغرامه كبيره غير البهدله. دخلت الباص و قلت "اللهم اني استودعك نفسي" يا رب اعمي عني عيون اي شخص ممكن يأذيني او يعطيني مخالفه.

سبحان الله مع انها ما بتصير غير مره وحده بالشهر و الشرطه بتختار باص بشكل عشوائي, بيعملو كبسه يشوفو لو كان دافع اجرة الباص او لأ. سبحان الله شرطة الباصات اختارت الباص اللي انا فيه. انا شفتهم طلعو بالباص و حسيت نفسي دخت. بديت اقول لا حول ولا قوة الا بالله, لا حول ولا قوة الله بالله. شرطة الباصات عندها جهاز بتدخل البطاقه فيه بتطلع هوية صاحب البطاقه و لو ما كانت مطابقه لهوية الشخص بتعطيه غرامه.
انا قلت خلاص اكيد حأكل الغرامه و البهدله. سبحان الله, بقدرة القادر, كان الباص مزدحم شويه و بالظاهر كانو مستعجلين. لفو الباص بسرعه و ما حطو بطاقة حد بالجهاز. بس تأكدو انو كل شخص معاه بطاقه او وسيله تانيه دفع فيها (اللي بيدفع كاش بياخد ورقه).
لفو الباص و نزلو و انا لسا مش مستوعبه الموضوع. الشرطه هدول بدورو على وسيله بس يوقعو حد فيها و ما بيرحمو حد. اللي صار يمكن ما بصير كل كم سنه مره بس صار معاي.

سبحان الله لو ما قلت اللهم استودعك نفسي و لو ما دعيت و لو ما قلت لا حول ولا قوة الا بالله يمكن كنت تبهدلت.

فأخواتي بنصحكم قبل متقدمو على اي عمل خايفين منو, قولو اللهم اني استودعك نفسي. ادعو ربنا يحميكو و كونو على يقين انو ربنا قادر و رحمته كبيره.