السلام عليكم ورحمة الله وبركاته
أنا فتاة في بداية الثلاثين من العمر غير متزوجة
بالبداية بعطيكم نبذه عن مشكلتي من البداية
أنا وأهلي كنا جميعنا نشكي من تعب مستمر وقلة النوم ومنازعات شديدة على أتفه الأسباب
الكوابيس كانت تجينا وبالذات أنا بشكل غير طبيعي
ماخلينا شيخ إلا ورحنا له ، حتى المستشارين الأسريين كلمناهم
أبوي كان عصبي بشكل لايطاق وأمي وأخواني نفس الشي
وكم مرة أبوي كان بيطلق أمي بس الله ستر
هذي الأعراض صارت معانا بالعشر السنوات الأخيرة
وقبلها كانت حياتنا أجمل مايمكن ، كنا مترابطين ومتحابين ومشاكلنا لاتكاد تُذكر
مع العلم إننا من أسرة متعلمة وحالتنا المادية ممتازة ولله الحمد
..
اللي صار قبل عدة أشهر أبوي كلم شيخ مشهور ومعروف وكان يعرف عن أوضاعنا من قبل
هذا الشيخ عرف أبوي على شخص على إنه يعالجنا
والشيخ مدح هذا الشخص بشكل كبير وأثنى عليه
المهم لما جانا البيت تفاجأت إنه شاب غير ملتحي يعني مو زي اللي جونا من قبل
مو بس أنا تفاجأت حتى أمي وأختي وأخواني كانوا كلهم مستغربين وما ارتاحوا له بالبداية
………….
كانت طريقته غريبة جمعنا كلنا بمكان واحد وصار يمشي بالبيت وكأنه عارف كل تفاصيله
مع العلم إن بيتنا كبير
أخذ أبوي وأختي الصغيرة لغرفه لحالهم
كان مايتكلم بس مغمض عينه وصار يسأل أختي عن أحلامها وعن شخص معين شافته بالحلم
أسئلته كأنه عارف بس يبغى التأكيد منها
أختي تعبت وقتها مره مره وصارت بس تبكي بصوت عالي
ونفس الشي سواه مع أمي
كل هذي الأشياء عرفتها بعد ماراح هم قالوا لي
………..
جانا ثلاث مرات للعلاج
في كل مرة كان يمشي في البيت بنفس الطريقة والمرتين الثانيه نادى أخواني الأولاد وجلس مع كل واحد لحاله وأنا كان معاي أبوي
جلس يأشر علي بأصابعه من بعيد ولا قرب مني بس حسيت بخفقان قوي بالقلب واستفرغت بعدها
،،،
عشان ما أظلمه يعلم الله إن حياتنا اختلفت كلياً بعد ماجانا هذا الشخص
أبوي صار غير وأمي دايماً مبسوطة وأختي وأخواني وحتى أنا حسينا باختلاف كلي عن قبل
أمي تقول دايما تدعي له بكل صلاة وأبوي نفس الشي
صرنا لما نجتمع كلنا ماغير نجيب سيرته ونتذكر كيف كنا وكيف صرنا يارب لك الحمد على النعمة .
الحين بذكر السبب اللي خلاني أكتب هذا الموضوع
يا اخواتي أنا حاسه إني بديت أتعلق بهذا الشخص خاصه إنه صار صاحب لأبوي وأخواني
وأخوي الكبير بالذات كل ماجلست معاه بس يجيب سيرته ويمدحه ويكلمني عنه إنه إنسان راقي بتعامله وطيب ويعامل الناس بحنان كبير كأنهم أهله
والله صرت بس أفكر فيه ، حاولت أشغل نفسي وأسجل بمعهد بس مافاد
واللي زاد الطين بله أمي قبل كم يوم كلمتني وقالت ياليت يجي يخطبك
أحياناً أحاول أخوف نفسي منه خاصه بطريقة علاجه لنا وأقول يمكن ساحر وطريقته بالعلاج غريبه
لكنه ماطلب شي يغضب الله وكان يحرص علينا بالحفاظ على الصلاة والصدقة والابتعاد عن المحرمات
وأقول لنفسي طيب ليه هو مو مطوع لا ملتحي ولا مقصر الثوب بس كل أفعاله تدل على الصلاح واللي عرف أبوي عليه شيخ مشهور جداً جداً وأخوي الكبير يقول لي دايما ينبهه عن كبائر الذنوب وينصحه فينا بكل خير
بعد ماجانا علاقتي بالله صارت أحسن من قبل
أبوي كان بيعطيه قطعة أرض لكنه رفض تماماً مع إن حالته الماديه متوسطة يعني مو طماع
كل أخباره تجيني سواء من أبوي أو أخواني لدرجة والله صرت أسرح لما يتكلمون عنه
افهموني والله غصب عني أفكر فيه مو بيدي أبدا هذا الشي
أفكر بنفسي وبعمري اللي يمضي وبهذا الشخص اللي دخل حياتنا فجأه وكان السبب بعد الله في تغييرها
أفكر بأمي وكلامها وأمنيتها إني أرتبط فيه وإنه مناسب لعمري وكلامها الكثير عنه
أنا حاسه إني تايهه من جد
والموضوع هذا صاير ولا زال مستمر من ستة أشهر وكل ماله قلبي يتعلق فيه بشكل أكبر
على قد ما أحاول أشغل نفسي لكني ماني لاقيه أي فايده حاسه العكس هو اللي يصير معاي
ياقلبي الزواج نصيب انت تحبيه امكن هو مايحبك ولا يبغيك
ليش تعلقي قلبك فيه انت تتعلقي فيه بزياده لانك معجبه به
وامكن سوى لك سحر مايندرى !!! الله العالم انا ماتطمنت للطريقه وش اللي يمشي بالبيت ويأشر بأصبعه وتستفرغي !!!!!! ماسمعنا بهذا من قبل نحن ولا اباءنا الأولين !!
ولا اكو حد شيخ يسوي هالاشياء !! ولو هو يتعامل بالسحر امكن فك عنكم السحر بالسحر وشدرانا وش يسوي
لا تعلقي قلبك غير بربك ولا تفكر فيه لان مافي فايده انت منتي الرجال كنا قلنا لك روحي اخطبيه ؟؟!
لكن هو الرجال وهو ماخطبك اذا مايبغاك وإلا شو مأخرنه ؟!
اهتمي بنفسك واذكارك وخلي قلبك مع ربك الله يرزقك زوج صالح
وتدعينه إن يرزقك فيه .. ويخطبك
ادعي ادعي ادعي ..
اللهم اجعل كل ما حصل وسوف يحصل ويحصل الان
خيرا لي ولنا فـ الدنيا و الاخره ، يا ارحم الرحمين
