السلام عليكم يا خواتي
انا اخترت اليوم اخذ رأيكم بموضوع شاغلني بدل ما انا اللي دايما احل مشاكل الناس ودي اليوم تساعدوني باللي شاغلني على قولة اللي يقول (عندي دوا الناس ما عندي دوا نفسي)، المهم…
انا عمري 25 سنة وصارلي سنتين متزوجة، الله سبحانه ماقدر لي اجيب اطفال للحين، طبعا لجأت للطب وظهر ان عندي مشكلة وبنفس الوقت زوجي بعد عنده مشكلة، الحمدلله على كل حال.. الدكتورة قالت ان علاجي بسيط بس علاج زوجي ممكن ياخذ 6 اشهر ممكن سنة ممكن حتى اكثر بس احتمال حتى بعد العلاج ما نقدر ننجب بطريقة طبيعية وبدون التلقيح الصناعي او (اطفال الانابيب) فاقترحت علي اني الجأ لاطفال الانابيب من البداية واختصر رحلة العلاج المطولة والصعبة،
ممكن بعضكم يقول ليش ماتصبرين؟
طبعا انا حاليا صعب اشرح لكم وش احس، ودي اكون ام واحس كلما مر بي العمر هالاحساس يزيد فيني واحس اني وصلت للنضوج الكافي اني اكون ام ومسئولة عن طفل، ودي اقول لكل اللي حواليني شوفوني تراني مثلكم ماني ناقصة، ودي كل لسان جرحني وكل عين طالعتني بنظرة شفقة تسكت عني وتتركني بحالي.. والاهم من كل هذا.. ودي اشوف زوجي شايل عياله، زوجي اللي ينكسر قلبي كلما اشوفه يحمل ولد اخوه ويضحك معاه، هو صحيح مايقول ان يبي طفل تقديرا لمشاعري ووضعنا لكني احس فيه خصوصا ان المانع من عنده مو بس من عندي…
انا محتارة اسوي اطفال انابيب لو اصبر على ما يتعالج زوجي هالمدة الطويلة؟ والله اني ضايق صدري
انصحك اختي ب الاستخارهـ
بيتي استخارة واتكلي ع الله
و ان شاءالله فيها خيير
امين يرب العالمين
