السلام عليكم ورحمة الله وبركاتة
كل سنة وانتوا طيبين ورمضان كريم عليكوا كلكوا ويارب يحقق لكل واحدة حلمها وتكون السنة دى احلى من اللى فاتت يارب
خلاص رمضان بعد بكرة ان شاء الله وطبعا هو المعروف ان رمضان يعنى صيام وصيام يعنى حرمان من الاكل بس احنا ناس ولا بيحوق معانا صيام ولا غيرة هههههههههه بنصوم ومع ذلك نخرج من رمضان زايدين 5 كيلو باضحك
اولا بالنسبة لجروبى حبيبى ابتسامة بكرة فرى يابنات وبالنسبة للبنات اللى عاملة دايت ياريت تخلى بكرة فرى وتوزنوا الصبح أول اما تصحوا ان شاء الله بعد دخول الحمام (اعزكم الله)
سبب اليوم الفرى دة ان احنا نعمل لغبطة للجسم يعنى لو كان معدل الحرق بدأ يقل باليوم دة هنزودة تانى
مش اقصد باليوم الفرى ان احنا فى يوم ناكل 6 ارغفة وطبق رز وفراخ ولحمة محمرة هههههههههه زى اما اتفقنا احنا عاوزين اعتدال يعنى هتصحى الصبح ان شاء الله هتفطرى فطارك عادى جدا لحد ما تشبعى مش بعد اما تشبعى تقعدى تاكلى تانى وتقولى ماهو فرى
ووقت الغدا هتتغدى عادى أكلتك العادية وكذلك العشا بس احنا متعودين ان العشا حاجة خفيفة ولو نفسك فى حاجة حلوة مفيش مشاكل تاكلى منها بكرة بس مرة واحدة بس فى اليوم مش تسيبى الطبق قدامك طول مانتى رايحة وجاية تاكلى فيها
كدة بكرة عدى الحمدلله وعملنا لغبطة للجسم وبقى مستعد يحرق بمعدل أسرع؟؟؟ طب تمام
نيجى بقى للسحور
السحور مهم جدا جدا جدا جدا عشان هو دة اللى بتفضلى عليه طول اليوم مش عاوزين نحس بدوخة ولا هبوط ولا غيرة وياريت يكون قبل الفجر مش مثلا فتوكة بتنام الساعة 11 تقوم تتسحر الساعة 10 وتقول انا كدة اتسحرت ماينفعش
ودى سنة عن الرسول عليه افضل الصلاة والسلام عجلوا فى فطوركم واخروا فى سحوركم
يبقى السحور قبل الفجر ان شاء الله على الاقل الساعة 2 وهيكون عبارة عن
نص رغيف + اى غموس بس طبعا احنا مشهورين بالفول ههههههههه + علبه زبادى + سلطة او طماطم او خيار او خس او جرجير او فلفل رومى
مش عاوزة بنوتة تيجى تقولى لا انا هاكل زبادى بس يبقى بتضيعى نفسك كدة وهتتعبى طول اليوم دة غير الهبوط وغيرة
ونستنى ان شاء الله نصلى الفجر ونقرأ 4 صفحات من المصحف (عشان نختم القران باذن الله) وندخل ننام
ملحوظة دينية :-
عشان تختمى القران وانتى مرتاحة اقراى بعد كل صلاه 4 صفحات من المصحف فى 5 صلوات يعنى 20 فى ال 30 يوم يعنى 600 تقريبا كدة المصحف كامل الا 4 صفحات من الايات الصغيرة ودى سهل تخلصيها فى نص ساعة يعنى
دة بالنسبة للبنات اللى مش بتقدر تختم المصحف فى رمضان
ندخل بقى على الفطار
وقت المغرب ان شاء الله هتبدأى بكوبايتين مية وهتقومى تصلى المغرب وترجعى تاكلى التمر ( 3 تمرات + كوباية لبن خالى الدسم ) أو ( اللى بيحب التمر بمية وسكر وجوز الهند و و و و …. هتشربى كوباية وسط ويبقى ليكى معلقة واحدة سكر فى اليوم)
هترجعى من الصلاة هتفطرى (واصلا التمر والمية هيكونوا مالو بطنك شوية ) نفس نظامنا 1/2 رغيف باى حاجة عندنا أو 5 معالق رز أو مكرونة أو …..
بعدها بساعتين على الاقل يعنى ممكن بعد اما تصلى التراويح باذن الله تاخدى سناك وهيكون أى حاجة انتى عاوزاها حتى لو (ممنوع) من حلويات رمضان بسسسسسسسسس ليكى مرتين بس فى الاسبوع مش أكتر يعنى 5 ايام السناك يكون فاكهه أو خضار و يومين السناك اى حاجة نفسك فيها وبحجم نص الكف يعنى قطعة وسط ولو هتاخدى الممنوع دة مرة واحدة يبقى ليكى قطعة قد كف الايد ودة مرة واحدة فى الاسبوع ولو عاوزة كل يوم هتاخدى قطعة قد حجم علبه الكبريت يعنى صغيرة أوى كل يوم (ودة مش بفضلة لانة ماليان سعرات على الفاضى يادوب مسح زور مش هتلحقى تستطعمى الحاجة ههههههههههههه)
وبالنسبة للبنات اللى مش بتعرف تاكل وقت المغرب وبتملى بطنها مية
هتلغى السناك خالص وتخلى بدالة الاكل بتاع الفطار ولو كلتى منة حاجة وقت المغرب وماقدرتيش تكملى يبقى تشيلى الباقى بعد اما تصلى التراويح
مش عاوزة واحدة تقولى خلاص مش هكملة ماينفعش لازم تكملية وماننساش طبق السلطة المتين على الفطار هههههههه
بالنسبة للرياضة
طبعا هتبقى طول اليوم صايمة ومفرفرة باضحك وبعد المغرب تفضلى واقفة على رجلك غسيل وترويق وتنضيف يبقى احنا هنعمل اية
بعد اما نصلى التراويح وقبل السناك بتاعنا هنعمل 3 حاجات
اية هما بقى؟؟؟ التمارين بتاعتنا الثابتة (التويست والجرى فى المكان و نط الحبل ) + شفط البطن طول اليوم طبعا
وفى الفترة اللى بين الفطار والسحور مش عاوزة اقل من 2 لتر مية عشان مهمة جدا جدا وزى اما قولت قبل كدة بتحرق الدهون بطريقة رهيبة سبحان الله دة غير باقى الفوايد الكتير ليها
كدة احنا ماعندناش ممنوع يعنى لو فى عزومة هتاكلى البلح عادى وهتفطرى من الاكل اللى قدامك بس بالكميات بتاعتنا وبعد اما تصلى التراويح هتاخدى سناك ولو قدموا حاجة بعد الفطار علطول اتحججى بانك شربتى مية كتير مش قادرة تاكلى حاجة دلوقتى او خديها وسيبيها جمبك وقوليلهم شوية بس عشان شربت مية كتير مش قادرة اخد حاجة تانى دلوقتى سهل أهو
وبالنسبة للرياضة بعد اما تروحى اعمليها حتى لو قبل اما اتنامى وهى اصلا سهلة مفهاش مشاكل ولا بتحتاج مجهود
اللى عندها اى سؤال انا تحت امرها
