الوسم: العمة

يوم من الايام قبل ماننخلق على هالدنيا اعرست امي على ابوي وعاشت في بيت اهل ابوي في الدور العلوي اللي يتكون من حمام وغرفه صدز ان الاولين قنوعين يرضون بالامر الواقع ..
المهم عاشت حياتها سعيده مع الوالد الله يخليه لي كانت تجي من المدرسه وتنزل تطبخ وتنفخ وتغسل المواعين وتنظف وتكرف عند الحموله وليت فيه جزى لاجزاء ولاشكورا بس مافي شيء عند ربي يضيع ..
المهم مرت الايام وجابتني انا واخواني كلنا سودان مثل الليل مافيه الا اخوي اللي مدري منين جاي حتى كلن يقول الظاهر انكم غلطانين فيه شعره ناعم وخشمه تقل سله سيف موب خشمي هالمكور المفغوص ماتدري هو اساسا فيه خشم والا لا اللهم لااعتراض مسكييين اخوي هذا تعذب كنت اكفر فيه انا واختي كفر الحمير كللله غيره وقهرررمنه ليش حنا سودان وهو ابيض بحمره !!
من فعايلي فيه اذا كان قاعد لحاله في الصاله اجيب الكبريت واحطه بين عيونه وهو يصارخ قلت اوووص والا ترى بلسعك صدز ويسكت ويشاهق ياعمري ياخوي جعل ماجاك تكفير من عذرك يوم كبرت استنزلت علينا استنزال موب صاحي على طاري عرس امي ( وش دخل هالطاري ) مره كانوا يحتسون عنه قلت ايه تراني حاضره قالت امي وينتس فيه قلت انا كنت متوزيه ورى الكوشه ..
قسم بالله بموضوعي ذا فتحت على نفسي جروح قديمه بس موب من امي ولا ابوي البلى وانا اختكم في اهل الابو مره كنت يوم اني نتفه عند وحدتن من عماتي عشان امي رايحه لعزيمه وموب ممديها تدرسني قبل امي تذببني وتروح لدوريات مع جيران الحاره المهم ياانها كفرت فيني كفر هالعمه وش عشانه عشان مدرستنا مصريه وتعلمنا الحروف غلط الله يقلعها مثل كذلك هي تقولها كزالك صرت اقول مثلها وعمتي الحصي تمهصني ذيك المهصه لين عقلي زايغ اقول لها انتي كبيره ياعمتي بس كسلانه الهبله مدري الابله تقول كزالك والله العظيم —> ياحياتشي على البراءه
تقول يالله عيديها وعن الاستهبال كنت حاطه في مخي اني بقول مثل ماقالتها عمتي بس يوم شفت عيونها طايره قلت عفويا كزالك وتصقعني بالكتاب لين اخر شيء يئست مني وشاتتني انا وكتبي برى الصاله يوم رحت البيت قلت جعلي اسقط ولا اروح ادرس عند هالعمه الشريره وش بيضرتس لو مسحتي على شعري الكشه وجاملتيني وقلتي يالله ياحلوه اكتبي عشان اسوي لتس جريشه يحبها قلبتس —> حوطيه

وفيه موقف ثاني اذكر اول كنت احب اشيل البزران الصغار يقالي كبيره وانا نتفه مره شلت ولد عمي الصغير تسان عمره سنه تقريبا وركبته السياره الصغيره حقته وقمت افحط به لين انقلب وطاح على راسه وقآآآآآآم ينوح نوووح تسنه مذبوح بااعلى حسه ثمه معيي يسكت تحسبوني شلته لا بلعت اووم العافيه ورحت توزيت في المخزن مكاني السري كني ماسويت شيء اسمه مايعرف يقول من الفاعل كنه طايح من نفسه وانا في المخزن ماسكه طرف خيشه البصل واعضضها جت الشغاله ماشافتني بس تشوف كشتي قامت تصرخ هرررامي ماما بابا هرررامي وانا اقول اصصصص جعل الحرامي ياخذتس ويفكنا منتس قالت انتي زرأه<< اسمي زرعه بس ماتعرف تنطقه المهبوله انا فيه خوف فكر هذا هرامي هرامي في عينتس يالفنسا فضحتيني الله يفضحتس طلعت من المخزن واتابع الاحداث عن بعد مع خفسه الباب اشوف عمي ماسك ولده ويقول من طقك ويصيح زود قلت الله يستر ماتصير معجزه ويتكلم واروح في خرايطها طقيت الباب ودخلت وقعدت جنب عمي كني ماسويت شيء قام الولد يوم شافني يصيح ويرفسني هااو وش بلاه ولدك اليوم —> بريئه بسم الله عليتس عمي .. لا ابد بس طايحن السيكل على راسه قلت اهم شيء مافيه دم صب من راسه قال لا قلت ايييه الحمد لله المهم قضت امي من دورياتها وجت خذتني ورحت رقيت فوق ارقد وعدى هاليوم على خييير ..

قسم بالله جربنا الحموله وغثاهم قبل نعرس خذينا كوورس ..
يوم من الايام قممممت على صوت صراخ رجاجيل الله يستر وش اللي صاير سمعت عمي وعمي الثاني يتناقشون على موضوع وعمي الثالث يفك مابينهم خففت ورجعت ريوست فوق قلت اقعد بغرفتي ابرتس من انزل ويحطون حريتهم فيني سميت بالرحمن ونمت قمت الصبح مضيعه احسب انه خميس وهو اربعاء مافيه دوام نزلت تحت فتحت التلفزيون وقعدت اناظر فلونه جاني اصغر واحد من عماني كان تقريبا في الثانوي يوم شاف كشتي المنتفشه قام يغني يااشمس ياااشمممس مدري متى بتغيبين (( يغني في شوشتي جعلها تعدم )) قلت وشو قال ماشفتي شكلتس في المرايه قلت اصلا نزلت سيييده للتلفزيون اشوى اليوم الخميس مافيه دراسه وقلق —> واثقه وش خميسه اليوم الاربعاء قومي كدي كشتس بصرررعه عشان اوديتس على طريقي يالليل العنا ياحبك للتنكيد بعد وش مدرسته جعلها تشب ونفتك منها قال آآآآآمين رقيت البس وانا احنشش على عمي اللي نكد علي وعكر لي مزاجي بطاري المدرسه .. كدت امي شعري مسته مس لين حسيت ان عيوني متمسسه كني يابانيه

ركبت السياره وفتحت الدريشه اتامل خلق الله وانا ماده البرطم شبرين وقفنا عند الاشاره وياطوووولها كان عمي متاخر على مدرسته لين فيه واحد قدامنا مايشوف الاشاره وشي حمراء والا خضراء المهم قام عمي يضرب له بواري مشىىى الرجال طاااير مايدري انه قاطع الاشاره وانا اللي قمت اضحك على جيت الشرطه مسكوه وغرموه عشانه قطع الاشاره وكله بسبايب عمي المراهق قضى الدوام قعدت احتري ابوي يجي ياخذني طلعت له وانا بكشتي ركبت السياره يقول بغيت اقول منتيب بنتي اللي اخبر يالشاطره انزلي روحي دوري ابوتس نعنبوتس امتس مرتبتس الصبح صايرتن كنتس ورده —-> امحق ورده ! والظهر اللهم ياكافي دخلت البيت نطلت شنطتي كعادتي عند مدخل الصاله ورجمت بجزمتي لينها ماشيه مليون في دميجت عمتي قامت عمتي عصبت علي ومحطتني كم محطه لين اظهرت مافيه تسبدها مني
ليني جايبتن معي شبس وعصير اكل وامسح في مريولي المدود جت عمتي تصارخ علي وديي شنطتس فووق وشوله نازله تحت تفرجين على التلفزيون ماعندكم فوق قلت لا والله محترق اقول في نفسي الله لايسلطنا ولا يسلط علينا قلت ياعمتي انا بقعد ساكته منيب مسويه شيء والله بس خليني اقعد سفهتني وراحت المطبخ قلت الله يستر ماتجيب الملاس وتمردغني به طمررت ورحت فووق اامن لي من هالعمه الشريره تغدينا وقعدت مع عماتي وعماني جيت ابي اسولف سفهوني والا يناظروني وانا اتكلم ويلتفتون كني منيب موجوده قمت وانا العبره تخبط بي رحت لامي اشتكي لها قالت ذولا اهلتس وش تبين تبرين منهم يعني سكت اليوم يوم الربوع معروف انا نروح لهل امي اللي هم خوالي لاخلا ولاعدم منهم فرررحت فرحه بشوفتهم ويضحكون بخشتي ويسئلون عن حالي وعن دراستي وش سويتي في المدرسه وش ماسويتي الله لايخلينا بس ..

كثيير منا يفضل اهل امه موب بس انا احسس انهم هم الاقرب مهما سوو لي اهل ابوي احس اهل امي غيييير وموب بس عندي كثييير نااس علاقتهم مع اهل امهم اقوى ..!
قضينا ..

ملاحظتين لوسمحتن ..

17 مشااااااهدة ولا رد واحد

ليش طيب!!

اذا موضوعي ما اعجبس انتقديني

بس لاتشوفين وتطلعين قهر ترى