قصتي المستحيلة و الدعاء
السلام عليكم بنات ..انا من زمان حابة اكتب قصتي للإفادة و زرع الأمل بقلوب يائسة و اذا لقيت قبول و تفاعل منكن رح حط موضوعي و نشالله يعجبكن
ننتظر قصتك
معاك خيتو ^^
نحن في الإنتظار….
شكرا على التفاعل حبيباتي و يلا رح ابتدي
ابتدت قصتي و انا عمري 18 سنة كنت بنت كتير مدلعة عند اهلي و ما بينرفضلي طلب و شخصيتي قوية جدا و عندي مبادئ مستحيل إتخلى عنها و انا بسن 18 كنت بثاني سنه معهد لأني فتت عالمدرسة و انا عمري4 سنين و بنفس الوقت كنت بشتغل عند والدي عشان إكتسب الخبرة ،كانت احلامي و طموحي كتير كبيرة و ايا شي صعب و فيه تحدي بحب جربو و اتحدى الكل فيه …ما كان عندي اصحاب و رفقاتي الوحيدين كانو شلة بنات و شباب من بلد ثاني بشوفهم بعطلة الصيف بس و باقي السنه اتواصل معهن عن طريق النت او التليفون بس كانو هني كل حياتي و بنبسط معن كتير ،و طبعا ما كنت فكر بالحب او الإرتباط ابدا لأني كنت شايفه حالي و بعتبر هالشي يوطي من كرامتي .. المهم مرة من المرات اصحابي الي قلتلكن عنهن عرفوني على شخص جديد بالشلة ما كنت اعرفو ولا بعمري شفتو تعرفنا على بعض بس على النت و هو اخد ايميلي و صار يحكيني بكل احترام و يعرفني عحالو بعد كم شهر صرت حس اهتمامو فيي زياده عن اللزوم و يسأل عني اصحابي و يستفسر عكل شي بخصني….
مرقت شهور و ضلو هالإهتمام يزيد و صداقتنا صارت قوية كتير و كانت مبنية هالصداقة على صراحة كبيرة كتير يعني مش مكذبيين على بعض بشي و و اصلا ما فيه بكذب عليي لأنو كنت بعرف كل مجتمعو..انا بلشت أعجب فيه بس ضليت تقيلة و مطنشة الموضوع ، بعد فترة اعترفلي بحبو و قالي بعرف صعب تصدقيني لأنو ولا مرة شفنا بعض و هالموضوع كتير غريب بس راح حاول اثبتلك حبي الك انا طبعا نصدمت و ما عرفت شو بدي رد و صرت اضحك بس قلت لحالي خليني جرب بالنهاية مش خصرانه شي و اذا مشي الحال اوكي و اذا لأ مش مشكله هوي ببلدو و انا ببلدي و راح تضلا كرامتي محفوظة و اصلا ما راح حبو بس تجربة و مغامرة جديدة و بدي إتحدى حالي فيها و اكيد انا الكسبانة ( كنت مغروره و ناسية انو كل شي بإيد الله )…اول خطوة عملها عشان علاقتنا راح خبر اهلو عني و قالهم بدي سافر لعندا اتعرف عليها هي و اهلها اهلو ما مانعو لأنو ما فكروا انو علاقتنا راح تتطور كتير و اهلي و اهلو منفتحين و بأول العلاقة ما عارضو .. انا كنت كتير مبسوطة اول شي لأنو بلشت حبو و تاني شي وصلت لهدفي و خليتو يموت فيي و يجي لعندي من دولة ثانية و يحكي اهلي و يطلبني منهم
اجا لعندي و كانت اول مرة نشوف فيها بعض و احلى لحظة بحياتي ..شفت فارس احلامي و احلا ما كنت اتخيلو قضينا يوم كتير حلو مع بعض و من وقتها خطف قلبي و نقلبت حياتي ، اليوم الثاني راح تعرف على اهلي و قلهم انو تعرف عليي عن طريق اصحاب و بدو يتجوزني بس بعدو عم يدرس جامعه و هو اكبر مني بس بسنه و قالهم بالصيف بي تجو تصيفو ببلدنا بدي عرفكن عأهلي و بعدين يجو اهلو يتقدمولي رسمي … و بعدين سافر و ضل حبنا يزيد و يكبر كان بحبني بجنون و انا كمان و إجا الصيف و شفت اهلو و تعرفنا على بعض و لما سافرت كانو على اساس يجو يتقدمولي متل ما وعدونا كانت الصدمة ( مستحيل نخطبلك ياها نحنا كنا نسايرك كل هالفترة مفكرينو حب مراهقة بس شكل القصة قلبت جد و هالشي مستحيل يصير ) و ما كان عندهم شي ضدي بس السبب الوحيد انو جنسيتنا مختلفة و عاداتنا و تقاليدنا غير .. انا هالخبر نزل عليي متل الصاعقة و ما تقبلتو ابدا ..كيف بدي اتركو و شو بدي قول لأهلي و لأصحابنا ؟؟ ما اصعب هالموقف ، كل مرة كنت اتركو و يرجع يترجاني ارجعلو و يوعدني انو راح يقنعهم كنت اضعف و ارجعلو و كل سنه منشوف بعض من دون علم اهالينا و كتير عصيت ربي بهالسنين لا كنت صلي ولا ادعي ولا شي بس بصوم برمضان و الباقي كلو معاصي ( الله يغفرلي ) ..بهالسنين الي مرقت كتير صارو اهالينا يضغطو علينا انا اهلي يقلولي صرتي بعمر زواج و عم يتقدملك عرسان و عم ترفضيهن و من هالحكي و هو اهلو كل مرة يدبرولو عروس و يقولولي يتركني و هالشي صار كتير يأثر على علاقتنا و تغير كل شي للأسوء
