مرحبا ومسهلا
*اكيد كل بنت تحب الزين وتحب الريحه الحلوه واللي تثبت عليها وماتروح علطول
* أغلبنا العطر مايجلس عندها اسبوعين اذا طلعاتها كثيره واذا تداوم واذا كثرت شهر 
* ريحة الجسم اللي بالموت تثبت مهما استعملنا من بخاخات جسم فمدتها محدوده
موضوعي اليوم يتكلم عن العطور وكيفية تثبيتها وبعض من الخلطات اللي ريحتها حلوه وتثبت وإن شاء الله يكون مفيد ..
العطور على الملابس ..
بتكلم على شكل نقاط
*تجيبين العطر الفرنسي او أي عطر ثاني … اول ماتشتريه طبعا وتحطينه بالثلاجة لمدة 3 ايام ..
وبعدها تطلعينه وتحطينه في مكان معتم .. مثلا ممكن تحت الملابس او في الخزانة او اي مكان المهم أنه يكون مظلم .. وبعدين تبدأين تستخدمينه وشوفوا شلون تثبت ريحة العطر
وحتى بعد الاستخدام حاولي تخلين العطر في مكان مظلم ويفضل تحطينه بين ملابسك
^^^
بعضكم يمكن معروفه عنده بس البعض مايعرفها وأنا عن نفسي أول مره اعرف هذي الطريقه
*اذا تحبين عطر معين وكان على هيئة رذاذ رشي العطر 3 او 4 مرات في الجو بعدين مري عليه علشان تثبت ريحته << وااااو حسيت دعاية عطرر
*لما تحطي عطر على ملابسك فأكتفي بعطر واحد مو مليون عطر وآخر شيء تطلع ريحه مدري وش تبي
*طبعا العطر له اهميه كبيره من حيث جودته فأحيانا بنات يشترون عطر مقلد ويكون رخيص جدا ومايثبت فيتضايقون ليه مايثبت أكيد العطر الأصلي يختلف اختلاف كثييير عن التقليد في الثبات
يعني عطوراتك خصوصا خليها أصليه ومن مكان موثوق لأن اللحين للأسف في بعض المحلات الكبيره صارت تجيب تقليد وتبيعه بسعر الأصلي فننتبه من هالنقطه بالذات
*اذا تحبي عطر معين اشتري الصابونه حقته أو أي صابونه تحبين ريحتها وابشريها وخليها بين ملابسك علشان تثبت الريحه عليهم
* انتبهووا يابنات ترشي العطر على ملابسك الحرير لأنها بتبقع وماراح تروح أو انك تحطي دهن عود على ملابس فاتحه <<كثير تصير لي
العطر على الجسم
*اول شي اللي بشراتهم جافه لازم يحطون العطر أكثر من مره علشان تثبت الريحه بعكس اللي بشراتهم دهنيه العطر يختلط مع الزيوت اللي في البشره فتثبت مده أطول
واذا يبغونها تثبت ريحة العطر ممكن يستخدمون لوشن على الجسم قبل مايرشون العطر
*بعد ماتتروشين يفضل انك تحطين العطر علطول على جسمك لأن المسام تكون مفتوحه فتمتص الريحه وتخليها تثبت مده اطول
*لما ترشي عطر على جسمك انتظري شوي لاتلبسين ملابسك علطول
لأن العطر الجيد يحتاج له وقت عبال مايثبت
*لما تبخي عطر على يدك لاتفركين يدينك في بعض علشان ماتقتلين الريحه ولا تستفيدين
*غسول الجسم له ريحه مخالفه للوشن الجسم و العطر كمان تكون ريحته مخالفه فيصير عندك كذا ريحه مختلطه وغير مميزه حاولي تكون متناسقه مع بعض أو مجموعه وحده
^^
هذي النقطه أغلبنا كذا
*اللحين حنا في فصل الشتاء وبرودة الجو تقلل ريحة العطر فحاولي تشتري عطر قوي وثابت علشان تثبت بشكل اقوى من العطور الثانيه
*اذا كنتي بتلبسي ملابس حريريه فعطري جسمك قبل ماتتلبسين علشان ماتترك أثر على ملابسك
*اذا حابه تكون ريحتك حلوه وثابته في طريقه سهله وتنفع للعرايس كمان وحتى بعد ماتتروشين تبقى هالريحه
العطر تبعك +البودرة الخاصة فيه+ الكريم + الصابونة …
تروشي بصابونة معطرة من نفس نوع العطر اللي بتستخدمينه بعد الاستحمام
وبعدين حطي على كامل الجسم كريم مرطب خفيف واحسن شي كريمات لانكوم وكلينك
بعدها حطي بودرة تلك عادية بدون ريحة
بعدين بخي على جسمك بخاخ الجسم من ريحة الورد الطائفي
وحطي على اماكن النبض (الرسغ والرقبه وخلف الاذان ) قطرات دهن عود .
ثم حطي الكريم المعطر تبع العطر على يديك ورجليك
بعدين خلي احد يرش عليك البودرة المعطرة من بعيد ويرشون على شعرك منها أو انتي بس من بعيد لبعيد
والبسي ملابسك وعطريها من عطرك واذا تبين ريحه اكثر خوقاق بخري جسمك وملابسك
وتمتعي بالريحة الزينة وبتظل فيك حتى بعد الاستحمام
*لتعطير المنطقه الحساسه هذي خلطه حلوه وان شاء الله راح تعجبكم وهي مسك أبيض من عبدالصمد القرشي تبشرينه وتخلطينه مع بيبي اويل وشوي من كريم جونوسون الوردي او جلي جونسون واخلطيهم وبعد ماتغسلين أو تتروشين حطيها بس مو تتعمقين لما تحطينها بتشعرين بنظافه وريحه حلوووه
*اذا حابه تحطي العطر على جسمك حطي في الاماكن اللي بترشي عليها العطر فازلين أو زيت زيتون أو زبدة الشيا وأكثر الاماكن اللي تثبت فيها الريحه نقاط النبض هي خلف الاذان ومنطقة العنق
*مره قريت في موضوع طريقه لوضع العطر على الصدر مررره حلوه وهي انك تجيبي بودرة جونسون وتحطي معاها عطر كريمي توت او فراوله تبع مكياجي او بودي شوب ومع عطرك المفضل وتخلطينهم سواء الريحه بتطلع ياسلام وتبقى معك مده
*كمان فيه وحده عروسه لها موضوع قديم تقول فيه بعد ماتتروشي جيبي بيبي اويل ودهني جسمك فيه وبعدين جيبي المبخره وتبخري بتطلللع ريحتك تسططل وبتبقى ريحتك ثابته
^^
عذرا للعضوات بس نسيت اسمائهم جزاهم الله خير
*فيه بنات كثير الله يهديهم يكون شكها حلو ومرتب وتستخدم عطور بس لما تسلمي عليها تكون ريحتها مو حلوه
اهتمووا يابنات بهالنقطه حطي عطر على خدك وخلف اذانك ومنطقة العنق
علشان لما تسلمي على احد تكون ريحتك حلوه وماتضايقي احد بدون قصد
العطر على الشعر
*أغلبنا يرش على شعره عطر فرنسي اللي ترش فيه ملابسها علشان تكون الريحه وااااو بس لما ترشي على شعرك الممسكين اكثر من مرره بيطلع لك خصل بيضاء وشعرك وبيكون باهت علشان كذا استخدمي العطور العربيه للشعرر
مثل المسك الابيض .. العود
واللحين فيه خمريات ريحتها تسططططل وماتأثر على الشعر من العطور الفرنسيه
مثل ريما موجوده عند الماجد
طريقة وضع العطر على الشعر
بعد ماتخلصي مستشوره شعرك حطي الخمريه على شعرك وانتبهي ماتحطينها على الجذور وغير كذا هي دهنية لزجة فبتعطي شعرك لمعه جميله وكمان بتلصق الشعر المتطاير اللي يكون بعد الاستشوار
وطبعا هذه العطور آمنه جدا ولها فوائد كونها طبيعيه .
^^
بس انتبهوا مو تجي وحده تاخذ لي ربع الخمريه وتحطه في شعرها ويطلع مزيت كنه حاطه في زيت دابر املا
*كمان الشعر يابنات اهتمووا في ريحته بعض البنات الله يهديهم مايهمهم ريحة شعورهم ليه كذا
اهتموا فيها والله احيانا لما نسلم على بنات ريحة شعورهم حلبه .. حنا .. ريحه غريبه .. ريحة صبغه
وتصير نفسها هي ماتهتم اصلا مو انها ثابته
تر الشعر جزء منك
فيه طريقه حلوه كاتبتها لهفة الخاطر في موضوع لها جزاها الله خير انك لما تستخدمي خلطة شعر ولها ريحه تحطينها علشا تروح ريحة الخلطه
تقول غرشه مويه وملعقتين نسكافيه رجيهمّ واغسلي شعرتس بعد الشامبوّماراح تبقى ريحة الخلطه ان شاء الله بس حطي بعدها خمريتك المفضللله
آخر الموضوع فيه أشياء مهمه لازم ننتبه لها :
*اكبر خطأ انك تتروشين بالعطر بعض البنات ترش العطر من راسها لين رجولها اكرمكم الله وتكون ريحته قويه مرررره ومزعجه احيانا وهي ياحياتي مجتهده تبي ريحتها تكون حلوه بس ياحلوه خير الامور اوسطها مو ماترشين عطر ابدا او تخنقين اللي حولك
*حطي العطر المناسب للمكان المناسب يعني الصباح اختاري له عطر هادي وناعم ومايكون مزعج وفي السهرات حطي عطر قوي
بس مو تجين االصباح وخصوصا اذا كان داوم وريحة دهن عوود قويه وعطر قوي مايناسب فترة الصباااح ابدا
*النظافه النظافه يابنااااات أهمم شيء تكونين نظيفه وتتروشين بإنتظام وتستخدمين مزيلات العرق وراح تكون ريحتك حلوه بس لاتجين وريحتك مو كويسه وترشين عطر أو بودره معطره وش بتطلع الريحه بتخربي ريحة العطر والبودره تنظفي وحطي البودره والعطر بتكون ريحتك فرررق
* مخرج ..
س/ ما حكم تعطر المرأة عند الخروج إلى السوق وإلى المسجد؟
ج/ لا يجوز للمرأة أن تتعطر عند خروجها إلى السوق أو المسجد, لحديث: (( إذا استعطرت فمرت بالمجلس فهي كذا وكذا يعني زانية )) ]رواه الترمذي[, ولحديث (( لا يقبل الله صلاة امرأة تطيبت لهذا المسجد حتى ترجع فتغتسل غسلها من الجنابة )) رواه ابو داود
اخيرا
*اتمنى وفقت في اختيار الموضوع من زمان بخاطري موضوع يكون مو متكرر فحسيت العطور هو المناسب
*اسفه اذا أطلت عليكم بس الكلام كثير وكل شوي يطلع شي
احترامي وتقديري لكم
رائع طرحك
تسلمي للمعلومة والطرق
مع حبي
"مينو"
ويعطيك آلف عافيه ، لاخلا ولا عدم 
