السلام عليكم يا حبيباتي
لفيت كتييييييير قبل الولادة وكان نفسي اسمع نصيحة من اخت مجربة ابرة الظهر
فقلت اني لازم بعد ما جربتها اكتب تجربتي في ولادتي لتستفيد بها كل حامل محتارة في هذا الموضوع…
في ولادتي قبل شهرين قررت اني اولد مع استعمال الابرة لاني كنت هاموت من الخوف من الالم… كانت الدكتورة قالتلي ان المية حوالين البيبي قليلة وان اي نزول مية اجيلها على طول عشان لو نزلت كلها مش هينفع اخد طلق صناعي وهيكون خطر على البيبي…المهم في نص التاسع بالضبط جالي مغص خفيف ونزل عليا مية مع كل مغصة شوية مية ينزلو…رحتلها العيادة قالتلي روحي المستشفى وانا هاكلمهم… ورحت حوالي الساعة 8 غيرولي هدومي و دخلوني غرفة العمليات عشان احط الابرة وبعدين دخلت الطبيبة التخدير ومعاها ممرضة الاتنين صغيرين جدا شكلهم متخرجين جديد او حاجة ..و شغالين كلام وضحك وتهريج وهما بيعملولي الابرة..منتهى الاستهتار وقلة الذوق
المهم…اديتني مخدر موضعي في ظهري و بعد ما ثبتت الابرة اديتني جرعة تجريبية وبعد حوالي 5 دقايق برجدت جدا و جاتلي رعشة قوية جدا كانت هتوقعني من على السرير…ناديت عليها راحت اديتني حقنة كدا سكتت الرعشة شوية وبدأت تجرب تشكني بابرة في رجليا وبطني تشوف هاحس ولا لا؟
كان الجنب الايمن فاقد الاحساس تماما …. اما الايسر …….كان في احساس بالالم..صحيح مش كامل بس الم…حاسة بشكة الابرة, طبعا اتصدمت لاني كنت قرات عن بنات خدرتلهم شق واحد بس..هيا الابرة عبارة عن جرعة ثابتة من المخدر بتندفع خلال انبوب وصولا الى الظهر كل فترة زمن محددة بواسطة جهاز معين…..المهم قالتلي ماتقلقيش وزودت جرعة البنج بايدها غير الجهاز لحد ماراح الاحساس في اليسار… وطلعتني الاوضة
علقولي الطلق الصناعي لاني كان طلقي ضعيف جدا والرحم فاتح 2 سم بس…..وابتدا ابتدا ابتدا… ابتدا المشوار……الجنب اليمين كان رائع…اما اليسار فكان الالم يفاجئني طبعا انادي الدكتورة… والهانم طبعا تيجي جري لانها عاملة حاجة غلط تزودلي الجرعة لحد ما الالم يروح وتمشي….وهكذا طول الليل بقى لما اديتني كمية مخدر رهييييييبة من الساعة 9 للساعة 6 الصبح وكان الرحم برضو 2سم
لحد ما طلع النهار وزودولي الطلق الصناعي ضعف الاول,و الدكتورة الهانم شيفتها خلص و جه دكتور بدالها… طبعا لان مش شغله كان لما يجيلي الالم انادي علي النيرس تناديله يجي بعد ساعة..ساعة ونص…وانا طبعا بموت من الطلق
على الساعة 8 ونص كان بقى الرحم 4سم لحد الساعة حوالي 11ونص كدا كان بقى الرحم فاتح حوالي 7 سم فنزلت العمليات طبعا الدكاترة شغالين في التوسيعات على اساس اني واخدة حقنة الظهر لحد مالقوني هموت من الوجع ادوني حقنة كدا في الكانيولا نمت بقى ومحسيتش غير وانا في الاوضة تاني وبيقولولي اصحي شوفي النونو,, قمت اغسل وشي لقيت وشي منتفخ جداااااااااا قالولي من كتر المحاليل والمخدر
فنصيحتي لك حبيبتي…الابرة تحفة وعملت معايا واجب جدا بس للاسف في جنب واحد…فاذا قررتي تاخديها فالطبيب ثم الطبيب ثم الطبيب… لازم يكون معروف ومجرب ومتمكن…..وبالنسبة لبعد الولادة بيكون في الم مكان الابرة طبعا بس عادي يعني محتمل وبيروح بعد ايام وصداع برضو بيروح ويجي كدا اول كام يوم بس
والحمد لله… كانت ولادة صعبة
بس اللهم لك الحمد…والله والله والله الامومة تستاهل اكتر من كدا بكتييييييييير
ربنا يرزق كل اللي تتمنى يارب
منقوووووووول للفائدة
اختك ميمي
والله قومك من الشر ورزقك باحلى مولود نساكي عذاب الولادة وساعتها
الله يسهل لي وعلى الجميع بحق النبي محمد واله
الله يطعم الجميع الحمل عاجلا وليــــس اجلا بحق حبيبنا محمد صلىا الله عليه وسلـــــــــم
|
المشاركة الأصلية كتبت بواسطة المحبه للخير
 يعطيك العافية على النقل المفيد
اختك ميمي |
الله يعافيك ياقلبي
|
المشاركة الأصلية كتبت بواسطة رحمة من الله
تسلمي
والله قومك من الشر ورزقك باحلى مولود نساكي عذاب الولادة وساعتها الله يسهل لي وعلى الجميع بحق النبي محمد واله |
الله يسلمك حبيبتي
باقي ماعندي بابي بس هذا نقلته
لكم علشان تنتبهون على انفسكم