بنت الكواكب قوافي 2024.

الهبايب مرّت اوراق الشجر في كل ديره=والقلوب اللي تواري برقها يفضح رعدها

لاتعــذّر يـازمن بان الهوى والحب عيـره=والمشاعر آدميّــه لــو جحدها من جحــدهــا

سيرة العشْق ودروب العشْق والعشاق سيره=مادرى العاشق وش اللي قبلها واللي بعدها

والهوى ما يبخس الرجّال قدره في ضميره=لـو لحقْه من المشـاريه الكثيـره في عددهـا

والصبايا فتنة الما لا شكا الضامي غديره=وآآآه يالما في عروق الضامي اللي ما وردها

لـن بغاها مغفـره هبّت لهايب زمهـريره=وان بغاها ذنب في باقي ذنـوبه مـا وجدهـا

حيرةٍ صارت حياتي كلها من عقب حيره=ليـن جتنــي بنت ابـوها والمـلا كـلٍ نقـدهــا

استثارتني شعور وقلبي ادنى ما يثيره=ولا بغيت اهج عنها طمّعتني في رغدهــا

كنّها ورد وحَرمه الوقت مبداه وعبيره=لين جيت وكنّي اجمع روحها وانثر جسدهــا

ويوم جتني وسْجدت كل الجباه المستخيره=استخرت الله بين فراقهــا ولا وعـدهــا

ودلّني قلبي على درب الوصال وقلت خيره=فرصةٍ وامسح دموع احزانها وارسم سعدها

بعد ما هي تشتكي لي من ردى علّه خطيره=خطوةٍ تاقف بدنياها وخطوه في لحدها

والحقيقه ما قدرت اعقل من الخافق بعيره=كن وقتي ما تمكّن فالحبال اللي عقدها

حدّني عمر العطش والليل وهمـومٍ كثيــره=فالثياب الضافيات وفالزمان اللي حردهــا

ضاقت اعشابي على اصحابي وربعي والعشيره=كن ما لاعشابي الخضرا مكان الا بلدها

واستلـذيت بهـواها لذّة نعاس الظهيـره=والظهيـره مــا يجيب علومهــا الا من رقدهــا

وحدّني جفنٍ يداعب طرفها رقة حريره=والعقيق اللي فقد عقله على خَمرة شهدهــا

من حلاها لو يصب الماي ما تسمع خريره=واخسارة كل طفلٍ ما شرب غالي نهدها

كنها بنت الكواكب والملا قامت تنيره=امها القمرا وابوهـا الشمــس والغيمــة مهدهــا

والله انّـا لاتلاقينـا بعـد فتـره قصيـره=كنهـا بنتي من الفـرحه وانـا كنّـي ولـدهــا

والخفوق اللي تولع في هواها وش يضيره=غير لا نكّد عليه البعد واسرف في نكدها

يشهد الله فاضت انفاس القصايد للغريره=واشهد انه ما يجمّلني قصيدي لن فقدها

ولا عليّ من الهبايب دامها في كل ديره=والقلوب اللي تواري برقها يفضح رعدهــا

//

\

//

وسلامتكم

:
.