السلام عليكم اخواتي
راني رجعتلكم بعد 3 سنوات زواج و عندي ولدين حاليا
إن شاء الله تكونو بألف خير و عافية
أختي الحبيبة باش تتذكري هاذي النصائح يلزمك مذكرة تكتبي فيها أي نصيحة تسمعيها من أمك أو أحد أفراد عائلتك أو من أي مكان و وظفيها حسب الظروف تاعك ماشي طبقي كل شي بحذافيره
بسم الله نبدأ
النصيحة الأولى و المهمة هي
1- إيااااااك و إياك إهمال صلاتك هي أول ما تحاسبين عليه في قبرك و ذكري نفسك و زوجك كل وقت بضرورة أدائها في وقتها لما لها من جزاء كبير و توفيق من الله في الحياة الزوجية و تعذيب و عقاب و حياة ضنكة مريرة لتركها و إهمالها و ما ذكرتك بها أولا إلى لتجربتي و الله صدقي أو لا تصدقي في أيام محافظتي على صلاتي في وقتها و قراءة القرآن و الأذكار مرة على مرة أجد المشاكل و المعوقات بيني و بين زوجي و أولادي شبه منعدمة و هينة و عند بداية إهمالي لها والله تظهر مشاكل من العدم ماتتصوريهاش قاع ويجيك الحل تاعها بزاف صعيب.
2- عليك بالتفاؤل بالخير في كل شيئ و ثقي بالله و تذكري قوله عز و جل في سورة الأنفال الآية 70 " إِن يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا" و إياك و سوء الظن بزوجك و خطيبك أو أي فرد من عائلته إلا إذا كانت تصرفاتهم تؤكد عكس ذلك واجهيهم و صارحيهم و لا تتكلمي من ورائهم إلا والدي زوجك إياك و الخوض في نقاش معهما.
بالنسبة للجهاز اكتبي قائمة و قسمي الجهاز إلى أقسام حسب الأولوية و الأهمية مثل الآتي 3-
""1 : لوازم الصلاة والمصحف و كتب الزواج""
""2 : الزرابي و الستائر و الأفرشة و الأواني"""
"""3 : التصديرة"""
""4 : الملابس ""
"" 5: المجوهرات و الإكسسوارات ””
""6 : لوازم الحمام و أجهزة الشعر و الاستحمام ""
"""7 : الماكياج و العطور""
"""8 : الأحذية و الصيكان"""
""9 : هدايا العرس ""
"" 10 :مواد و أدوات التنظيف و التعطير المنزلية""
""الحقائب و لوازم التعليب : 11""
4 – تفاهمي مع زوجك لكي تشترو غرفة جميلة و تكون عملية يعني لا تبحثي عن الشكل و التزيين شوفي إذا راح ترفدلك ملابسك و تحافظلك عليها و تكون واسعة و تكفيها. لا تشتري التي فيها أبواب زجاجية كثيرة راح تكون خطر عليك و على أولادك خاصة إذا كنت تسكني مع أهل زوجك.
5 – النظام ثم النظام ثم النظام لازم تنظمي حياتك من الألف إلى الياء هاذا اساس النجاح في الحياة
و تكوني تعرفي و لو القليل عن أساسيات تكوين البيت من جميع النواحي
– حقوقك و حقوق زوجك
-القيمة المالية التقريبية للمصروف تاعك و تاع دارك
– الكمية االلازم شراءها من الخضار و الفواكه و مواد التنظيف و الكوسميتيك و الاثاث
-كيفية تخزين الأغذية في الثلاجة و خارجها
-كيفية غسل الملابس و نشرها و كيها
– كيفية تبديل قارورة الغاز
-أساسيات الديكور و تنظيم الأثاث و تفادي تجمع الخردة
6- لازم تعملي قائمة للأشياء الضرورية في الحياة اليومية و الزوجية تاعك مثلا
– أيام شراء لوازم البيت من الخضار و الفواكه و مواد التنظيف و الكوسميتيك و الأواني و الأثاث و الملابس
– أنواع الطبخات و أيام طبخها
– أيام التنظيف المنزلي العام و الخفيف
– أيام غسل الملابس و ترتيب الخزانة
7- قهوة الصباح جد ضرورية لازم توجديهالو كل يوم ماتقوليش راني عيانة مارقدش مليح وليدي تعبني…إلخ الراجل يصبرلك نهار و لا يومين و بعدين يواجهك يقولك الرجال كلهم يشربو قهوتهم و أنا كأني لا أملك زوجة.
8- حضري حمام زوجك بنفسك صح مرات يعذرك خاصة في بداية الحياة الزوجية و لكن بعدها لازم أنت تحظريه خاصة إذا كنت تسكنين مع أهل زوجك.
9- فراشك"الفراش" إذا كان عندك "مخزن" نظميه فيه أو حطيه في الخزانة و رتبيه حسب الإستعمال و الشكل "الدراوات وحدهم.الكوفرطات وحدهم .الكوات.المخايد ….إلخ" و اللي ماتستعمليهش بزاف الاحسن خليه في العلب تاعو علا الغبرة و عرضيه لأشعة الشمس على الأقل مرة في الأسبوع للقضاء على الفطريات.
10- غرفتك حافظي عليها دائما مرتبة و نظيفة وتفقديها مرة على مرة في اليوم خاصة مع الأولاد إذا كنت تسكني مع أهل زوجك و إذا كنتي تسكني وحدك علمي أولادك لا يدخلو لغرفتك إلا للضرورة و بإذنك و علميهم أنها مكان مهم لراحتك وراحة أبيهم و لازم يخلوها نقية كل وقت
11- ملابسك خليهم ينشفو جيدا قبل ما تجمعيهم تقدر تخلق فيهم الفطريات"الميديتي" داخل الخزانة خاصة إذا كانت غرفتك مغلقة و غير معرضة للشمس.
12- لاحظت معظم النساء الجزائريات و خاصة منهن العاملات تخلي التنظيف في عطلة الأسبوع و هاذا خطا كبير. ماتتصوريش الرجل كم ينزعج لذلك حتى كي كنت في دارنا خاوتي يتقلقو من هاذ الشيء يقولو أسبوع كامل احنا نخدمو و في الويكاند نزيدو نلقاو الدار مقلوبة قاع .الأحسن تخلي يوم الأربعاء او الخميس و ديري النيتواياج و ولادك دوشيلهم الخميس في الليل و بإذن الله تكون الجمعة و السبت راحة ليك و لأولادك إن شاء الله.
13- لا تكثري الملابس من صنف واحد بل خذي من كل شكل و لون و اقطفي من كل بستان زهرة
و لا تشتري كثيرا إلا حسب الضرورة لأنها ستتكدس في الخزانة و ربما تصيبها الفطريات و أنت لم تلبسيها بعد و التصديرة"المرأة الجزائرية تغير ملابسها خلال العرس مرتين على الأقل و هذه الطريقة تسمى التصديرة" أنا في رأيي كراء الملابس أحسن إذا كنت مظطرة و إذا شريتي شري "أنصومبل .جبة قبايل. قفطان" يكفي و الله مضيعة كبيرة للمال و أنت في أمس الحاجة إليه
14 – إذا كنت ساكنة وحدك البسي ما يحلو لك من الطويل و القصير و الجذاب حتى و أنت تخدمي شغلك لازم تكون ملابسك أنيقة و الطابلية تاع الشغل"مأزر العمل بالبيت" جميلة و أنيقة
-15 إذا كنت مع أهله أكثري من الملابس المحترمة و أنصحك بارتداء جبة"ربة" و شال أمام إخوة زوجك و أقاربهم لترضي ربك أولا و يمنحوك الاحترام الذي منحك إياه الله عزو جل و لا تقللي من احترامك بارتداء الملابس الضيقة و الفاضحة و التي تؤدي إلى الفتنة مع الوقت اللي رانا فيه و استغلي ذلك في غرفتك و البسي و تزيني كما يحلو لك مع زوجك في الغرفة و استغلي وجودكما وحدكما في البيت و عند غياب الأولاد أو نومهم في التزين لزوجك و تغيير الروتين و مرة على مرة شري حوايج جدد.
16- بالنسبة للبيجامات و الربات اللي تسكن مع ناس دارها مادابيها تشري بعض الملابس اللي فيها القفالي"الأزرار" أو سنسلة"سلسلة" باش جيك ساهلة في الرضاعة صدقوني البنات مادارش عليا العام كنت بوليدي و حصلت حصلة الجبات قاع ماغلوقين في الرقبة و نكون مزروبة مع الشغل نحصل نحي قاع الجبة خاصة إذا كان البرد نبرد بزاف
17- الملابس الجديدة دائما جربيها داخل قليل من الماء خاصة الملابس الداخلية حذاري جسمك راح يتلون بيها بسبب العرق أو حتى و هي جافة و جربي كل لون وحدو و شليهم بعدها بماء عطري و نشريهم و بعدها حدديهم و رتبيهم في الفاليزة أو الخزانة .
18- دائما بالنسبة للملابس ماتستعمليش الجافيل بزاف راح يبيض الحوايج و يقدامو بالخف و حاذري على حوايج راجلك طاشيهم خاصة الملابس المفظلة تاعو
