الموضوع باين من عنوانه
تجارب مع شباب الانترنت
وان كانت ليس تجربتى لوحدى ولكن تجربة بنات اعرفهم فى الواقع
ودائما ما شد نظرى هنا هو
مثلا :
*بنوتة تريد اخذ رأينا فى ان تكمل مع شاب عرفته عن طريق الانترنت
*بنوتة تشتكى بانها عرفت شاب عن طريق الانترنت وتحاول الابتعاد عنه ولا تستطيع
*بنوتة عرفت شاب عن طريق الانتر وارسلت له صورها ويهددها الان بفضحها امام اهلها
*بنوتة عرفت شاب عن طريق الانترنت وبعد ان احبته اكتشفت انه ……
الــــــــخ
ابـــــدأ فى اول قصة معى وهى حقيقيه وحدثت مع صديقتى المقربة جدااااااااااا :
وسأنقل القصة على لسانها هى
بتقول :
اول مرة ادخل على الانترنت كان عمرى حينها 16 عام
وعرفت انه هناك شىء اسمه مدونة وفهمت ما يقصد به
فقررت ان اشارك فى منتدى واشترطت على نفسى اننى سأشارك فى منتدى يكون اسلامى
علشان اخد ثواب او دعوة تنفعنى بعد مماتى
مكنش ساعتها فى بالى حكاية الاختلاط او انه يكون نسائى
يعنى كنت جديدة ومعرفش حاجه
المهم
بدأت ارسل مواضيع ويعرفنى الجميع فى المنتدى
وبدأت اتعرف على ادارته التى كانوا جميعهم مصريين ما عدا ااثنان جنسيات اخرى
تعرفت على بنت واحده اداريه واتصاحبت معاها
بعد كدا اترقيت فى المنتدى وبديت ادخل الاجتماعات معاهم
وواحد من الاداريين بعت ليا رسالة فيها ايميله على اننا نبقى على تواصل اكتر لو فى حاجه مهمة فى المنتدى
طبعا انا قبلت على اساس حاجتين اولا دا ادارى يعنى ثقة
ثانيا كنت صغيرة لا اعرف مثلا انه حرام اكلم شاب على الانترنت والكلام دا كله
غير انى كنت عارفه اننا مش هنتكلم فى حاجه غلط
المهم اتكلمنا واتعرفت عليه
وكان زى ما بيقولوا حاجه كبيرة اوى فى نظرى
وعرفنى على اخته وقريبته اللى كانوا معانا فى المنتدى برضو واداريات برضو
المهم هو قالى انه مهندس وبيسافر بره على طول
طبعا وانا كأى بنت عبيطة وف سنى دا
اتهبلت بيه اوى وحلمت انى اتجوز واحد زيه بالرغم ان سنى كان صغير اوى ساعتها
اتعرفت عليه وعمره ما قالى بحبك مثلا
بس دايما كان يلمحلى بكدا
كل يوم كان يبعتلى صورة ورده شكل على الايميل
لغاية ما اخته قالتلى انه بيحبنى
طبعا انا برضو كان فى شوية ايمان فى قلبى
رفضت كدا وقلتلها لا طبعا انا مبقبلش بكدا وانا صغيرة على الكلام دا
وهو اساسا عمره ما شافنى علشان يقول بيحبنى
قفلت معاها على طول
وقمت وانا بجد دايخه من كدا
بصراحة روحت قلت لاختى الكبيرة
انا حصل معايا كذا كذا كذا
قالتلى شوية نصايح
وان دول عبارة عن ذئاب عايزة تنهش فى اعراض البنات
وشوية كلام ريحونى
قلتلها اكيد طالما قالى كدا انه بيقول لبنات تانية كتير
قالتلى علشان كدا لزام نوقفه عند حده لانه اكيد بيستغل منصبه ف المنتدى وبيوقع بنات كتير فى كدا
المهم اختى ليها خبرة فى النت والكمبيوتر والمنتديات
دخلت بعضوية تانى وشاركت فى نفس المنتدى
واتعرفت على بنت تانى كانت معانا بس كانت زى اختى جديدة ومبقلهاش كتير فى المنتدى
اتكلمت هى واختى على الايميل
اختى عرفت منها انه بيكلمها وهى كانت فى نفس سنى برضو
المهم البنت برضو اتصدمت لما قالها بحبك
وادت اختى الباسورد بتاعها ودخلت اختى شافت كمية الرسايل منه ومنها
كدا اختى عندها دليل عليه
اخدت نسخه من الرسايل دا باذن البنت طبعا
وبعتتها لادارة المنتدى
المهم وكانت حكاية كبيرة اكتشفنا بعدها انه كان بيدخل بعضويات اخته وقريبته وهو
يعنى كان بيعمل بلاوى غير كدا
يتعرف على البنات باسم اخته او قريبته
بعد كدا يحولهم عليه هو
وطبعا تم حظره وحظر باقى عضوياته
وبكدا انتهت مشكلة صحبتى اللى بعديها حرمت تدخل على مدونة تانى
ابـــــدأ فى ثانى قصة معى وهى حقيقيه ايضا وحدثت مع واحدة قريبتى :
وسأنقل القصة على لسانها هى
بتقول :
ابتديت فى عمل كان اغلبه عن طريق الانترنت
وكان من ضمن شروطه انى لازم اعرف ناس علشان اضيفهم
ويزيد الجروب بتاعى
عملت اعلانات عن الشغل معايا
وضافنى ناس كتيرة
منهم كان شاب
كان كل حاجه بينى وبينه شغل وبس
وخلص الشغل بس انا فضلت ادخل على الايميل
طبعا فتح عليا وكلمنى وقالى انه معاه شغل
قبلت بالشغل معاه لاانه ثقة واشتغلت قبل كدا انا وهو
بس لقيت الحوار معاه بياخد مجرى تانى
يعنى بقيت بحب اتكلم معاه
عجبنى شخصيته وعجبنى كلامه المتزن
كان شخص طموح الى ابعد الحدود
كان راجل بجد يحب يعتمد على نفسه وكان لسه بيدرس
طبعا لقيت نفسى بنتظر دخوله بفارغ الصبر
باخد الشغل حجه علشان اكلمه
اتعلقت بيه
وطبعا جت فترة حاولت ابعد عنه
بس طبعا هو مسبنيش على طول كان يكلمنى
مقدرتش بجد
لغاية ما جه يوم عيد ميلادى ولقيته بعتلى صورة قلب رسمه بايديه
وكاتب تحتها بحبك
بجد طرت من الفرح
قلتله دى معناها ايه
لقيته رد عليا بكلمه بحبك وطلع بعديها على طول
انا طرت من الفرح بالذات ان سننا مناسب اوى
هو كان فى اخر سنة كلية قمة وانا كنت فى تانى سنه كلية عادية
يعنى اكبر منى بحاجه بسيطة
المهم فضلنا على الحال دا سنة نكلم بعض
واللى عجبنى عمره ما طلب منى صورتى او انا طلبت منه
ولا حتى رقم موبايلى
كان بيقولى كل دا لما تبقى مراتى
لكن قبل دا انا مقبلش على نفسى كدا
فضلت عايشه فى الوهم دا سنة معاه
لغاية ما جه فى يوم قالى انا جاهز انى اجى اخطبك
طبعا فرحت وقلتله ماشى وامتى
قالى ادينى رقم باباكى اظبط معاه
قولتله ماشى ادته رقم بابايا
واختفى بعديها اسبوع ورجع قالى انا خطبت
اتصدمت طبعا
قلتله ازاى
قالى عادى خطبت واحده اقدر اثق فيها
واحده انا ضامن انها مكلمتش شاب قبلى
مش اروح اخطب واحده انا ماشى معاها بقالى سنة
على فكرة نمرة باباكى معايا وانا لو وحش كنت اتصلت بيه وقلتله ان بنته ماشية معايا بقالها سنة
انا طبعا انهرت من كدا وجتلى صدمه عصبية واتمنيت انى اموت
طبعا كسرت شريحة بابا وجبتله واحده غيرها
وطويت الصفحة دى من حياتى والحمدلله اتقربت من ربنا اكتر
ابـــــدأ فى ثالث قصة معى وهى حقيقيه ايضا وحدثت مع اخت صديقة لى:
وسأنقل القصة على لسانها هى
بتقول :
انا كنت اتعرفت على شاب من على الانترنت ومش هقدر اقول تفاصيل انى اتعرفت ازاى عليه
بس المهم كان كويس اوى معايا
وبالفعل اتقدملى واتخطبنا بس كان فيه عيب انه مش بيثق بسرعه فى اى حد
المهم انا كنت بحبه بجنون بعشقه وهو كمان
اتجوزنا فى خلال 3 شهور من تقديمه ليا غير انى كنت اعرفه من 8 شهور تقريبا
المهم اول اسبوع جواز عدى زى العسل البرغم انى سكنت فى حته اقل من المستوى اللى كنت عايشه فيه
واهله كانوا ناس مش اوى يعنى بس برضو اصريت انى اتجوزه لانى بحبه
بعد اول اسبوع اتغير معايا اوى
بدأ يقولى انه مش واثق فيا
كنت بقوله ليه كان يقولى مش لازم تعرفى
بعد كدا اصريت عليه
قالى لانى حاسس انى اتسرعت من جوازى منك
انا ايش عرفنى انك مكلمتيش حد تانى غيرى على النت
طبعا انا اتصدمت وقعدت احلفله انى مكلمتش غيره
وانى محبتش حد غيره
بس طبعا لا حياة لمن تنادى
قلب حياتى جحيم بعد كدا
وطبعا لقصر الوقت اللى قعدنا مع بعض فيه فى الواقع (3شهور)
كعرفتش حاجات كتير عنه
بس كل صفة كان بيقولها عنه فى النت لقيت عكسها تماما
اكتشفت انه بيشرب معسل وعديتها كمان كان بيكلم بنات كتير اوى على النت وعديتها .. عرفت انه كان بيحب واحده قبلى وسابها لان اهلها رفضوه علشان مستواه اقل منها
وانه اتجوزنى علشان يثبت لها انه خد واحده احسن منها ومن مستواها
وبقت حياتى جحيم معاه
وبصراحة كنت باخد منع الحمل علشان مجبش عيال منه
لان لقيت حياتى مش مستقرة
وطبعا اكتشف كدا وخلى حياتى سواد يومها
ضربنى وشتمنى ولعن سلسفيل اهلى
وطبعا روحت لاهلى واصريت على الطلاق واطلقت فعلا
وكرهت النت وكسرت الكمبيوتر اللى كان عندى
والله يلعن اليوم اللى دخلت فيه نت
بقول كفاية قصص لغاية هنا
بس بجد نفسى اللى عندها قصة واحده تعرفها او حتى قصتها
تكتبها اكيد هتفيد بنات كتير
نصيحة :
اوعى تنخدعى بكلامهم المعسول
واللى دايما بيحسسوكى فيه انهم خايفين عليكى اوى
وانك بالنسبه له اكتر من حبيبته
وانى هخطبك فعادى الكلام دا
ارجوكى اوعى يخدعوكى
وبلاش مدونة مختلطة خليكى فى النسائى
لانه اكيد اكيد هيبقى اقل خطرا من المختلط
ارجوكى حافظى على نفسك
اوعى تضيفى اى ايميل عندك لشاب سواء تعرفيه او متعرفهوش
حتى لو قريبك
اعرفى ان محدش هيحافظ عليكى غير ابوكى واخوكى وزوجك فيما بعد
اعرفى ان لكل شاب طريقة بيدخل بيها للبنت
واعرفى انك مهما عملتى له ومهما كنتى متدينة
هتفضلى فى نظره واحده عمره ما هيثق فيكى ولا يأمنك بعد كدا على بيته
اعرفى ان طريق النت اسهل عند الشباب من طريق الحياة الواقعيه
لان فى النت هيقدر يقولك كل حاجه حلوة فيه حتى لو بيكدب
واعرفى انه حتى لو حصل جواز ودا فى حالات قليلة جدا
بتبقى اخرته فشل ولو مفشلش برضو عمره ما هينسى ليكى
انه عرفك عن طريق النت
جربى تسألى اخوكى او حد من قرايبك
لو عرفت واحده عن طريق النت
تقبل تتجوزها
وانا متاكده انه ردهم عليكى
انه عمره ما هيثق فيها
لانها قبلت تكلمه
اعرفى ان الشباب دايما بيحبوا اللى عمرها ما كلمت شاب قبل كدا
او كان ليها اى علاقة من اى نوع
بيحبوا البنت الجوهرة
انتى عارفه انهم ممكن يفضلو البنت الجاهله اللى متعرفش تكتب ولا تقرى على البنت المثقفة
لانهم ضامنين ان البنت الجاهله اكيد ولو بنسبه 90% مكلمتش شاب قبل كدا (ولكل قاعدة شواز)
فى الاخير :
اتقى ربنا فى نفسك وفى الثقة اللى انتى وخداها من اهلك
ملحوظة :
لا احلل لاحد نقل موضوعى الا اذا كتب انه منقول
لانى تعبت جدا فى اعداده
ولان فعلا القصص دى حقيقيه ومن الواقع
واتمنى من تستفيد من موضوعى تدعى لي دعوة حلوة
ان ربنا يسترنى فى الدنيا والاخرة
ومتنسوش التقييم
ووقصص للعبرة
بجد استفدت منه
ربنا يوفقك ويستر عليكي
جزاكي الله الجنان
