صراحه تعجـــــــــــــــــــبت من طريقة نصبهم وحيلهم … ربنا يستر علينا
طريقة نصب جديدة أنقلها لكم كما رواها من حصلت معه
السلام عليكم ورحمة الله وبركاته اخواني أعضاء هذا المنتدى المبارك
انا بالامس القريب حصلت لي قصه غريبه وطريقة نصب جديدة
لذلك ارجوكم ان تقراو قصتي كاملة
كنت في يوم الاثنين في احد رومات الاسهم في البالتوك وعند الساعه الثانيه والنصف تقريباً دخل علي احد الأشخاص محادثة خاصة
(برايفت)
وحدث بيني وبينه الحوار التالي بدا بالسلام وقال انا عندي موضوع واسف اذا كنت أزعجتك قلت له لا ابدً تفضل وقال لي انا ام خلود زوجي توفي قبل سنه وانا اليوم وقبل ساعتين من الان صاحب العماره طردني من شقتي قلت لها لماذا قالت من اجل الأيجار لم اسدده وهو 3500 ريال اجار ستة اشهر قادمه وقالت انا مستطيعه اني اسدده ولكن بعد يومين لاني عندي جمعيه وراتبي راحه استلمهم يوم الاربعاء وقالت انا اشتغل في مشغل نسائي وراتبي 2800 وقلت لها طيب الان وش المطلوب مني قالت لي المطلوب منك الله يرحم والديك انك تكلم صاحب المكتب على شان يؤجلو لي الايجار يومين وقلت ليش انتي ماكلمتيه قالت انا كلمته ولكن لم يقتنع وقال خلي رجال من محارمك يكلمني وانا مااعرف ولا احد ابوي ورجال كبير في السن ويتعالج في الاردن واخو زوجي متهاوشه واياه وقالت المكتب اسمه الافق واعطتني رقم المكتب واعطتني جوال صاحب المكتب وتقول اسمه ابو البراء وقالت قل له عندكم مستأجره اسمها مناير سعد ركيان احربي الدور الثالث شقه رقم 11 قمت انا بالاتصال عليه السلام عليكم وعليكم السلام وبديت اكلمه عن موضوع البنت وقال لي يا اخي هاذه البنت لم تدفع الايجار وقلت له هي راح تدفع بعد يومين قال لي انا يااخي كلمت صاحب العماره ولكن رفض وحاولت معه بشتى الطرق قلت له طيب الان وش العمل الان قال يااخي هذه بنت ماعندها احد ابوها في الاردن ولاتعرف احد ومسكينه هي وبنتها الصغيره والله لو شفتها اليوم وهي تبكي عندي في المكتب وترفع بنتها بوجهي وتقول لي دخيلت والديك ان تشوف لي حل وقال وحاولت بصاحب العماره ولكن لاحياة لمن تنادي وقلت له طيب لو اكلم انا صاحب العمار قال يااخي ماراح يرد عليك ولو رد عليك ماراح يعطيك لانه انا وانا مدير مكتبه وشايب وامام مسجد ماعبرني كيف الي غيري وقال يااخي صاحب العماره مجرم ولا احد يطلع هذه المراه وهي وحيده وبنتها الصغيره في هالحر وزياده على ذلك رمضان وصيام وتقرب الا الله لكن هاذا مجرم ماهمه الا الفلوس قلت طيب وش نسوي الان قال والله هاذي بنتكم وشوفو لها حل شوف الشباب عندك ودبر المبلغ اذا كنتم تبغون تساعدونها وقال لي وقسم بايات الله ان الستة الاشهر الماضيه اني انا دافعهن من جيبي 4200 ريال ايجار وكهرب وماء وصيانه وهي ماتدري لاني عارف ضروفها وحالتها وانا لو املك المبلغ والله لا ادفعه بعد ذلك يوم سمعت كل شي منه كانت هي معطيتني رقم جوالها دقيت عليها فاذا هي تبكي وصوتها شاحب ويالله افهم كلامها وقلت انتي وينك الان قالت انا في المشغل وابروح الحين للمكتب قلت لها يصير خير وبصراحه بعدها جتني (النخوه والحمية والرحمة والشفقه) كلها تجمعت مع بعض قلت فرصه رمضان وفعل خير خليني اسدد عنها واكسب دعوات هالمسكينه في كل ماتذكرتني دقيت على ابو البراء وقلت انا راح اسدد المبلغ قال الله يجزاك خير وقام يدعي لي وقلت عطني حسابك وعطاني حسابه الراجحي واسمه الثلاثي وقمت انا وبعت اسهم ورحت لصرافه واودت المبلغ وحولت له المبلغ ودقيت عليه وقلت له المبلغ بحسابك خلاص خلصو وضع البنت وخلوها ترجع لبيتها قال دقايق اتاكد المبلغ وصل ولا لا وبعد شوي دق وقال المبلغ خلاص وصل سكر وكنت متجه لصلاة العصر مادريت الا هو يدق قال انا كلمت صاحب العماره وقلت له فيه فاعل خير سدد المبلغ قال طيب المبلغ وصل ولكن باقي شيء باقي تامين الشقه وينه لان وليد سحبه قبل اسبوع وقال لي ابو البراء دق عليها واسالها وين التامين دقيت عليها وقلت لها وين التامين قالت عندهم قلت يقولو سحبه وليد قالت كيف يعطونه وليد وهي تبكي وقالت هم يعرفون ان بيني انا واياه مشاكل قلت لها حصل خير سكرت من عندها ودقيت على ابو البراء وقلت له الموضوع وقال والله صاحب العماره يقول لازم يجي التامين كمان وقال لي ابو البراء الحمدلله انا ماحولنا الفلوس بحسابه كان اخذها ورفض يعطيناها ولكن الان انت ماقصرت وسويت الي عليك والله يكتب لك الاجر وانا ابروح ارد المبلغ لحسابك قلت ليش ترده قال وش نسوي منين نجيب التامين 4500 قلت يااخي خله يصبر يومين لين البنت تجيها الجمعيه قال لو بيصبر صبر من البدايه قلت يااخي مايصير قال وش تبينا نسوي والله لو المبلغ عندي اني لااعطيه ولكن والله مافي حسابي الا 245 ريال قلت له اجل أهم شي البنت تراه بذمتك سكنها عندك لين تزين امورها قال لي اكيد مايحتاج هاذي من بنا بناتي ومايحتاج توصيني عليها وقلت له طيب ليش ماتخليها تترك صاحب هالعماره المجرم قال لي يااخي ماراح تقدر لانها مامعه الاصورة كرت العايله والاصل ضايع وحتى لو خرجت ماراح تحصل شقه لو تموت ولكن هي من شان انها قديمه عندنا ساكت عنها صاحب العماره الان حتى لو تروح لاي واحد ماراح يسكنها وقال تدري عندي طريقه نجيب المبلغ ونحطه بالصرافه ونسحب ايصال ونقول له الصرافه تعدت السحب المحدد ونخليه يقتنع وبعدها نرجع المبلغ لاهله قلت طيب عندي 2024 ريال قال انا ابدور مع ولدي الكبير قال ابدبر 1500 ريال وانت دبر 1000 غير 2024 الي عندك قلت له طيب وقمت ودقيت على كم وااحد ولكن كانو من حسن حظي نايمين ودقيت عليه قلت له واله ماحصلت قال ابشرك دبرت 2500 ريال انا انت الان حول 2024 الي عندك ورحت لصرافه وحولت 2024 ريال وصليت العصر ودقيت عليه قال ابشرك خلاص البنت سلمناها المفتاح وراحت لشقتها وقال لي بعد العشاء نخلص الاوراق واحول لك الالفين ريال قلت طيب رحت ونمت حتى الفطور وبعد صلاة التراويح دقيت عليه مقفل جواله ودقيت عليها دق جوالها ماردت بعد شوي دقيت حصلته مسكر قلت يمكن نايمه بصراحه لحد الان ماشكيت بشي ولكن دقيت الساعه واحده وحصلت الجوالات مغلقه وبصراحه بدات اشك في امرهم قلت لايكونون سووها فيني صليت الفجر ونمت وقمت لسوق والساعه 12.30 دق علي هو ابو البراء وقال لي انا اسف تاخرت عيك ولكن البارح المكينه اكلت صرافة الراجحي قلت حصل خير قال انا حولت لك الالفين ريال من البنك الفرنسي على حسابك في البنك الراجحي وقام وقال سجل عندك رقم العمليه وعطاني رقم العمليه وقال من اربع الا ست ساعات والمبلغ بحسابك قلت له الله يجزاك خير وبعد صلاة الظهر نمت وصحيت متاخر لو عندي في جوالي 24 مكالمه من رقم غريب ودقيت عليه وقال لي انت محول فلوس لموسى معدي قلت له نعم قال انت تعرفه قلت انت وش تبغى انا بصراحه فكرته وليد اخو زوج المرأه قال لي يااخي هذا نصاب ناصب على ناس كثيرين اذا انك محول له حواله عن معرفه فنبغى منك معلوماته واذا انك ضحيه جديده لاحول ولا قوة الا بالله قلت له اجل سجل عندك ضحيه جديده بمبلغ 5500 ريال وقال هذا من 20 شعبان بادين يسوون هالحركه ومضبطين خطه جهنميه من ناحية تغيير الاصوات في الجوال صوت شايب وبنت كل شي قال لي ترى كلهم شباب وشكلهم في العشرينيات وقال انا اتابع حسابه الي دخل بحسابه من 20 شعبان قرابة 80000 ثمانون الف ريال وقال بس لازم نسوي لهم خطه نيبهم بها يقول انا اخاف نبلغ بهم ثم يدرون انهم انكشفو ويسكرو جوالاتهم وكل وسيلة اتصال بهم وقال انت اذا كلمك قلت حصلت واحد بيدفع ايجار شقة البنت لمدة اربع سنوات قادمه يقول نبي نغريهم شوي وسكر من عندي البارح ولم يدق علي البارح ارسل لي رساله قال بالله ارسل لي ارقام الجوالات الي دقو عليك منها وارسلتها له والمبلغ الي محول من الفرنسي لم يصل الا الان وادق على جواله مغلق وكذلك جوال البنت (الخـــــــــــــلاصه) 1/ ارجوكم ان تاخذو الحيطه والحذر من ماوقعت به
2/ توجيهكم لي ماذا اعمل وكيف استرد فلوسي؟
3/ اعرف ان اكثركم راح يقول لي اني غبي بما وقعت به ولكن والله لو سمعتم اسلوب الشايب ابو البراااء وكلامه المهذب المؤدب ونبرت صوته الابويه وكل كلامه ياولدي ياوليدي كله كلام معسول ومدروس وصوت البنت وهي تبكي كان دفعتو الي وراكم ودونكم
4/ باختصار اقول لكم انا خطه محكمه بمعنى الكلمه من ناحية المكتب وصوت التلفونات وصوت الهندي والاوراق والادراج وكل شي يعني أقول لكم بصراحه انا لست مصدق انهم نصابين بكل صراحه خطه جهنميه
لكم الشكر وسامحوني على الاخطاء الاملائيه وعلى الاطاله
اخوكم/ ابو ياسم الحربي
وجزاكم الله العافيه
بانتظارك
