الوسم: البندري

بسم الله الرحمن الرحيم

السلام عليكم ورحمة الله وبركاته

أنتقلت إلى رحمة الله صاحبة السمو الملكي الأميرة البندري بنت عبدالعزيز بن عبدالرحمن آل سعود في مستشفى الملك فيصل التخصصي عن عمر ناهز الثمانين عاماً إثر مرض عانت منه طويلاً وتمت الصلاه عليها في جامع الإمام تركي بن عبدالله وأم المصلين سماحة عام مفتي المملكة الشيـخ عبدالعزيز بن عبدالله آل الشيـخ وحضر الصلاة على الجنازة خادم الحرمين الشريفين الملك عبدالله بن عبدالعزيز وسمو ولي العهد سلطان بن عبدالعزيز حفِظهما الله وعدداً من أصحاب السمو الملكي الأمراء وجمعاً من المسلمين .
والأميرة الراحلة شاعرة من أبرز الشاعرات في المملكة وهي والدة الأمير الشاعر الراحل سعود بن بندر رحمهما الله جميعا.
يقول الأمير سعود بن بندر رحمه الله قبل وفاته لوالدته:

ياليتني بينك وبين المضره…….من غزة الشوكه الى سكرة الموت.

او ليت شاورني القدر بس مره…….ولبى مطالب رغبتي قبل مافوت.

او ليتني لجرة مواطيك جره…….احمي قدم رجلك مثل جزمة البوت.

اوليت بيديني السعد والمسره…….واحكم عليها عنك مالحظه تفوت.

يفداك عمر منك يشعر بعمره…….انتي الحياه لنفسي وردة الصوت

ومن أبرز القصائد الباكية التي رثت بها الأميرة الراحلة ابنها رحمه الله بعض القصائد ومنها:

لين اجتمعتوا لدّت العين لسعود ……… قامت تلفّت وين قرّة نظرها

وين الكريم اللي سلك سكّة الجود ……… كم واحدٍ نفسه كسيره جبرها

أضحك وانا قلبي من الحزن ملهود ……… وأغضى وأذل العين تنثر دررها

رضيت بالمقسوم وأيامي السود ……… وكتمت نيرانٍ تطاير شررها

أبي رضا ربٍ كريمٍ وماجود ……… علام مافي برّها مع بحرها

لعل يجمعني بهم خير معبود ……… في جنة الفردوس نقطف ثمرها

———————————

جرحي على سعود

إن جيت للبيت قام الفكر يلعب بي ……… وان رحت للخرج صاب القلب ولوالي

ماعاد أميّز واعرف الجدّ واللعبي ……… غديت مثل الخلوج أمشي على فالي

ياسعود هذي تدابير الولي ربي ……… والعبد ماله عن اللي دبّر الوالي

جرحي على سعود ماينفع به الطبي ……… وشلون أبسلى وهو دايم على بالي

أحسّ صوته يناديني وأنا ألبّي ……… يقول يمـه نسيتي شبلك الغالي

وشلون أبنساك وانته ساكنٍ قلبي ……… أنت حبيبي وزولك دايم قبالي

——————————–

الدمع غار

ليت المنايا وقفت عنك ياسعود ……… خلّتك لين أوريتني في ضريحي

ياليتني حطّيت انا عنك بالعود ……… وانت معافا ياجنيني صحـــيحي

أنت الصديق الصادق الود ياسعود ……… وانت الطبيب لقلبي اللي جريحي

انا أشهد أني عقب فرقاك مقرود ……… ماأنلام انا لو كان اصفّق واصيحي

والله لصيحك لين أجاورك ياسعود ……… الله يعجّل جنب قبرك مطيحي

الدمع غار وجفّت العين ياسعود ……… والقلب ينحب والجوارح تصيحي

——————————–

يافهـــــــد

كل ماقلت أبسلى زاد قلبي جروح ……… قام يصفق خفوقي مثل صفق الهوا

أتصبّر ودمعي بالذي بي يبوح ……… لوبغى القلب ينسى يافهد ماقوى

بالنهار أتجمل والصدر به يفوح ……… مثل بركان يغلي بانفجاره نوى

لي ضوى الليل أصلي عند ربي وأنوح ……… مثل مقروص الأفعى لي صرخ والتوى

عقب مضنون عيني يافهد وين أروح ……… ليتني مت قبله..أو قضينا سوى

أنت الصديق الصادق الود ياسعود ……… وانت الطبيب لقلبي اللي جريحي

صح احسااااسك وصح نقلك الراااائع لاهنتي

ورحمهما الله رحمه واسعه ورحم امواتنا واموات المسلمين

.. يقول سعود بن بندر رحمه الله في قصيدة لوالدته قبل الوفاة((((انت الحياه )))).