[IMG]https://img690.********************.us/img690/7316/41398414.gif[/IMG]
حبيباتي هادي اول مرة عنحط ليكم حلوى دواز اتاي
بيني و بينكم كنتهرب من تحضير الحلويات الصغيرة
لانه فيها خدمة كثيرة مقارنة مع الكيك و الطارطات للي كتجيني اسهل
لكن مرة مرة كنحيد عليا العكز و كنوض نشمر على دريعاتي هههه
اليوم عنقدم ليكم سابلي ساهل ماهل و مقاديرو بساط و المذاق لذيذ
بالنسبة للناس للي عزيز عليهم الزنجلان طبعا:
سابلي الزنجلان منكه بالخوخ اقتصادي و لذيذ
[IMG]https://img683.********************.us/img683/9720/22588564.gif[/IMG]
المقادير :
200 غرام زبدة لينة
150 غرام سكر ڭلاصي
ملعقة فانيلا
كنشري روح الفانيلا (غبرة ماشي السكر فاني) بالعبار احسن و نكهتها اقوى من الساشي
2معالق كبيرة سيرو روح الخوخ
( كيتباع عند الهري ب 5 او 6 دراهم للقرعة)
بيضة واحدة
15 سنتيليتر زيت
500 غرام دقيق الحلويات الممتاز
ملعقة كبيرة خميرة الحلوى
ملعقة صغيرة مايزينا
50 غرام زنجلان
[IMG]https://img683.********************.us/img683/2758/69288681.gif[/IMG]
الطريقة :
في إناء كنطربو الزبدة مع السكر ڭلاصي
حتى الحصول على خليط كريمي ابيض
ثم كنضيفو الزيت
و كنطربو مرة اخرى
ثم كنضيفو البيضة
و نطربو الكل مزيان حتى يتجانس و يعطينا كريمة موس ثقيلة
ثم كنضيفو الدقيق المنخول بشوية بشوية
مع الفاني و خميرة الحلوة و المايزينا ،
و نعجنو الكل بإضافة الدقيق
بشوية بشوية
حتى الحصول على كرة متجانسة مكتلصقش فاليدين
ثم كنضيفو ليها الزنجلان
و نخدموها مزيان حتى يدخل فيها الزنجلان
و نضيفو ليه ملعقتان كبيرتان من روح الخوخ
و نخلط الكل حتى يتجانس مزيان
كنسخنو الفرن بدرجة حرارة 180°
كنحطو العجينة ديالنا على سطح العمل النظيف
و كنطلقوها بالمدلك
ثم كنبداو فتشكيل السابلي ديالنا باي شكل كتفضلو
حسب المراشم للي عندكم
انا عملتو بشكل بيضوي عادي
وجدت الطاوة فرشتها بورق الزبدة
و بديت كنستف فيها السابلي
حاولو تهزوه بشي ملعقة او سباتيل باش يحافظ على شكلو
و ميكونوش فيه طباع الصبيعات
و دخلتو للفرن المسخن من قبل
على درجة حرارة 180 °
بين 10 او 15 دقيقة حسب السخونية ديال كل فران
خليتها حتى بردات و ستفتها فعلبة حافظة
[IMG]https://img683.********************.us/img683/4841/96476659.gif[/IMG]
التقديم :
قدموها بالصحة و الراحة
اما بشكلها العادي او الى بغيتو تزينوها حسب الذوق
كتجي هشيشة و و لذيذة بنكهة الخوخ و تڭرميلة الزنجلان
ملاحظة :
هاد المقادير كتعطيكم اكثر من نصف كيلو ممكن تضاعفوها لو بغيتو كمية اكبر
ممكن تحتافظو بيها مدة طويلة
فعلبة حافظة محكومة الاغلاق لو عملتوه بكمية كبيرة
و ايضا ممكن بدل نكهة الخوخ تستعملو اي نكهة بغيتو
و بدل الزنجلان ممكن تستعملو اي حاجة
كاوكاو او لوز او كاجو او بيستاش او بندق او ڭرڭاع …مهرمشين رقيق
او حتى الشكلاط او النافع او حبة حلاوة …
يعني العجينة كتبقى واحدة و التنويع فالمنكهات
حسب الذوق و المتوفر في كل مطبخ
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
اشكر اختي صاحبة هذا الصابلي واهنئك وأشد على يديك بحرارة وأقول لك الله يعز المغربيات فاش ما بغيتيهم كيحمروا ليك الوجه الله يعز المغاربة والمغربيات وما ننساوش ان الطبخ العربي كلو روعة وكل البلدان العربية تمتاز بطبخات وحلويات رائعة ايضا . شكرا جزيلا والله يزيد من امثالكم سواء الذين يفيدون او الذين يستفيدون . وانا افتخر واعتز بهذا المنتدى واتمنى له عمرا مديدا وكذلك اشكر المشرفين والمنخرطين والساهرين على هذا المنتدى الزويييييييييييييييييييييييييييييييييييييييييييييي ييييييييييين .
بارك الله فيكن جميعا حبيباتي
كل باسمها
ردودكن فرحاتني
الله يفرح قلوبكم
و يجزاكم عني خيرات الدارين
على دعواتكن الطيبة ياطيبات
الله لا يحرمني منكن
ما شاء الله عليكي
ست بيت شاطره و ممتازه
يسلموووو الايادي
وشكرا
بارك الله فيكن جميعا حبيباتي
كل باسمها
ردودكن فرحاتني
الله يفرح قلوبكم
و يجزاكم عني خيرات الدارين
على دعواتكن الطيبة ياطيبات
الله لا يحرمني منكن
