نتبهوا ياعرايس من هالمشغل طريقة جديدة 2024.

:7_asmilie
مع قدوم العيدوالكل رايح جاي الي يبي يكمل اغراض من السوق والي عنده زواج والي متحمس للخطوبه..الكل فرحان وسعيد والله يديمها فرحه للجميع ياااااارب..قبل كم يوم انعزمت عند احد اعز اصدقائي وانا جالس اسولف مع صديقي..قلت لصديقي احس ان البنات والاطفال والامهات فرحتهم اكثر من الرجال بالعيد ..اكيد العيد فرحه للجميع بس احس ان الحريم والاطفال اكثر..قال لي صدقت ..والله يديمها فرحه ..وفجاه تنهد؟؟ قلت عسا ماشر …قال احيانا ياخي فيه بشر تقتل فرحتك بيوم فرحتك..استغربت وقلت وشلون؟؟قال لاتذكرني وخلني ساكت..قلت لالالا..غريبه منك هالكلمه بس عسا ماشر ..قال اذا مصر تعرف بعلمك ..مو عن شي ولكن تاخذ احتياطك بالمسقبل..
:Icon214:
القصة يا طويل العمر حصلت لأعز أخوياي تقدر تقول انه اخوي ماجبته امي ويمكن حصلت للكثير بس يمكن مافيه احد تكلم..الزواج ياخوي يوم فرحه للجميع وخاصه العريس والعروس..والحمد لله امورنا تمام..لكن موضوع عكر مزاج خويي وزوجته ..بعد مارجع من شهر العسل راح للاستديو الي جابهم بالزواج اقصد المصوره وطلبوا الصور ..قالت ماخلصت ورجعو عقب اسبوعين وقالت توها..طال الانتظار لاالصور ولا الفيديو خلص..بعد شهرتقريبا او اكثر راحت زوجته وتفاجأت بالصور كلها سواد بدون فلالالالالالاش واغلبها رايح نص الراس ولا الصور بالسقف ؟؟تضايقت وراحت لصاحبة المحل وكلمتها باحترام وهدوء عن رداااااءة الصور وان هذا اليوم ماينعاد وشلون ترسل مصوره ماتعرف تصور ؟؟مع ان زوجته دافعه نص المبلغ حق التصوير لها ومعاها الفاتوره؟؟ردت عليها وقالت انا شفت الصور وكلها اوكي ..استغربت زوجته وقالت وش الحل ؟؟قالت لها ارجعي بعد اسبوع وبتكون اوكي..رجعت بعد فتره ولكن للاسف الصور حاولت تخليها بيضااااااا بس مازالت رديئه ..واهم الصور ماصورتها كامله… يعني وقت الشبكه وتلبيسها ماهو باين الا يد فقط بدون ملامح والباقي اظن المصوره قاعده تتفرج علي المعاريس وناسيه الكاميرا؟؟؟رجعت زوجته للمشغل الي فيه مصوره وسألت المصوره عن سبب رداءة الصور؟؟المصوره الي فيه غير الي جابتها بالزواج !!!المصوره تعاطفت معاها وقالت بصراحه انا كنت اصور بزواج ثاني في الرياض ويوم جيتوا تحجزون عطتكم وحده ثانيه؟؟استغربت زوجته وقالت من الي جت اجل ..واكتشفت ان صاحبة المشغل ماتبي تضيع مبلغ وقدره وارسلت الي تنظف المشغل والثانيه تكنس بعد الزباين(تخيلواااا رداءة النفس) وزوجته شافتهم يوم راحت المشغل وهم ينظفون وعرفت من المصوره الاصليه حتى انها كانت مستاءه جدا من تصرف كفيلتها وتقول انها متضايقه من الصور ورداءتها وحاولت بكل جهد حتى انها تشتغل فوق الدوام عشان الكفيله قايله لها انتهي من هالصور وصلحيها بقدر المستطاع..مع ذلك رضو بالامر الواقع وقالو( قدر الله وماشاء فعل)…املنا بالفيديو..انتظرو الفيديو شهرين وماخلص وراحت زوجته للمشغل وطلبت تشوف الشريط والمفاااااااااااجأأأأأأأأأه….
1/الشريط مسجل على شريط عروسه من قبل وزوجته شافت الشريط واستغربت اول مافتح الشريط وشافت وحده ثانيه مو هي وبعده بدقايق طلع تصويرهم(اثاريهم مسجلين شريط زواجهم على خطوبه وحده ثانيه بدون مايمسحونه ) عديناها لهم واشوا ان زوجته الي شافته مو احد ثاني
2/زوجته عاقده الامل على الشريط وبتشوف زفتها ودخلتها وطلعتها زي أي عروس تنتظر هاليوم وتحب تشوفه دايم (للأسف)خاب ظنها وتفآآآآآآآآآآآآآجأت ان وقت تصوير زفتها مو مسجل اساسا لا دخولها للصاله ولا خروجها؟؟!!! الكاميرا مقفله ويوم فتحتها صارت بالسقف والمصوره تتفرج …مو حرام ياخذون مبالغ وقدرها وبالنصب
ياناااااااس خافوا الله الدنيا مو تجميع فلوس
3/بعد ربع ساعه من دخول العروس فجأه المصوره تقول الشريط خلص(واكتشفت زوجته يوم راحت للمشغل ان ثلاث ارباع الشريط ماشي (يعني انهم متعودين يصورون الحفلات بشريط واحد واذا يبغون يمسحونه بعد ما ينسخونه على سي دي يخلون الكاميرا مقابله الجدار وهي تشتغل علشان تصور تصوير فاضي ويستخدمون الشريط في حفله ثانية ) يعني يوم بدت المصوره تصور اثاريها تصور بالربع ساعه الاخيره عشان كذا خلص الشريط بدري)؟؟ لا وتقول المصورة للعروس بأذنها ان الشريط خلص!! يعني خبصت الدنيا طيب باقي العريس واخوان العروس من وين يجيبون شريط وهي قايله ان الشريط ساعتين؟؟
ادري ودكم تعرفون وش صااااااااااااااار؟؟
قالت المصورة للعروس مافيه حل الا امسح من الشريط شوي عشان يصير فيه مجال؟؟
طبعا العروس قالت وش تمسحين ؟؟قالت المصورة انا صورتك لحالك كثير وانتي قاعده , بمسح منه واخليه لتصويرك انتي مع زوجك…. قالت زوجته امسحي بس جزء من وقت جلستي لحالي مو شي ثاني …(مادرت العروس المسكينه ان الشغاله الي جايبينها تصور اول مره عشان مايخسرون مبلغ وقدره مافتحت الكاميرا اساسا الا يوم العروس قعدت على الكرسي )
المهم …تضايق خويي وزوجته جدااااااااا من السالفه وراحت زوجته للمشغل وكلمت صاحبة المشغل ولكن بدون مبالاة من صاحبة المشغل قالت بيصلحونه لك ..قالت زوجي بيتضايق من السالفه يعني لاصور ولا فيديو..ردت وبكل جراءة قالت مو لازم يدري؟؟ رجعت زوجته بعد فتره وطلبت الشريط كما هو! ولكن رفضت وقالت انتي مادفعتي المبلغ مع ان زوجت خويي ورتها الفاتوره من المشغل ومكتوب بخط يد عاملة الرسبشن وانها مستلمه نص المبلغ ..غريبه اطباع الناس..وأنكرت إستلام المبلغ!!!! شي يحير بصراحة اول مرة في حياتي اسمع عن صاحب أو صاحبة حلال تتعامل مع الزباين بهالطريقة حتى صاحب البقالة يدور رضا الزبون علشان يجي له كل مرة وهذي صاحبة مشغل يعني مفروض يكون تعاملها أكثر لباقة لان الزبونة دافعه مبلغ وقدره علشان تشوف شي يرضيها مو يكون المقابل تهرب من صاحبة المشغل وتكلمها من طرف خشمها وتتعامل معها كأن هي المتكرمه على زوجت خويي … والله بصراحة عشنا وشفنا !!
يوم عرف خويي أن السالفة راح تطول والتفاهم ضايع قال لزوجتة خلاص خليها تتلف الشريط قدامك وامرنا لله ..رفضت صاحبة المشغل العرض وبدت تتهرب منهم ..وقالت ماراح اسلمكم الشريط ولا راح اتلفه..وتركوا امرهم لله ومالهم الا يقولون (حسبـــــــي الله ونعم الوكيل ) لكن وين الذمه عند بعض المشاغل الي همهم تجميع فلوس وبس وحنا ياغافلين لكم الله …وين الرقابه ..وين الناس اللي تخاف الله.. وين حقوق الانسان…ادري تبون تعرفون أي مشغل …
موقعه بالخبر اسمه( س ن د ي ا ن)
ملحوظة: القصة نقلا عن لسان صديقي (العريس) حرفيا وكنت متابع معه الأحداث اول بأول بحكم صداقتي الأخوية معه وللحين مايدري وش مصير الشريط ولا يدري اني كتبت هالقصة؟؟؟؟؟؟؟

شكرا لك اختي

::

ولا حول ولا قوة إلا بالله على بعض هالمشاغل اللي كل مرة عندهم سالفة

المشاركة الأصلية كتبت بواسطة احساس دمعه :: حسبي الله ونعم الوكيل ومشكوره اختي على التنبيه وان شاء الله الكل ياخذ عظه وعبره من القصه ::

صدقتي اختي الغاليه
احساس دمعه
ان شاء الله الكل ياخذ العبره من القصه

حبيبتي بطاطا
جزاكي الله كل خير
في انتظار القادم من مواضيعك

ظروري
وكذاالمحل يصير مخالف للقوانين اللي فتح على اساسها